ନିଜ ଦଳ ବିରୋଧରେ ବିଦ୍ରୋହ କରି ଗଠନ କଲେ ନୂଆ ଦଳ, ଜେଲରୁ ଆସିବା ପରେ ହେଲେ ମୁଖ୍ୟମନ୍ତ୍ରୀ । ଏବେ ପୁଣିଥରେ ସିକ୍କିମରେ ଗଢିବାକୁ ଯାଉଛନ୍ତି ସରକାର । ଜାଣନ୍ତୁ, କିଏ ପ୍ରେମ ସିଂହ ତମାଙ୍ଗ?
କନକ ବ୍ୟୁରୋ: ସିକ୍କିମରେ ପୁଣିଥରେ ‘ସିକ୍କିମ କ୍ରାନ୍ତିକାରୀ ମୋର୍ଚ୍ଚା’ ସରକାର ଗଢିବାକୁ ଯାଉଥିବା ଦେଖିବାକୁ ମିଳୁଛି । ଏଠାରେ ୩୨ ସିଟରୁ ୩୧ଟି ସିଟରେ ଦଳ କ୍ଲିନ୍ ସ୍ୱିପ୍ କଲା ଭଳି ଟ୍ରେଣ୍ଡ ସାମ୍ନାକୁ ଆସୁଛି । କେବଳ ଗୋଟିଏ ସିଟରେ ବର୍ତ୍ତମାନ ସୁଦ୍ଧା ଏସଡିଏଫର ପ୍ରାର୍ଥୀ ଆଗୁଆ ଅଛନ୍ତି । ଅନ୍ୟପଟେ ବିଜେପି ଏବଂ କଂଗ୍ରେସ ଏଠାରେ ଖାତା ଖୋଲିପାରିନାହାଁନ୍ତି । ତେବେ ଗୁରୁତ୍ୱପୂର୍ଣ୍ଣ କଥା ହେଲା, ଯଦି ପୁଣିଥରେ ଏଠାରେ ସିକ୍କିମ କ୍ରାନ୍ତିକାରୀ ମୋର୍ଚ୍ଚା ସରକାର ଗଢେ, ତେବେ ମୁଖ୍ୟମନ୍ତ୍ରୀ ଆସନରେ ବସିବେ ବର୍ତ୍ତମାନ ରାଜ୍ୟର ମୁଖ୍ୟମନ୍ତ୍ରୀ ଥିବା ପ୍ରେମ ସିଂହ ତମାଙ୍ଗ । ଲଗାତାର ଦ୍ୱିତୀୟ ଥର ପାଇଁ ସେ ମୁଖ୍ୟମନ୍ତ୍ରୀ ଆସନରେ ବସିପାରନ୍ତି ।
Kanak News is now on WhatsApp
Join and get latest news updates delivered to you via WhatsApp
ପ୍ରେମ ସିଂହ ତମାଙ୍ଗ କିଏ?
ଚାମଲିଙ୍ଗଙ୍କ ଏସଡିଏଫ ଦଳରେ ଜଣେ ଟାଣୁଆ ନେତା ଥିଲେ ପ୍ରେମ ସିଂହ ତମାଙ୍ଗ । ହେଲେ ୨୦୧୩ ମସିହାରେ ନିଜ ଦଳ ବିରୋଧରେ ବିଦ୍ରୋହ କରି ନିଜ ଦଳ ଗଢିଥିଲେ ତମାଙ୍ଗ । ଏସଡିଏଫ ବିରୋଧରେ ଭ୍ରଷ୍ଟାଚାର ଏବଂ ଦୁର୍ନୀତି ଅଭିଯୋଗ ଆଣିଥିଲେ ତମାଙ୍ଗ । ଆଉ ଦଳ ଗଠନର ଗୋଟିଏ ବର୍ଷ ପରେ ହିଁ ବିଧାନସଭା ନିର୍ବାଚନରେ ସେ ସଫଳତା ପାଇବା ସହିତ ୧୦ଟି ସିଟ୍ ଜିତିବାକୁ ସକ୍ଷମ ହେଇଥିଲେ ।
୧୯୬୮ ମସିହା ଫେବ୍ରୁଆରୀ ୫ ତାରିଖରେ ଜନ୍ମଗ୍ରହଣ କରିଥିବା ପ୍ରେମ ସିଂହ ତମାଙ୍ଗ ଦାର୍ଜିଲିଂର ଏକ କଲେଜରୁ ବିଏ ପାସ୍ କରିଥିଲେ । ଏହାପରେ ସେ ଏକ ସରକାରୀ ସ୍କୁଲରେ ଶିକ୍ଷକ ଭାବେ କାମ କରିବା ଆରମ୍ଭ କରିଥିଲେ । ହେଲେ ସେତେବେଳେ ସମାଜସେବା ପାଇଁ ସେ ମାତ୍ର ୩ ବର୍ଷ ପରେ ସେ ସରକାରୀ ଚାକିରି ଛାଡି ଦେଇଥିଲେ । ତେବେ ୧୯୯୪ ମସିହାରୁ ସେ ଲଗାତାର ୫ଥର ସିକ୍କିମ ବିଧାନସଭାକୁ ନିର୍ବାଚିତ ହେଇଥିଲେ । ଏମିତିକି ୨୦୦୯ରେ ସେ ଏସଡିଏଫ୍ ସରକାରରେ ମନ୍ତ୍ରୀ ରହିଥିଲେ ।
ଏସଡିଏଫ୍ ସରକାରର ଚତୁର୍ଥ କାର୍ଯ୍ୟକାଳ(୨୦୦୯-୧୪)ରେ ଚାମଲିଙ୍ଗ ତାଙ୍କୁ ମନ୍ତ୍ରୀ ପଦ ଦେବାକୁ ମନା କରିଦେଇଥିଲେ । ଆଉ ଏହାପରେ ପ୍ରେମ ସିଂହ ତମାଙ୍ଗ ଦଳ ଛାଡିଦେବା ସହ ନିଜ ଦଳ ଗଢିଥିଲେ । ଏସଡିଏଫର ସବୁ ପଦରୁ ଇସ୍ତଫା ଦେବା ସହିତ ଏସକେଏମ୍ ଦଳର ମୁଖିଆ ହେଇଥିଲେ ପ୍ରେମ ସିଂହ ତମାଙ୍ଗ ।
୨୦୧୬ରେ ଯାଇଥିଲେ ଜେଲ୍
୨୦୧୬ ମସିହାରେ ତମାଙ୍ଗ ସରକାରୀ ପଇସା ହେରଫେର୍ ଘଟଣାରେ ଦୋଷୀ ସାବ୍ୟସ୍ତ ହେବା ସହିତ, ତାଙ୍କ ବିଧାନସଭା ସଦସ୍ୟତା ମଧ୍ୟ ରଦ୍ଦ କରିଦିଆଯାଇଥିଲା । ଏହାପରେ ସେ ସିକ୍କିମ ହାଇକୋର୍ଟରେ ଏହାକୁ ଚ୍ୟାଲେଞ୍ଜ କରିଥିଲେ । ହେଲେ ହାଇକୋର୍ଟ ମଧ୍ୟ ରାୟକୁ କାଏମ୍ ରଖିଥିଲେ । ଯାହା ପରେ ତାଙ୍କୁ ଜେଲ୍ ଯିବାକୁ ପଡିଥିଲା । ତେବେ ୨୦୧୮ରେ ସେ ଜେଲରୁ ବାହାରିଥିଲେ । ଆଉ ସେତେବେଳେ ତାଙ୍କର ହଜାର ହଜାର ସମର୍ଥକ ତାଙ୍କୁ ସ୍ୱାଗତ କରିଥିଲେ ।
୨୦୧୯ ମସିହା ସିକ୍କିମ ବିଧାନସଭା ନିର୍ବାଚନରେ ପ୍ରଥମ କରି ସତ୍ତାକୁ ଆସିଥିଲେ ପ୍ରେମ ସିଂହ ତମାଙ୍ଗ । ଦୀର୍ଘ ବର୍ଷର ଚାମଲିଙ୍ଗ ସରକାରକୁ ହରେଇ ସେ ସରକାର ଗଠନ କରିଥିଲେ । ୨୦୧୯ରେ ସେ ୧୭ଟି ସିଟ୍ ଜିତିବା ସହ ମୁଖ୍ୟମନ୍ତ୍ରୀ ଆସନରେ ବସିଥିଲେ । ଆଉ ଏଥର ସେ ୩୨ରୁ ୩୧ ଆସନ ଜିତିପାରନ୍ତି ବୋଲି ଟ୍ରେଣ୍ଡରୁ ଅନୁମାନ କରାଯାଉଛି ।