କନକ ବ୍ୟୁରୋ: ପେସାରେ ପୂଜକ, ନିଶାରେ ସେବକ । ଠାକୁରଙ୍କୁ ପୂଜା କରନ୍ତି, ଜଙ୍ଗଲର ସେବା କରନ୍ତି ଆଉ ତାକୁ ସୁରକ୍ଷା ଦିଅନ୍ତି । ଦୀର୍ଘ ୨୫ ବର୍ଷ ହେବ ସେ ଜଙ୍ଗଲ ପ୍ରେମରେ ପଡିଯାଇଛନ୍ତି । କି ଖରା କି ବର୍ଷା ଜଙ୍ଗଲ ଜଗିବା ତାଙ୍କର ନିତିଦିନିଆ କାମ ହୋଇଯାଇଛି । ଖାଲି ଜଙ୍ଗଲ ଜଗିବା ନୁହେଁ ଗଛ ଲଗାଇ ନୂଆ ଜଙ୍ଗଲ ସୃଷ୍ଟି କରିବାରେ ମଧ୍ୟ ସେ ନିଜକୁ ନିୟୋଜିତ ରଖିଛନ୍ତି । ତେବେ ଏପରି ଜଣେ ନିଆର ବ୍ୟକ୍ତି ହେଉଛନ୍ତି କୃପାସିନ୍ଧୁ । କେନ୍ଦୁଝର ବାଂଶପାଳ ବ୍ଲକ ତଳବିରିକଳା ଗାଁର ବୃକ୍ଷବନ୍ଧୁ ଭାବେ ଜଣାଶୁଣା କୃପାସିନ୍ଧୁ ଦାସ
Kanak News is now on WhatsApp
Join and get latest news updates delivered to you via WhatsApp
ପେସାରେ ପୂଜକ ହୋଇଥିଲେ ବି ନିଶା ତାଙ୍କର ଜଙ୍ଗଲ ସୁରକ୍ଷା । ଗାଁର ଚାରିପଟେ ଭରି ରହିଥିବା ଜଙ୍ଗଲ ଆଉ ଜଙ୍ଗଲରେ ଥିବା ଶାଳ ପିଆଶାଳ ପରି ବହୁ ମୁଲ୍ୟବାନ ଗଛକୁ କାଠମାଫିଆଙ୍କ କବଳରୁ ରକ୍ଷା କରିବା ପାଇଁ ଉଦ୍ୟମ ଜାରି ରଖିଛନ୍ତି କୃପାସିନ୍ଧୁ । ସବୁଦିନ ସକାଳ ୯ଟା ସୁଦ୍ଧା ମନ୍ଦିରରେ ପୂଜାର୍ଚ୍ଚନା ସାରି ଟାଙ୍ଗିଆ ଧରି ଜଙ୍ଗଲକୁ ବାହାରି ଯାଆନ୍ତି କୃପାସିନ୍ଧୁ । ଖରା-ବର୍ଷା-ଶୀତ ବର୍ଷକ ୧୨ ମାସ ଜଙ୍ଗଲକୁ ସୁରକ୍ଷା ଦେଇଆସୁଛନ୍ତି ଏହି ବୃକ୍ଷବନ୍ଧୁ ।
ଦିନସାରା ଜଙ୍ଗଲ ସଫା କରିବା, ବଡଗଛ ନିକଟରୁ ଛୋଟ ଗଛ କାଟିବା ଏବଂ ଖାଲି ସ୍ଥାନରେ ନୂଆଗଛ ଲଗାଇବାରେ ବ୍ୟସ୍ତଥାନ୍ତି ଏହି କୃପାସିନ୍ଧୁ । ତେବେ ଜଙ୍ଗଲକୁ ଜୀବନ ଦେଇ ଭଲପାଉଥିବା ଆଉ ତାର ସୁରକ୍ଷା କଥା ଭାବୁଥିବା ଏ ବୃକ୍ଷବନ୍ଧୁ ନିଜ ଜୀବନର ୨୫ ବର୍ଷ ଜଙ୍ଗଲ ସେବାରେ ସାରି ଦେଲେଣି ।
ଖାଲି ସେତିକି ନୁହେଁ ପୋଡୁଚାଷ ପାଇଁ ବନାଂଚଳ ଲୋକ ଜଙ୍ଗଲ ପୋଡି ନଷ୍ଟ କରିଦେଉ ଥିବା ବେଳେ କୃପାସିନ୍ଧୁଙ୍କ ଉଦ୍ୟମ ପାଇଁ ସେହି ଅଂଚଳରେ ଏବେ ନୂତନ ଜଙ୍ଗଲ ସୃଷ୍ଟି ହୋଇଛି । ତେବେ କୃପାସିନ୍ଧୁଙ୍କ ଏପରି ଉଦ୍ୟମ ଅନ୍ୟମାନଙ୍କ ପାଇଁ ଉଦାହରଣ ସାଜିଥିବା ବେଳେ ଏଭଳି ପ୍ରୟାସ ପାଇଁ ତାଙ୍କୁ ସମସ୍ତେ ସାବାସୀ ଜଣାଇଛନ୍ତି ।