ଜଳବାୟୁ ପରିବର୍ତ୍ତନ ଯୋଗୁ ବିଲୁପ୍ତ ହେଉଛନ୍ତି ପକ୍ଷୀ । ବିଶ୍ୱରେ ହ୍ରାସପାଉଛି ପକ୍ଷୀଙ୍କ ସଂଖ୍ୟା ।
କନକ ବ୍ୟୁରୋ : ଦିନକୁ ଦିନ କମିଚାଲିଛି ପକ୍ଷୀଙ୍କ ସଂଖ୍ୟା । ପରିବେଶ ସମ୍ବନ୍ଧୀୟ ଅଧ୍ୟୟନରୁ ଜଣାପଡିଛି ବିଶ୍ୱରେ ପକ୍ଷୀଙ୍କ ସଂଖ୍ୟା ହ୍ରାସପାଉଛି । ଅନେକ ପ୍ରଜାତି ବିଲୁପ୍ତ ଅବସ୍ଥାରେ ପହଞ୍ଚିସାରିଛନ୍ତି । ଯଦି ସଠିକ ପଦକ୍ଷେପ ନିଆଯିବନାହିଁ ତେବେ ମହାବିନାଶର ପ୍ରଥମ ଲହର ଦେଖିବାକୁ ପାଇବା । ପକ୍ଷୀମାନଙ୍କୁ ସଂରକ୍ଷଣ ପାଇଁ ଆମକୁ ପ୍ରାକୃତିକ ଦୁନିଆରେ ମାନବୀୟ ଦଖଲକୁ ବନ୍ଦ କରିବାକୁ ପଡିବ । ବିଭିନ୍ନ ସଂସ୍ଥାନ ଦ୍ୱାରା ହେଉଥିବା ଅନୁସନ୍ଧାନରେ ଜଣାପଡିଛି ସାରା ବିଶ୍ୱରୁ ପକ୍ଷୀ ସଂଖ୍ୟା ଧିରେ ଧରେ କମିଚାଲିଛି ।
Kanak News is now on WhatsApp
Join and get latest news updates delivered to you via WhatsApp
ଗୋଟିଏ ରିପୋର୍ଟରେ ଜଣାପଡିଛି ପକ୍ଷୀମାନେ ବିଲୁପ୍ତ ହେବାର କାରଣ ହେଉଛି ଜୈବବିବିଧତାରେ ଥିବା ସେମାନଙ୍କର ପ୍ରାକୃତିକ ଆବାସ ନଷ୍ଟ ହେବା । ଏହା ହେବା ଦ୍ୱାରା ଧିରେ ଧିରେ ପକ୍ଷୀ ବିଲୁପ୍ତ ହୋଇଚାଲିଛନ୍ତି । କେବଳ ଏତିକି ନୁହେଁ ପକ୍ଷୀଙ୍କ ସଂଖ୍ୟା କମିବା ପଛରେ ଜଳବାୟୁର ପରିବର୍ତ୍ତନ ଆଉଗୋଟିଏ ବଡ କାରଣ । ନିକଟରେ କୋନେଲ ବିଶ୍ୱବିଦ୍ୟାଳୟର ବାର୍ଷିକ ପରିବେଶ ଓ ସମ୍ବଳର ସମୀକ୍ଷା ରିପୋର୍ଟ ପ୍ରକାଶ ପାଇଛି । ଏହି ରିପୋର୍ଟର ପ୍ରମୁଖ ଲେଖକ ଆଲେକଜାଣ୍ଡର ଲିଜ୍ କହିଛନ୍ତି, ଆମେ ବର୍ତ୍ତମାନ ପକ୍ଷୀଙ୍କର ବିଭିନ୍ନ ପ୍ରଜାତିର ମହାବିନାଶର ନୂଆ ଲହରର ସଙ୍କେତକୁ ଦେଖୁଛୁ । ବାୟୁ ବିବିଧତା ବିଭିନ୍ନ ଅଞ୍ଚଳରେ ଏହି ସମସ୍ୟା ଦେଖାଦେଇଛି । ଆଉ ଏହି ଅଞ୍ଚଳରେ ହିଁ ଅନେକ ପ୍ରଜାତିର ପକ୍ଷୀ ସଙ୍କଟଗ୍ରସ୍ତ ଅଛନ୍ତି ।
ଅଧ୍ୟୟନରୁ ଜଣାପଡିଛି, ସାରା ବିଶ୍ୱରେ ପକ୍ଷୀଙ୍କର ବିଭିନ୍ନ ପ୍ରଜାତି ଥିବା ବେଳେ ସେଥିରୁ ୪୮ ପ୍ରତିଶତ ବର୍ତ୍ତମାନ ସଙ୍କଟରେ ଅଛନ୍ତି । ୩୯ ପ୍ରତିଶତ ପକ୍ଷୀଙ୍କର ଅବସ୍ଥା ସ୍ଥିରରହିଛି । କେବଳ ମାତ୍ର ୬ ପ୍ରତିଶତ ପକ୍ଷୀଙ୍କ ସଂଖ୍ୟା ବଢୁଛି । ଆଉ ବାକି ରହିଥିବା ୭ ପ୍ରତିଶତ ପ୍ରଜାତିଙ୍କ ସଂଖ୍ୟା ବିଷୟରେ ତଥ୍ୟ ମିଳିପାରିନାହିଁ । ଏହି ଗବେଷଣା ବେଳେ ବିଭିନ୍ନ ପ୍ରଜାତିର ୧୧ ହଜାର ପକ୍ଷୀଙ୍କୁ ଅନୁଧ୍ୟାନ କରାଯାଇଥିଲା ।ଏହି ରିପୋର୍ଟ ୨୦୧୯ରେ ହୋଇଥିବା ରିପୋର୍ଟର ତଥ୍ୟ ଭଳି ସମାନ ରହିଛି । ଯେଉଁଥିରେ ଜଣାପଡିଥିଲା ଆମେରିକା, କାନାଡାରେ ଗତ ୫୦ ବର୍ଷରେ ପାଖାପାଖି ୩ଅରବ ପକ୍ଷୀ ବିଲୁପ୍ତ ହୋଇଛନ୍ତି । ସେହିଭଳି ରିସର୍ଚ୍ଚରୁ ପକ୍ଷୀଙ୍କ ଜନସଂଖ୍ୟା କମ ହେବା କିମ୍ବା ବିଲୁପ୍ତ ହେବାର କାରଣ ସାମ୍ନାକୁ ଆସିଛି । ପରିବେଶ ଆମ ସ୍ୱାସ୍ଥ୍ୟର ଗୋଟିଏ ସମ୍ବେଦନଶୀଳ ଅଂଶ । ଏଣୁ ଏହାର ଜୈବବିବିିଧତାକୁ ହରାଇବାର ଅର୍ଥ ଆମ ପରିବେଶ ତଥା ମାନବ ସ୍ୱାସ୍ଥ୍ୟ ପାଇଁ ବଡ ସଙ୍କଟକୁ ଡାକିଆଣିବା ।
ଅଧ୍ୟୟନ ବେଳେ ଯେଉଁ ତଥ୍ୟ ସାମ୍ନାକୁ ଆସିଛି ତାକୁ ନେଇ ଅନୁସନ୍ଧାନକାରୀ କହିଛନ୍ତି, ପକ୍ଷୀଙ୍କ ବଂଶକୁ ସଂରକ୍ଷଣ କରିବା ପାଇଁ ଯେଉଁ ପଦକ୍ଷେପ ନିଆଯାଉଛି ସେଠାରୁ ଅନେକ ଆଶା ରହିଛି । ଏଥିପାଇଁ ଅନେକ ପରିବର୍ତ୍ତନର ଆବଶ୍ୟକତା ମଧ୍ୟ ରହିଛି । ପକ୍ଷୀମାନଙ୍କର ଭବିଷ୍ୟତ ସେମାନଙ୍କ ଆବାସ କମିବା ଏବଂ ନଷ୍ଟ ହେବାକୁ ରୋକିବା ପରେ ହିଁ ସେମାନଙ୍କୁ ବଞ୍ଚାଯାଇପାରିବ । ପ୍ରାକୃତିକ ସମ୍ପଦକୁ ନଷ୍ଟ ହେବାରୁ ରୋକିପାରିଲେ ଆମେ ପକ୍ଷୀମାନଙ୍କୁ ବଞ୍ଚାଇପାରିବା । ପକ୍ଷୀ ମାନେ ରହିଲେ ହିଁ ଆମ ପରିବେଶ ସୁନ୍ଦର ରହିବ । ତେଣୁ ଆସନ୍ତୁ ଆମ ପୁରୁଣା ପୃଥିବୀକୁ ଫେରାଇ ଆଣିବାକୁ ଚେଷ୍ଟା କରିବା । ପୁନଶ୍ଚ ପୃଥିବୀ ଗଢିବାରେ ସଙ୍କଳ୍ପ ନେବା ।