କନ୍ଦାଇଦେବ କୋଇଡ଼ାର କରୁଣ କାହାଣୀ : ଅଇଁଠା ଖଲିକୁ ଚାଟି ଚାଟି ଖାଉଛି କୁନି ପୁଅ; ସୋସିଆଲ ମିଡ଼ିଆରେ ଭିଡିଓ ଭାଇରାଲ
ମାଟି ତଳେ ଭରି ରହିଛି ଅମୂଲ୍ୟ ଖଣି; ହେଲେ ମାଟି ଉପରେ ରହୁଥିବା ପିଲାର ଭୋକରେ ପୋଡ଼ ଯାଉଛି ପେଟ
କନକ ବ୍ୟୁରୋ : ଏମିତି ଏକ ଦୃଶ୍ୟ… ଯାହା ଆପଣଙ୍କ ଆଖିରେ ହୁଏତ ଲୁହ ଆଣିଦେଇପାରେ । ଖଣି ଖାଦାନ ଭରା ସୁନ୍ଦରଗଡ କୋଇଡାରୁ ଆସିଛି ଦାରିଦ୍ର୍ୟର କରୁଣ କାହାଣୀ । ମାଟି ଭିତରେ କେତେ ଅମୂଲ୍ୟ ସଂପଦ ଭରି ରହିଛି । ହେଲେ ମାଟି ଉପରେ ରହୁଥିବା ଲୋକଙ୍କ ପେଟ ପୋଡିଯାଉଛି । ଛୋଟିଆ ପୁଙ୍ଗୁଳା ଛୁଆଟିଏ, ରାସ୍ତା କଡରେ ପଡିଥିବା ଅଇଁଠା ଖଲିକୁ ଚାଟି ଖାଇ ଯାଉଛି । ଏହି ଗୋଟିଏ ଚିତ୍ର ସରକାରଙ୍କ ଶହ ଶହ ଯୋଜନା ଉପରେ ହଜାରେ ପ୍ରଶ୍ନ ଛିଡା କରୁଛି । ଏମିତି କ’ଣ ପରିସ୍ଥିତି ହେଲା ଯେ, ଏହି କୁନି ଛୁଆଟି ରାସ୍ତାରେ ପଡିଥିବା ଅଇଁଠା ଖଲି ଚାଟି ପେଟର ଭୋକ ମେଣ୍ଟାଇଲା । ବେଶ କିଛି ଦିନ ହେବ, ସୋସିଆଲ ମିଡିଆରେ ଭାଇରାଲ ହେଉଛି ଏହି ଦୃଶ୍ୟ ।
Kanak News is now on WhatsApp
Join and get latest news updates delivered to you via WhatsApp
ଭିଡିଓଟି ନଜରକୁ ଆସିବା ପରେ ଘଟଣା ପଛର ସତ୍ୟାସତ୍ୟ ଜାଣିବା ପାଇଁ କୋଇଡାର ତାଡୁଗୋଠ ଗାଁରେ ପହଂଚିଥିଲେ ଆମ ପ୍ରତିନିଧି । ଆଉ ସେଠାରେ ଯାହା ଦେଖିଲେ, ତାହା ବିଶ୍ୱାସ ନହେଲା ଭଳି । ଖଣି ଖାଦାନ ଭରା ଅଂଚଳରେ ଥିଲା ଠିକ ନଗଡା ଭଳି ଚିତ୍ର । ଏହି ପଡାରେ ୧୦ରୁ ୧୨ଟି ପରିବାର ବସବାସ କରନ୍ତି । ସେଠାକାର ଜଣେ ବାସିନ୍ଦା ରାବଣ ମୁଣ୍ଡାଙ୍କ ତିନି ଛୁଆଁଙ୍କୁ ନେଇ ତେଲ ଲୁଣର ସଂସାର । ଖାଦ୍ୟ ଅଭାବ ଯୋଗୁଁ ଦିନକୁ ଓଳିଏ ଖାଇବାକୁ ନପାଇ ଅପପୁଷ୍ଟିର ଶିକାର ହୋଇଛନ୍ତି । କିଛି ମାସ ହେବ ରାବଣଙ୍କ ସ୍ତ୍ରୀଙ୍କ ଦେହାନ୍ତ ପରେ ଏବେ ପିଲାଙ୍କ ଦାୟିତ୍ୱ ରାବଣ ଉପରେ ପଡିଛି । ହେଲେ ବାହାରକୁ କାମ ପାଇଁ ନ ଗଲେ ତିନି ପିଲାଙ୍କ ମୁହଁରେ ଆହାର ଦେବେ କିପରି ? ତେଣୁ ପିଲାଙ୍କୁ ଘରେ ଛାଡି ସେ କାମରେ ଯାଇଥିବା ବେଳେ ଭୋକର ଦାଉରେ ଜଳୁଥିଲେ ତିନି ପିଲା ।
ଆଉ ପେଟର ଜ୍ୱଳା ସହିନପାରି କୁନି ଶିଶୁଟି ରାସ୍ତାକଡରେ ଭୋଜି ପରେ ଫୋପାଡି ଦେଇଥିବା ଖଲିକୁ ଚାଟି ଖାଇଥିଲା । ଏନେଇ ପିଲାର ବାପାକୁ ପଚାରିବାରୁ ସେ କହିଛନ୍ତି, ଛୁଆଙ୍କୁ ଛାଡି କାମ କରିବାରୁ ଗଲେ ଏଣେ ତେଣେ ବୁଲା ବୁଲି କରୁଛନ୍ତି । ତେଣୁ ଏବେ କାମ ଧନ୍ଦା ଛାଡି ଛୁଆଙ୍କୁ ଜଗି ରହିଛନ୍ତି । ପଂଚାୟତରୁ ମିଳୁଥିବା ଚାଉଳ ଓ ଜାଳେଣୀ କାଠ ବିକ୍ରି କରି ପରିବାର ଚଳାଉଛନ୍ତି । ତାଡୁଗୋଠ ଗାଁର ଉପର ମୁଣ୍ଡରେ ଲୁହା ଖଣି ଥିଲେ ମଧ୍ୟ କୌଣସି ସୁବିଧା ମିଳୁନଥିବାରୁ ମହିଳା ସମେତ ଛୁଆଙ୍କ ସ୍ୱାସ୍ଥ୍ୟବସ୍ଥା ଭଲ ନାହିଁ । ସେହିପରି ପଡାର ମହିଳାମାନେ ଅଭିଯୋଗ କରିଛନ୍ତି, ଅଙ୍ଗନୱାଡି କେନ୍ଦ୍ରରେ ଛତୁଆ ଠାରୁ ଆରମ୍ଭ କରି ବିଭିନ୍ନ ସାମଗ୍ରୀ ଦୁଇରୁ ତିନି ମାସରେ ଥରେ ମିଳେ ।