ଆରୟନ ଡ୍ରଗ୍ସ କେସ ମାମଲାର ସାକ୍ଷୀ କିରଣ ଗୋସାଭି ଗିରଫ : ଗୋସାଭିକୁ ବାନ୍ଧିଲା ପୁଣେ ପୁଲିସ
ସେପଟେ ଆଜି ମୁୁମ୍ବାଇ ହାଇକୋର୍ଟରେ ପୁଣି ହେବ ଆରୟନଙ୍କ ଜାମିନ୍ ଶୁଣାଣି
କନକ ବ୍ୟୁରୋ : ମୁମ୍ବାଇ ଡ୍ରଗ୍ସ ମାମଲାର ସାକ୍ଷୀ କିରଣ ଗୋସାଭିଙ୍କୁ ପୁଲିସ ଗିରଫ କରିଛି । ଗୋସାଭି କିଛି ଦିନ ହେଲା ଫେରାର ଥିଲେ । ମହାରାଷ୍ଟ୍ରର ପୁନେରୁ ସେ ଗିରଫ ହୋଇଛନ୍ତି । ଡ୍ରଗ୍ସ ମାମଲାରେ ମୁଖ୍ୟ ସାକ୍ଷୀ ପ୍ରଭାକର ସେଲ ଅଭିଯୋଗ କରିଥିଲେ ଯେ, ଆରୟନଙ୍କୁ ଛାଡିବା ଲାଗି କିରଣ ଗୋସାଭି ଡିଲ କରିଥିଲେ । ପ୍ରଭାକର ନିଜକୁ ଗୋସାଭିର ବଡିଗାର୍ଡ ବୋଲି ଦାବି କରୁଛନ୍ତି । ପ୍ରଭାକର କହିଥିଲେ, ପାର୍ଟିରେ ରେଡ ସମୟରେ ସେ ଗୋସାଭି ସହ ଥିଲେ ।
Kanak News is now on WhatsApp
Join and get latest news updates delivered to you via WhatsApp
ଏହି ସମୟରେ ଗୋସାଭି ଜଣେ ବ୍ୟକ୍ତିଙ୍କୁ ଫୋନ କରି ୨୫ କୋଟିରୁ ୧୮ କୋଟି ଯାଏଁ ଡିଲ୍ ଫିକ୍ସ କରିବା ପାଇଁ କଥା ହେଉଥିଲେ । ଏପରିକି ସେ ୮ କୋଟି ଟଙ୍କା ଏସନିବି ଅଧିକାରୀ ସମୀର ୱାଙ୍ଖେଡଙ୍କୁ ଦେବା କଥା କୁହାଯାଉଥିଲା । କିରଣ ଗୋସାଭି ଆରୟନ ଖାନଙ୍କ ସହ ଏକ ସେଲଫିକୁ ସୋସିଆଲ ମିଡିଆରେ ଭାଇରାଲ କରିଥିଲେ । ଏହି ସମୟରେ ଗୋସାଭି ଏନସିବି ଅଧିକାରୀ ବୋଲି ସନ୍ଦେହ କରାଯାଉଥିଲା । ପରେ ଏନସିବି ପକ୍ଷରୁ ସ୍ପଷ୍ଟ କରାଯାଇଥିଲ ଯେ, ସେ ଏକ ପ୍ଲେସମେଂଟ ଏଜେନ୍ସିର ମାଲିକ । କିରଣ ଗୋସାଭି ଡ୍ରଗ୍ସ ମାମଲାରେ ୧୦ ଜଣ ସାକ୍ଷୀଙ୍କ ମଧ୍ୟରୁ ଜଣେ ବୋଲି ଜଣାପଡିଛି ।
ସେପଟେ, ଆରୟନ ଖାନଙ୍କୁ କେବେ ମିଳିବ ବେଲ୍ । ଜାମିନ ପାଇଁ ଦୁଇ ଦିନ ଶୁଣାଣି ପରେ ବି ଏହି ଷ୍ଟାରକିଡଙ୍କୁ ମିଳିନି ଜାମିନି । ଆଜି ପୁଣି ଥରେ ବମ୍ବେ ହାଇକୋର୍ଟରେ ହେବ ଶୁଣାଣି । ଆରୟନଙ୍କ ପକ୍ଷ ରଖୁଛନ୍ତି ବରିଷ୍ଠ ଆଇନଜୀବି ମୁକୁଲ ରହତଗୀ । ଆରୟନଙ୍କ ଗିରଫ ଦାରୀକୁ ବେଆଇନ୍ ଦର୍ଶାଇବା ସହ ତାଙ୍କୁ ଜାମିନ୍ ଦେବାକୁ ଗତକାଲି କୋର୍ଟଙ୍କ ନିକଟରେ ନିବେଦନ କରିଥିଲେ ରହତଗୀ । ଆରୟନ ଖାନଙ୍କୁ ଗତ ୩ ତାରିଖରୁ ଗିରଫ କରିଛି ଏନସିବି । ସମୁଦ୍ର ମଝିରେ କ୍ରୁଜରେ ଚାଲିଥିବା ଡ୍ରଗ୍ସ ପାର୍ଟିରେ ସାମିଲ ହୋଇଥିବାବେଳେ ତାଙ୍କୁ ଧରିଥିଲା ଏନସିବି । ଆରୟନଙ୍କ ନିକଟରୁ କୌଣସି ଡ୍ରଗ୍ସ ମିଳିନଥିଲେ ମଧ୍ୟ ତାଙ୍କ ବନ୍ଧୁ ଅରବାଜ ମର୍ଚାଂଟଙ୍କ ନିକଟରୁ ୬ ଗ୍ରାମ ଡ୍ରଗ୍ସ ଜବତ ହୋଇଥିବା ଦର୍ଶାଇଥିଲା ଏନସିବି । ଆରୟନ, ଅରବାଜଙ୍କ ସହ ଥିବାରୁ ତାଙ୍କୁ ଗିରଫ କରିଥିଲା । ତାପରେ ଆରୟନଙ୍କ ମୋବାଇଲ ଫୋନକୁ ସିଜ୍ କରିଥିଲା ଏନସିବି ।
ଏବଂ ତାପରେ ଆରୟନଙ୍କ ହ୍ୱାଟ୍ସଆପ୍ ଚାଟକୁ ଆଧାର କରି ତାଙ୍କ ବିରୋଧରେ ଆହୁରି ଦଫା ଲଗାଇଥିଲା ନାରକୋଟିକ୍ସ କଂଟ୍ରୋଲ ବ୍ୟୁରୋ । ସେହି ଚାଟକୁ ଆଧାର କରି ଅଭିନେତ୍ରୀ ଅନନ୍ୟା ପାଣ୍ଡେଙ୍କୁ ବି ସମନ କରିଥିଲା ଏନସିବି । ଆଉ ପଚରାଉଚୁରା କରିଥିଲା । ଆରୟନଙ୍କର ଇଂଟରନ୍ୟାସନାଲ ଡ୍ରଗ୍ସ ପେଡଲରଙ୍କ ସହ ସମ୍ପର୍କ ଥିବା ଚାଟରୁ ଜଣାପଡିଥିବା ଦାବି କରି ଆସୁଛି ଏନସିବି । ଆରୟନଙ୍କୁ ଜାମିନ ମିଳିଲେ ସେ ତଦନ୍ତକୁ ପ୍ରଭାବିତ କରିବାର ସମ୍ଭାବନା ଥିବା ଦର୍ଶାଇ ଜାମିନ ନଦେବାକୁ କୋର୍ଟରେ ଅପିଲ କରୁଛି । ଏନସିବିର ଦାବିକୁ ଯଥାର୍ଥ ଭାବି ଆରୟନଙ୍କୁ ଏପର୍ଯ୍ୟନ୍ତ ବେଲ୍ ଦେଇନାହାଁନ୍ତି କୋର୍ଟ । ତିନି ଦିନ ହେଲା ହାଇକୋର୍ଟରେ ଚାଲିଛି ଆରୟନଙ୍କ ଜାମିନ ଆବେଦନର ଶୁଣାଣି ।