କୁଆଖାଇରୁ ମିଳିଲା ଆଉ ୨ ମୃତଦେହ : ଗତକାଲି ମିଳିଥିଲା ଆଉ ୨ସାଙ୍ଗଙ୍କ ମୃତଦେହ; ଭୋଜି କରିବାକୁ ଯାଇ ଘଟିଥିଲା ଅଘଟଣ

କନକ ବ୍ୟୁରୋ : କୁଆଖାଇ ନଦୀରେ ବୁଡ଼ିଯିବା ଘଟଣା । ସମସ୍ତ ୪ ମୃତଦେହ ଉଦ୍ଧାର । ଗତକାଲିଠୁ ଖୋଜାଖୋଜି ପରେ ଆଜି ଆଉ ୨ ମୃତଦେହ ଉଦ୍ଧାର ହୋଇଛି । ଗତକାଲି ଅଗ୍ନିଶମ ବାହିନୀ ୨ ଜଣଙ୍କ ମୃତଦେହ ଉଦ୍ଧାର କରିଥିଲା । ବାଲିଅନ୍ତା ବ୍ଲକ ବଇଁଚୁଆ ପଞ୍ଚାୟତ ଧଳାବାହାର ନିକଟ କୁଆଖାଇରେ ୪ ଜଣ ଯୁବକ ଗାଧେଇଲା ବେଳେ ବୁଡି ଯାଇଥିଲେ । ମୃତକ ଅଟଳା ନିକଟରେ ଥିବା ଆସ୍ଥା କଲେଜର ଛାତ୍ର ବୋଲି ଜଣାପଡିଛି ।

ଗତକାଲି ଅପରାହ୍ନ ୩ଟାରେ ଏହି ଦୁଃଖଦ ଘଟଣା ଘଟିଥିଲା । ଏହି କଲେଜର ଆଠଜଣ ଛାତ୍ର ଭୋଜି କରିବାକୁ ଆସିଥିଲେ । ଭୋଜି ଚାଲିଥିବା ସମୟରେ ନଦୀକୁ ଗାଧେଇବାକୁ ଯାଇଥିଲେ । ଆଉ ଗାଧୋଉଥିବାବେଳେ ୪ ଜଣ ବୁଡିଯାଇଥିଲେ । ସ୍ଥାନୀୟ ଲୋକେ ସେମାନଙ୍କୁ ଖୋଜାଖୋଜି କରିଥିଲେ । କିନ୍ତୁ କୌଣସି ଖବର ନ ପାଇବାରୁ ଅଗ୍ନିଶମ ବାହିନୀକୁ ଖବର ଦେଇଥିଲେ । ଅଗ୍ନିଶମ ବାହିନୀ ଖୋଜାଖୋଜି କରିବା ପରେ ପ୍ରଥମେ ୨ଜଣଙ୍କ ମୃତଦେହ ଉଦ୍ଧାର କରିଥିଲା ପରେ ଆଜି ଆଉ ୨ ଜଣଙ୍କର ମୃତ ଦେହ ଉଦ୍ଦାର ହୋଇଛି ।