ଖୋଲା ଆକାଶ ତଳେ ପଡିରହିଛି କୁଇଣ୍ଟାଲ କୁଇଣ୍ଟାଲ ଧାନ । ମିଳୁନି ଟୋକନ୍, ଅଦିନିଆ ବର୍ଷା ବଢାଉଛି ସଙ୍କଟ, ଚିନ୍ତାରେ ଚାଷୀ ।
କନକ ବ୍ୟୁରୋ : ଖୋଲା ଆକାଶ ତଳେ ଚାଷୀଙ୍କ ୨ହଜାର କୁଇଣ୍ଟାଲରୁ ଅଧିକ ଧାନ ପଡିରହିଛି । ଗୋଟିଏ ପଟେ ଟୋକନ ମିଳିନଥିବା ବେଳେ ଅନ୍ୟପଟେ ଅଦିନିଆ ବର୍ଷା, ଚାଷୀଙ୍କୁ ସଂକଟ ପରିସ୍ଥିତିରେ ପକାଇ ଦେଇଛି । ବର୍ଷାରେ ଧାନ ଭିଜି ଯାଇଥିବାରୁ ଗୁଣାବତା ହରାଇବା ଆଶଙ୍କା କରୁଛନ୍ତି ଚାଷୀ ।
Kanak News is now on WhatsApp
Join and get latest news updates delivered to you via WhatsApp
କଳାହାଣ୍ଡି କୋକସରା ବ୍ଳକ ଟେମରା ସେବା ସମବାୟ ସମିତି ଅଧିନରେ ଥିବା ଡେଙ୍ଗାଗୁଡା ଟେମରା ମଣ୍ଡିର ଚିତ୍ର ଦେଖି ଚାଷୀଙ୍କ ହୋସ୍ ଉଡିଯାଉଛି । ଧାନ ବିକ୍ରି ପାଇଁ ଟୋକନ ମିଳୁନଥିବା ବେଳେ ଅଦିନିଆ ବର୍ଷା ଚାଷୀ ମୁଣ୍ଡ ବିନ୍ଧାର କାରଣ ହୋଇଛି । ଟେମରା ସେବା ସମବାୟ ସମିତି ଅଧିନରେ ରହିଛି ଟେମରା, ଡେଙ୍ଗାଗୁଡା ଓ ଡୁଡୁକାଠେଙ୍ଗାର ଭଳି ୩ଟି ମଣ୍ଡି । ଏସବୁ ମଣ୍ଡି ଜରିଆରେ ୨୬ ଜାନୁୟାରୀ ସୁଦ୍ଧା ୧୨୭୭ ଜଣ ଚାଷୀଙ୍କ ଠାରୁ ୮୬ ହଜାର ୬୦୦ କୁଇଣ୍ଟାଲ ଧାନ କ୍ରୟ କରାଯାଇଛି । ଏବେ ବି କ୍ୱିଂଟାଲ କ୍ୱିଂଟାଲ ଧାନ ମଣ୍ଡିରେ ପଡି ରହିଛି । ଟୋକନ ପାଇଁ ପଞ୍ଜିକରଣ କରିଥିବା ପ୍ରାୟ ୧୩୦ ଜଣ ଚାଷୀଙ୍କ ଟୋକନ ଜେନେରେଟ୍ ହୋଇ ପାରୁନଥିବାରୁ ଧାନବିକ୍ରୀ ହୋଇ ପାରୁନାହିଁ ।
ଯୋଗାଣ ବିଭାଗ କଳାହାଣ୍ଡି ଜିଲ୍ଲାରେ ଜାନୁୟାରୀ ମାସରୁ ଖରିଫ ଧାନକ୍ରୟ ପ୍ରକ୍ରିୟା ବନ୍ଦ କରି ଦେଇଥିଲା । ପରେ ବହୁ ଆନ୍ଦୋଳନ ପରେ ମଣ୍ଡିରେ ପଡିଥିବା ଧାନ କିଣାଯାଇଥିଲା । ହେଲେ ଏବେ ବି ବହୁ ଚାଷୀ ମଣ୍ଡିରେ ଧାନ ରଖି ବିକ୍ରି ପାଇଁ ଅପେକ୍ଷା କରିଛନ୍ତି । ଆଉ ଏତିକି ବେଳେ ଅଦିନିଆ ବର୍ଷାରେ ଧାନ ଭିଜି ଯାଇଛି । ଯାହାର ଗୁଣାବତାକୁ ନେଇ ଚାଷୀ ଆଶଙ୍କା କରିଛନ୍ତି । ଏନେଇ ଟେମରା ପେକ୍ସ ସମ୍ପାଦକ ରଞ୍ଜନ କୁମାର ପାଣିଗ୍ରାହୀ କହିଛନ୍ତି ଟୋକନ ଓ ଟାର୍ଗେଟ ସହ ବିଭାଗୀୟ ଅଧିକାରୀଙ୍କ ନିର୍ଦ୍ଦେଶ ଆସିଲେ ଧାନ କିଣାଯିବ ।
ସେପଟେ ଜିଲ୍ଲା ଯୋଗାଣ ଅଧିକାରୀ କହୁଛନ୍ତି ଧାନ କିଣିବା ପାଇଁ ସରକାର ପୁନର୍ବାର ଅନୁମତି ଦେଲେ ଡେଙ୍ଗାଗୁଡା ମଣ୍ଡିରେ ପଡିଥିବା ଧାନ କିଣାଯିବ । ପ୍ରଶାସନିକ ଅଧିକାରୀଙ୍କ ଠାରୁ ଏଭଳି ପ୍ରତିକ୍ରିୟା ଶୁଣିବା ପରେ ଚାଷୀଙ୍କ ଆଶଙ୍କା ଆହୁରୀ ବଢି ଯାଇଛି ।