୧୫ ଜୁନ୍ ପରେ ଦେଶରେ ପୁଣି ହେବ କି ସମ୍ପୂର୍ଣ୍ଣ ଲକଡାଉନ? ଜାଣନ୍ତୁ ଭାଇରାଲ ହେଉଥିବା ମେସେଜର ସତ କଣ?

କରୋନା ମହାମାରୀର ମୁକାବିଲା ପାଇଁ ଦେଶରେ ୪ଟି ପର୍ଯ୍ୟାୟରେ ଲକଡାଉନ ଘୋଷଣା କରାଯାଇଥିବା ବେଳେ ଜୁନ୍ ୧ରୁ ଅନଲକ-୧ ଘୋଷଣା କରିଥିଲେ କେନ୍ଦ୍ର ସରକାର । ଜୀବନ ସହ ଜୀବିକାକୁ ଗୁରୁତ୍ୱ ଦେଇ ଅନଲକ-୧ରେ ଲକଡାଉନର ଅନେକ କଟକଣାକୁ କୋହଳ କରାଯାଇଥିଲା । କିନ୍ତୁ ଦେଶରେ ଅନଲକ-୧ ଲାଗୁ ହେବା ପରେ କରୋନା ସଂକ୍ରମଣ ପୂର୍ବପେକ୍ଷା ଅଧିକ ବଢିଛି । ଆଉ ଏଭଳି ସମୟରେ ସୋସିଆଲ ମିଡିଆରେ ପୁଣିଥରେ ଲକଡାଉନକୁ ନେଇ ଏକ ଖବର ଜୋରଦାର ଭାଇରାଲ ହେବାରେ ଲାଗିଛି । ସୋସିଆଲ ମିଡିଆରେ ଭାଇରାଲ ହେଉଥିବା ମେସେଜରେ କୁହାଯାଇଛି ଯେ, ଦେଶର ପୁର୍ନବାର ସମ୍ପୂର୍ଣ୍ଣ ଲକଡାଉନ ଘୋଷଣା ହୋଇପାରେ ।

ଏକ ନିର୍ଦ୍ଦିଷ୍ଟ ଜାତୀୟ ଗଣମାଧ୍ୟମର ଲୋଗୋ ଥିବା ଏକ ମେସେଜ ଭାଇରାଲ ହେବାରେ ଲାଗିଛି । ଯେଉଁଥିରେ ପୁଣିଥରେ ସମ୍ପୂର୍ଣ୍ଣ ଲକଡାଉନ ହୋଇପାରେ ବୋଲି କୁହାଯାଇଛି । ଆଉ ଏହି ମେସେଜ ଭାଇରାଲ ହେବା ପରେ ଲୋକଙ୍କର ଚିନ୍ତା ବଢିଯାଇଛି । କିନ୍ତୁ ଏହି ମେସେଜର ସତ୍ୟତା ଉପରୁ ପରଦା ଉଠାଇଛି ପିଆଇବି ଫ୍ୟାକ୍ଟ ଚେକ୍ । ଫେକ୍ ନ୍ୟୁଜ୍ ଭାଇରାଲ କରୁଥିବା ବ୍ୟକ୍ତି ଏଥିପ୍ରତି ସାବଧାନ ରୁହନ୍ତୁ ବୋଲି କୁହାଯାଇଛି । ଏଭଳି ମିଥ୍ୟା ମେସେଜ ଭାଇରାଲ କରିବା ଆଇନତଃ ଅପରାଧ । ଏଭଳି ମେସେଜ ଭାଇରାଲ କରୁଥିବା ବ୍ୟକ୍ତିଙ୍କ ବିରୋଧରେ ପୋଲିସ ମାମଲା ରୁଜୁ କରି ଗିରଫ କରିପାରିବ ପୋଲିସ ।

ଏହାପୂର୍ବରୁ ରାଜ୍ୟରେ ମଧ୍ୟ ସଟଡାଉନ ଅବଧି ବୃଦ୍ଧି ହେବା ନେଇ ସୋସିଆଲ ମିଡିଆରେ ଖବର ଭାଇରାଲ ହୋଇଥିଲା । କିନ୍ତୁ ଏହାକୁ ପରବର୍ତ୍ତୀ ସମୟରେ ଖଣ୍ଡନ କରିଥିଲେ ସ୍ୱତନ୍ତ୍ର ରିଲିଫ୍ କମିଶନର ପ୍ରଦୀପ ଜେନା । ପୂର୍ବ ନିର୍ଦ୍ଧାରିତ ୧୧ ଜିଲ୍ଲାରେ ଶନି-ରବି ସଟଡାଉନ ରହିବ । ତେଣୁ କୌଣସି ଗୁଜବକୁ ବିଶ୍ୱାସ ନକରିବାକୁ କହିଥିଲେ ପ୍ରଦୀପ । ଏପରିକି ଅଯଥାରେ ଲୋକେ ଭୟଭୀତ ନହୋଇ କୌଣସି ଜିନିଷପତ୍ର କିଣନ୍ତୁ ନାହିଁ ବୋଲି ଟ୍ୱିଟ୍ କରି ଅନୁରୋଧ କରିଥିଲେ ପ୍ରଦୀପ ।