କନକ ବ୍ୟୁରୋ: ଗୋଟିଏ ଦେଶର ରାଷ୍ଟ୍ରପତି କିମ୍ବା ପ୍ରଧାନମନ୍ତ୍ରୀଙ୍କ ବାସଭବନକୁ ଦେଶର ସବୁଠାରୁ ସୁରକ୍ଷିତ ଛାତ ବୋଲି କୁହାଯାଏ । କିନ୍ତୁ ଆଜି ଆମେ ଏମିତି ଏକ କୋଠା ବିଷୟରେ କହିବୁ ଯାହା କୌଣସି ରାଷ୍ଟ୍ରପତି କି ପ୍ରଧାନମନ୍ତ୍ରୀଙ୍କ ବାସଭବନ ହୋଇନଥିଲେ ବି ତାକୁ ଭେଦ କରିବା କାଠିକର ପାଠ । ଅଭେଦ୍ୟ ଦୁର୍ଗ, ସବୁଠାରୁ ଶକ୍ତ ଏବଂ ଅତ୍ୟାଧୁନିକ କୌଶଳରେ ନିର୍ମାଣ ହୋଇଛି ଏମିତି ଏକ କୋଠା ଯାହା ବିଷୟରେ ଆପଣ ଜାଣିଲେ ତାଜୁବ୍ ହୋଇଯିବେ ।
Kanak News is now on WhatsApp
Join and get latest news updates delivered to you via WhatsApp
ବିଶ୍ୱର ସବୁଠାରୁ ଶକ୍ତିଶାଳୀ ରାଷ୍ଟ୍ରରେ ଲୁଚି ରହିଥିବା ଏକ ରହସ୍ୟମୟ କୋଠାର କାହାଣୀ କୌଣସି ଫିଲ୍ମଠାରୁ କମ୍ ନୁହେଁ । କାରଣ ବିଶ୍ୱର ସବୁଠାରୁ ସୁରକ୍ଷିତ ଛାତ କୁହାଯାଉଥିବା ହ୍ୱାଇଟହାଉସ ଠାରୁ ବି ଏହି କୋଠା ବେଶ୍ ସୁରକ୍ଷିତ । ଯେଉଁଠି କୋଟି କୋଟି ଟଙ୍କାର ସୁନା ଗହଣା ଆଉ ମୂଲ୍ୟବାନ ଜିନିଷ ସାଇତା ହୋଇ ରଖାଯାଇଛି । ତାକୁ ସୁରକ୍ଷିତ ରଖିବା ପାଇଁ ଆମେରିକୀୟ ସେନା ଦିନରାତି କଡ଼ାପହରା ଦେଉଛନ୍ତି । ଆଉ ସେ ରହସ୍ୟମୟ କୋଠାର ନାଁ ହେଉଛି ‘ଫର୍ଟ ନକ୍ସ’ । କୁହାଯାଏ ଆମେରିକାର ସବୁଠୁ ସୁରକ୍ଷିତ ଘରମାନଙ୍କ ଭିତରୁ ଏହା ଗୋଟିଏ । ଏହାର ସୁରକ୍ଷା ପାଇଁ ହେଲିକପ୍ଟରଠାରୁ ଆରମ୍ଭ କରି ପ୍ରାୟ ୩୦ ହଜାର ଆମେରିକୀୟ ସୈନ୍ୟ ନିୟୋଜିତ ହୋଇଛନ୍ତି । ତା ସହ ଏହା ଉପରେ ଆଧୁନିକ ସିସିଟିଭି କ୍ୟାମେରାର ମଧ୍ୟ ୨୪ ଘଣ୍ଟିଆ ନଜର ରହିଥାଏ ।
ତେବେ ଆପଣ ଭାବୁଥିବେ କାହିଁକି ଏହି କୋଠାକୁ ଏତେ ସୁରକ୍ଷା ଭିତରେ ରଖାଯାଇଛି । ୟା ଭିତରେ ଏମିତି କଣ ଅଛି ଯେ ଏହି କୋଠାକୁ ଏତେ ସୁରକ୍ଷା ଦିଆଯାଉଛି । ଏହାର ଉତ୍ତର ହେଲା, ଏହି ଅଭେଦ୍ୟ କୋଠା ଭିତରେ ପାଖାପାଖି ୪୨ ଲକ୍ଷ କିଲୋରୁ ଅଧିକ ଓଜନର ସୁନା ଗଚ୍ଛିତ କରି ରଖାଯାଇଛି । କୁହାଯାଏ ଆମେରିକାରେ ଯେିତିକି ସୁନା ଅଛି ତା ଭିତରୁ ପ୍ରାୟ ଅଧା ସୁନା ଏହି କୋଠା ଭିତରେ ହିଁ ଅଛି । ଯେଉଁ କାରଣରୁ ଏହି କୋଠାକୁ ଏକ ଅଭେଦ୍ୟ ଦୁର୍ଗ ଭାବେ ଗଢାଯାଇଛି । ଖାଲି ସେତିକି ନୁହେଁ କୋଟି କୋଟି ଟଙ୍କାର ସୁନା ସହିତ ଏହି କୋଠା ଭିତରେ ଆହୁରି ବି ଅନେକ ଗୁରୁତ୍ୱପୂର୍ଣ୍ଣ କାଗଜପତ୍ର ରହିଛି । ଆମେରିକା ସ୍ୱାଧୀନତାର ଘୋଷଣା ପତ୍ର ଠାରୁ ଆରମ୍ଭ କରି ଆମେରିକା ସମ୍ବିଧାନର ଅସଲ କପିକୁ ଏହି କୋଠା ଭିତରେ ସାଇତି କରି ରଖାଯାଇଛି । ଯେଉଁ କାରଣରୁୁ ଆମେରିକାର ଟ୍ରେଜେରୀ ବିଭାଗ ଏହାକୁ ଏପରି ଏପରି କଡା ସୁରକ୍ଷା ଭିତରେ ରଖିଛି ।
୧୯୩୬ ମସିହାରେ ଏହି କୋଠାକୁ ନିର୍ମାଣ କରାଯାଇଥିଲା । ଏହାର ଚାରିପାଖରେ ଗ୍ରାନାଇଟରେ ପାଚେରୀ ନିର୍ମାଣ ହୋଇଛି । ଯାହାକୁ ପାର୍ କରିବା କୌଣସି ଲୁଟେରା ପାଇଁ କାଠିକର ପାଠ ହୋଇପାରେ । ଏହାସହ ଏହି ଘରର କବାଟ ଗୁଡିକ ୨୦ ଟନରୁ ଅଧିକ ଓଜନର ହୋଇଥିବାବେଳେ ଏହାକୁ ଭାଙ୍ଗିବା କାହା ପାଇଁ ବି ମୁସ୍କିଲ୍ ହୋଇପାରେ । ଭୂମିକମ୍ପ ହେଉଁ ବା କିଛି ବି ପ୍ରାକୃତିକ ବିପଦ ଏହାର କୌଣସି ବି ପ୍ରଭାବ ଏହା ଉପରେ ପଡିବନି ।
ଆପଣ ଜାଣିଲେ ଆଶ୍ଚର୍ଯ୍ୟ ହେବେ ଆଜି ବି ଏହି କୋଠା ଭିତରେ କେଉଁଠି ସୁନା ଅଛି ଆଜି ବି ତା ଅନେକ ଲୋକଙ୍କୁ ଅଜଣା । ଏହି କୋଠାକୁ ଖୋଲିବା ପାଇଁ ଏକ ସ୍ୱତନ୍ତ୍ର ପାସୱାଡ୍ ରହିଛି । ଆଉ ଏହି ପାସୱାଡ ଦୁଇ ଭାଗ ହୋଇ ଦୁଇ ଜଣ ଲୋକଙ୍କ ପାଖରେ ଅଛି । ଏହି ଦୁଇ ଜଣ ଲୋକ କିଏ ତାହା ସେମାନେ ନିଜେ ହିଁ ଜାଣିନଥାନ୍ତି । ଯେଉଁ କାରଣରୁ ଏହାକୁ ବିଶ୍ୱର ଏକ ସୁରକ୍ଷିତ କୋଠା ବୋଲି କୁହାଯାଏ ।