ସିଡନୀର ମଲରେ ଛୁରାମାଡ ଓ ଗୁଳିମାଡ, ୫ ଜଣ ଲୋକଙ୍କର ମୃତ୍ୟୁ । ପୋଲିସ ଗୁଳିରେ ଆକ୍ରମଣକାରୀ ମୃତ ସୂଚନା !

କନକ ବ୍ୟୁରୋ : ଅଷ୍ଟ୍ରେଲିଆର ଏକ ସପିଙ୍ଗ ମଲରେ ଛୁରାମାଡ ଘଟଣା ସାମ୍ନାକୁ ଆସିଛି । ଯେଉଁଥିରେ ୫ ଜଣଙ୍କର ମୃତ୍ୟୁ ହୋଇଥିବା ବେଳେ ଅନେକ ଗୁରୁତର ଆହତ ହୋଇଛନ୍ତି । ମିଳିଥିବା ସୂଚନା ମୁତାବକ, ୱେଷ୍ଟଫିଲ୍ଡ ବଣ୍ଡି ଜଙ୍କସନ ସପିଙ୍ଗ ସେଣ୍ଟରରେ ଏହି ଆକ୍ରମଣ ହୋଇଛି । କେବଳ ଛୁରାମାଡ ନୁହେଁ ବରଂ ସପିଂ ମଲ ଭିତରେ ଗୁଳି ଶବ୍ଦ ମଧ୍ୟ ଶୁଣିବାକୁ ମିଳିଛି । ପୋଲିସ ଘଟଣାସ୍ଥଳରେ ପହଞ୍ଚି ଲୋକଙ୍କୁ ଉଦ୍ଧାର କରିଛି । କେବଳ ଏତିକି ନୁହେଁ ପୋଲିସ ଗୁଳିରେ ଆକ୍ରମଣକାରୀର ମୃତ୍ୟୁ ହୋଇଥିବା ପ୍ରତ୍ୟକ୍ଷଦର୍ଶୀ କହିଛନ୍ତି ।

ପ୍ରତ୍ୟକ୍ଷଦର୍ଶୀଙ୍କ କହିବା ଅନୁଯାୟୀ, ଛୁରାମାଡ ପରେ ଅନେକ ଦୋକାନୀ ଜୀବନ ବଞ୍ଚାଇବାକୁ ସଂଘର୍ଷ କରୁଥିବାର ଦେଖିବାକୁ ମିଳିଛି । ପୂରା ମଲରେ ରକ୍ତ ଛିଟା ଦେଖିବାକୁ ମିଳିଛି । ଲୋକଙ୍କୁ ମଲଠାରୁ ଦୂରେଇ ରଖାଯାଇଥିବା ବେଳେ ଏ ବାବଦରେ ପୋଲିସ ଯାଞ୍ଚ ଆରମ୍ଭ କରିଛି । ଏଭଳି ଆକ୍ରମଣ ପରେ ସ୍ଥାନୀୟ ଲୋକଙ୍କ ମଧ୍ୟରେ ଭୟର ବାତାବରଣ ଖେଳି ଯାଇଛି । ପୋଲିସର କହିବା ଅନୁଯାୟୀ, ଆହତ ହୋଇଥିବା ଲୋକଙ୍କ ମଧ୍ୟରୁ ଅନେକଙ୍କ ଅବସ୍ଥା ଗୁରୁତର ରହିଛି ।