ଅଧିନାୟକ ଭାବେ କେମିତି ଥିଲା କୋହଲିଙ୍କ ଟି-୨୦ କ୍ୟାରିୟର?
କନକ ବ୍ୟୁରୋ: ଟି-୨୦ ଦଳର ଅଧିନାୟକ ପଦରୁ ଓହରିବା ନେଇ ନିଷ୍ପତ୍ତି ନେଇସାରିଛନ୍ତି ଭାରତୀୟ କ୍ରିକେଟ ଦଳର ଅଧିନାୟକ ବିରାଟ କୋହଲି । ଆଇସିସି ଟି-୨୦ ବିଶ୍ୱକପ୍ ପରେ ସେ ଭାରତୀୟ କ୍ରିକେଟ ଦଳର ଟି-୨୦ ଅଧିନାୟକ ପଦରୁ ଅବସର ନେବେ । ତେବେ ଟି-୨୦ରେ ଅଧିନାୟକ ଭାବେ ବିରାଟ କୋହଲିଙ୍କ ପ୍ରଦର୍ଶନ କିପରି ଥିଲା ସେ ଉପରେ ଥରେ ନଜର ପକାନ୍ତୁ…
Kanak News is now on WhatsApp
Join and get latest news updates delivered to you via WhatsApp
ମହେନ୍ଦ୍ର ସିଂହ ଧୋନୀଙ୍କ ପରେ ଟିମ୍ ଇଣ୍ଡିଆର ଅଧିନାୟକ ଭାର କୋହଲିଙ୍କ ଉପରକୁ ଆସିଥିଲା । ଏହାପରଠାରୁ କୋହଲି ମୋଟ ୪୫ଟି ଅନ୍ତର୍ଜାତୀୟ ଟି-୨୦ ମ୍ୟାଚରେ ଭାରତୀୟ ଦଳର ଅଧିନାୟକ ରହିଥିଲେ । ସେ ଭିତରୁ ସେ ୨୫ଟି ମ୍ୟାଚରେ ଜିତାପଟ ହାସଲ କରିଥିବାବେଳେ ୧୪ଟି ପରାଜୟ ଭୋଗିଥିଲେ । ତା ଭିତରୁ ଦୁଇଟି ମୁକାବିଲା ଡ୍ର ହୋଇଥିବାବେଳେ ଗୋଟିଏ ବାତିଲ ହୋଇଥିଲା । ଅଧିନାୟକ ଭାବେ କୋହଲିଙ୍କ ଜିତ୍ ପ୍ରତିଶତ ୬୫.୧୧ ପ୍ରତିଶତ ରହିଥିଲା ।
ଟି-୨୦ ଦଳର ଅଧିନାୟକ ଭାବେ କୋହଲି ପ୍ରଥମ ଥର ପାଇଁ ଆଇସିସି ବିଶ୍ୱକପ୍ ଖେଳିବେ । ଯାହାକି ଅଧିନାୟକ ଭାବେ ତାଙ୍କର ଶେଷ ଟି-୨୦ ବିଶ୍ୱକପ୍ ହେବ । ଏହାପୂର୍ବରୁ ସମସ୍ତ ଟି-୨୦ ବିଶ୍ୱକପରେ ଧୋନୀ ହିଁ ଦଳର ନେତୃତ୍ୱ ନେଉଥିଲେ । କୋହଲି ନେତୃତ୍ୱ ନେବା ପରଠାରୁ ଭାରତ ଆଇସିସି ଟି-୨୦ ବିଶ୍ୱକପ୍ ଖେଳିନାହିଁ । ତେଣୁ ତାଙ୍କ ଅଧିନାୟକ ଭାବେ ଏହି ଟି-୨୦ ବିଶ୍ୱକପ ହେବ କୋହଲିଙ୍କ ଶେଷ ଟି-୨୦ ବିଶ୍ୱକପ୍ ।
ଅନ୍ୟପଟେ କୋହଲିଙ୍କ ପରେ ଟିମ୍ ଇଣ୍ଡିଆର କ୍ୟାପଟେନ୍ କିଏ ହେବ,ସେ ନେଇ ମଧ୍ୟ ଚର୍ଚ୍ଚା ବଢିଛି । ରୋହିତ ଶର୍ମା ଏଯାବତ ୧୯ଟି ଟି-୨୦ ମ୍ୟାଚରେ ଭାରତୀୟ ଦଳର ଅଧିନାୟକତ୍ୱ କରିଛନ୍ତି । ଯେଉଁଥିରେ ୧୫ଟି ମ୍ୟାଚରେ ଦଳ ଜିତିଥିବାବେଳେ ୪ଟି ପରାଜୟ ବରଣ କରିଛି । ଟି-୨୦ ମ୍ୟାଚରେ ଅଧିନାୟକ ଭାବେ ରୋହିତଙ୍କ ଜିତ୍ ପ୍ରତିଶତ ରହିଛି ୭୮.୯୪ ପ୍ରତିଶତ । ତେଣୁ କୋହଲିଙ୍କ ପରେ ତାଙ୍କୁ ଦଳର ଅଧିନାୟକ ପଦ ମିଳିବା ନେଇ ଚର୍ଚ୍ଚା ହେଉଛି ।
ସୂଚନାଯୋଗ୍ୟ ଯେ, ବିଶ୍ୱ ଟେଷ୍ଟ ଚାମ୍ପିୟନସିପ୍ ଫାଇନାଲ ପରାଜୟ ପରେ କୋହଲିଙ୍କ ଅଧିନାୟକତ୍ୱକୁ ନେଇ ପ୍ରଶ୍ନ ଉଠିଥିଲା । କ୍ରିକେଟ୍ ବିଶେଷଜ୍ଞମାନେ ତାଙ୍କ ବଦଳରେ ରୋହିତଙ୍କୁ ଦଳର ଅଧିନାୟକ ପଦ ଦେବାକୁ ପରାମର୍ଶ ଦେଇଥିଲେ । ଆଉ ଏବେ କୋହଲିଙ୍କ ଅଧିନାୟକ ପଦରୁ ଓହରିବା ସହିତ ରୋହିତଙ୍କୁ ଏହି ପଦ ମିଳିବା ଏକ ପ୍ରକାରର ପକ୍କା ହୋଇଛି ।