କନକ ବ୍ୟୁରୋ : ଟି-୨୦ ଅଧିନାୟକ ପଦ ଛାଡିବା ନେଇ ଘୋଷଣା କରିବା ପରେ ଏବେ କୋହଲିଙ୍କ ଆଇପିଏଲ ପ୍ରଦର୍ଶନ ଉପରେ ସମସ୍ତଙ୍କର ନଜର ରହିଛି । କିନ୍ତୁ ଆଇପିଏଲ ପୂର୍ବରୁ ଅନେକ ଲୋକ କହିଛନ୍ତି, ବିରାଟ କୋହଲିଙ୍କୁ ଆରସିବି କ୍ୟାପଟେନ ପଦ ମଧ୍ୟ ଛାଡିଦେବା ଉଚିତ୍ । କାରଣ ଆଇପିଏଲରେ ମଧ୍ୟ କୌଣସି ଅର୍ନ୍ତଜାତୀୟ ମ୍ୟାଚ ଠାରୁ କମ ଚାପ ନଥାଏ । ତେଣୁ ଚଳିତ ଆଇପିଏଲ ଏବେ ବିରାଟଙ୍କ ପାଇଁ ବଡ ଚ୍ୟାଲେଞ୍ଜ ଛିଡା କରିଛି । ଯଦି ଆଇପିଏଲ-୧୪ରେ ଆରସିବି ଚାମ୍ପିୟନ ନହୁଏ ତେବେ କୋହଲିଙ୍କ କ୍ୟାପଟେନ ପଦ ଉପରେ ସଙ୍କଟର କଳାବାଦଲ ଛାଇଯିବ । ଏପରିକି କୋହଲିଙ୍କୁ କ୍ୟାପଟେନ ପଦ ମଧ୍ୟ ଛାଡିବାକୁ ପଡିପାରେ ।
Kanak News is now on WhatsApp
Join and get latest news updates delivered to you via WhatsApp
ଜାତୀୟ ଗଣମାଧ୍ୟମର ଏକ ରିପୋର୍ଟ ଅନୁଯାୟୀ, କରୋନା ମହାମାରୀ କମିବା ପରେ ଅଥାର୍ତ ଡିସେମ୍ବର ୨୦୨୦ ପରଠାରୁ ଟିମ୍ ଇଣ୍ଡିଆ ମୋଟ ୮ଟି ଟି-୨୦ ମୁକାବିଲା ଖେଳିଛି । କିନ୍ତୁ ଆଇପିଏଲରେ ମଧ୍ୟ କୋହଲି ପ୍ରାୟ ସେତିକି ମ୍ୟାଚରେ ଅଧିନାୟକ ଭାର ସମ୍ଭାଳିଛନ୍ତି । ତେବେ ଆଇପିଏଲରେ ଅଧିନାୟକ ଦାୟିତ୍ୱ ତୁଲାଇବା ଏତେ ସହଜ କଥା ନୁହେଁ । ଖାସକରି ବିରାଟଙ୍କ ପାଇଁ ଏବେ ଚ୍ୟାଲେଞ୍ଜ ଅଧିକ ବଡ ରହିଛି ଓ ଦଳକୁ ଚାମ୍ପିୟନ କରିବାର ଚାପ ମଧ୍ୟ ରହିଛି । ସବୁଠୁ ବଡ କଥା ହେଲା ବ୍ୟାଟସମ୍ୟାନ ଭାବେ ବିରାଟ ଯେତିକି ସଫଳତା ପାଇଛନ୍ତି ଅଧିନାୟକ ଭାବେ ସେତିକି ସଫଳତା ଆଇପିଏଲରେ ପାଇନାହାନ୍ତି କୋହଲି ।
ବିରାଟ କୋହଲି ୨୦୧୩ରୁ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ ରହିଥିଲେ ମଧ୍ୟ ଥରୁଟିଏ ମଧ୍ୟ ଟାଇଟଲ ଜିତିବାର ସକ୍ଷମ ହୋଇନାହାନ୍ତି । ଏପରିକି ୨୦୧୬ ପରଠାରୁ ମାତ୍ର ଥରେ ଗତବର୍ଷ ପ୍ଲେଅଫ୍ ଖେଳିବାକୁ ସୁଯୋଗ ପାଇଥିଲା ବାଙ୍ଗାଲୋର । ୨୦୧୭ ଓ ୨୦୧୯ରେ ଦଳ ପଏଣ୍ଟ ତାଲିକାର ଶେଷରେ ରହିଥିବା ବେଳେ ୨୦୧୮ରେ ୬ଷ୍ଠ ନମ୍ବରରେ ରହିଥିଲା । ତେବେ କୋହଲିଙ୍କ ପାଇଁ ୨୦୧୬ ଆଇପିଏଲ ବେଶ ଭଲ ଯାଇଥିଲା । ଏହି ସିଜିନରେ କୋହଲି ୯୭୩ ରନ୍ କରିଥିବା ବେଳେ ଶତକ ମଧ୍ୟ ମାରିଥିଲେ । ଏହାପରେ ୨୦୧୮ରେ କୋହଲି ୫୦୦ରୁ ଅଧିକ ସ୍କୋର କରିଥିଲେ । କିନ୍ତୁ ୨୦୨୧ ଆଇପିଏଲରେ ଏଯାଏଁ ଖେଳାଯାଇଥିବା ମ୍ୟାଚରେ କୋହଲି ମାତ୍ର ଗୋଟିଏ ଅର୍ଦ୍ଧଶତକ ମାରିଥିବା ବେଳେ ମାତ୍ର ୧୯୮ ରନ୍ କରିବାକୁ ସକ୍ଷମ ହୋଇଛନ୍ତି । ତେଣୁ ବଳକା ୭ଟି ମ୍ୟାଚରେ କୋହଲି କଣ କରିସ୍ମା କରୁଛନ୍ତି ତାହା ଉପରେ ସମସ୍ତଙ୍କର ନଜର ରହିଛି ।