ବ୍ୟବସାୟର ମାଧ୍ୟମ ପାଲଟିଛି ଲିଚୁକୋଳି । ଚାଷୀଙ୍କ ଠାରୁ ଲିଚୁ କିଣି ବିକ୍ରି କରୁଛନ୍ତି ଏସଏଚଜି ମହିଳା ।
କନକ ବ୍ୟୁରୋ: ରାସ୍ତାଘାଟ ଦୋକାନ ବଜାର ଏବେ ସବୁଠି ଲିଚୁ କୋଳିର ଆସର । ଖରାଦିନେ ସଭିଁଙ୍କ ମନରେ ରାଜ୍ କରୁଥାଏ ଲିଚୁ କୋଳି । ଲିଚୁକୋଳି ଦେଖିବାକୁ ଯେମିତି ସୁନ୍ଦର ଖାଇବାକୁ ମଧ୍ୟ ସେମିତିି ସୁଆଦିଆ । ତେବେ ଏହି ଲିଚୁ ବିକି ସ୍ୱାବଲମ୍ବୀ ହେଉଛନ୍ତି ମହିଳା । ସମ୍ବଲପୁର କୁଚିଣ୍ଡା ଅଂଚଳରେ ପ୍ରଚୁର ପରିମାଣର ଲିଚୁ ଚାଷ କରିଛନ୍ତି ଚାଷୀ । କୁଚିଣ୍ଡାର ବଡ଼ବାହାଳ ଗାଁରେ ପ୍ରାୟ ୨ଶହରୁ ଅଧିକ ସଂଖ୍ୟକ ଚାଷୀ ଲିଚୁ ଚାଷକରି ଉପକୃତ ହେଉଛନ୍ତି ।
Kanak News is now on WhatsApp
Join and get latest news updates delivered to you via WhatsApp
କୁଚିଣ୍ଡାର ପ୍ରାକୃତିକ ପରିବେଶ ଏବଂ ଗୁଗଗୁଦା ଜଳପ୍ରପାତର ଜଳଧାରା ଲିଚୁ ଚାଷ ପାଇଁ ବେଶ ଉପଯୋଗୀ ହୋଇଥିବାରୁ ଏଠାରେ ପ୍ରଚୁର ପରିମାଣ ଲିଚୁ ଚାଷ ହେଇଥାଏ । ତେବେ ଗାଁର ଅଧିକାଂଶ ମହିଳା ଲିଚୁ ଚାଷୀଙ୍କ ଠାରୁ ଲିଚୁ କିଣି ସ୍ୱାବଲମ୍ବୀ ହେବା ପାଇଁ ଏହାକୁ ବ୍ୟବସାୟ ରୁପେ ଗ୍ରହଣ କରିଛନ୍ତି । ଘର କାମ ସହ ଅନ୍ୟାନ୍ୟ କାମ ସାରି ଏଠାକାର ମହିଳା ମାନେ ବାହାରି ଯାଆନ୍ତି ରାସ୍ତା କଡରେ ଲିଚୁ ବିକିବା ପାଇଁ । ଗୋଟେ ଗୋଟେ ସିଜିନରେ ୪୦ରୁ ୫୦ ଟଙ୍କା ପର୍ଯ୍ୟନ୍ତ ରୋଜଗାର କରୁଛନ୍ତି ।
ଚଳିତ ବର୍ଷ ରୋଗ ପୋକ ଯୋଗୁଁ ଆରମ୍ଭରୁ ବଉଳଫୁଲ ଝଡିଯିବା ସହ ଫଳ ମଧ୍ୟ ଭଲ ଆସିନାହିଁ । ଠିକ ସମୟରେ ବର୍ଷା ନହେବା ମଧ୍ୟ ଅନ୍ୟ ଏକ କାରଣ ହୋଇଥିବା କହିଛନ୍ତି ଚାଷୀ ଓ ବ୍ୟବସାୟୀ । ଯାହା ବି ଫଳିଛି ପ୍ରାୟ ପୋକ ଲାଗିଯାଉଛି । ତେଣୁ ଚାଷୀ ହେଉ ବା ବ୍ୟବସାୟୀ, ବ୍ୟବସାୟକୁ ନେଇ ଭଲ ଦୁଇ ପଇସା ଲାଭ ଆଶା ରଖିଥିବା ବେଳେ ଏଭଳି ଅବସ୍ଥା ତାଙ୍କୁ ନିରାଶ କରିଛି ।