କନକ ବ୍ୟୁରୋ : ବନ୍ଧୁକ ଦେଖାଇ ଜଣେ ଅବସରପ୍ରାପ୍ତ ଶିକ୍ଷକଙ୍କୁ ଅପହରଣ । ଶିକ୍ଷକ ଯେଉଁ କାରରେ ଆସୁଥିଲେ, ସେହି ଗାଡି ସହ ତାଙ୍କୁ ଅପହରଣ କରିନେଇଥିଲେ ଦୁବୃର୍ତ୍ତ, ହେଲେ ସୌଭାଗ୍ୟବଶତଃ ସେହି ଗାଡିଟି ଦୁର୍ଘଟଣାଗ୍ରସ୍ତ ହୋଇଥିଲା, ଫଳରେ ସ୍ଥାନୀୟ ଲୋକେ ପିଛା କରି ଅପହୃତ ଶିକ୍ଷକଙ୍କୁ ଉଦ୍ଧାର କରିବା ସହ ୨ ଦୁର୍ବୃତଙ୍କୁ କାବୁ କରିବାରେ ସକ୍ଷମ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଅପହରଣର ଶିକାର ହୋଇଥିବା ଅବସରପ୍ରାପ୍ତ ଶିକ୍ଷକ ଜଣକ ହେଉଛନ୍ତି କେନ୍ଦୁଝର ଜିଲ୍ଲା ତେଲକୋଇ ଥାନା କମଳାଙ୍ଗ ଗାଁର ରବିନ୍ଦ୍ର କୁମାର ସାହୁ । ସେ ଗତକାଲି ନିଜ କାର୍ ଯୋଗେ ଝାରସୁଗୁଡାରୁ ଘରକୁ ଫେରୁଥିବା ବେଳେ ଅପହରଣର ଶିକାର ହୋଇଥିଲେ । ସକାଳ ସାଢେ ୧୦ଟା ବେଳେ ଦେବଗଡ ଜିଲ୍ଲା ବାରକୋଟ୍ ଥାନା ଟୋଲଗେଟ ନିକଟରେ ସେ ଗାଡି ରଖି ପରିସ୍ରା କରୁଥିବା ବେଳେ ଏକ ବାଇକରେ ୩ ଜଣ ଯୁବକ ପହଂଚି ଶ୍ରୀ ସାହୁଙ୍କୁ ବନ୍ଧୁକ, ଭୂଜାଲି ଦେଖାଇ କାର୍ ପଛ ସିଟରେ ବସାଇ ଦେଇଥିଲେ । ତାଙ୍କ ଠାରୁ ମୋବାଇଲ, ପସ୍ ଏଟିଏମ୍ କାର୍ଡ ଛଡାଇ ନେଇ ବନ୍ଧୁକରେ ମୁଣ୍ଡର ପଛପଟକୁ ପିଟିଦେଇଥିଲେ । ଫଳରେ ମୁଣ୍ଡଫାଟି ପ୍ରବଳ ରକ୍ତସ୍ରାବ ହୋଇଥିଲା ।
ଶ୍ରୀ ସାହୁଙ୍କ ମୁଣ୍ଡରେ ବନ୍ଧୁକ ଲଗାଇ କାରରେ ଦ୍ରୂତଗତିରେ ପାଲଲହଡା ଆଡକୁ ନେଇ ଯାଉଥିବା ବେଳେ କାର୍ଟି ଜଣେ ବାଇକ୍ ଆରୋହୀଙ୍କ ସହ ଦୁର୍ଘଟଣା ଘଟାଇବାରୁ କିଛି ଯୁବକ କାରକୁ ପିଛା କରିଥିଲେ । କାରର ଆଗ ଚକା ଫାଟିଯିବାରୁ ତେଲକୋଇ ଥାନା ଅଧୀନ ନୂଆଡିହ ଛକରେ ଏକ ପୋଖରୀ ପାଖରେ ଟାୟାର ବଦଳାଉଥିଲେ ଅପହରଣକାରୀ । ଏହି ସମୟରେ ସ୍ଥାନୀୟ ଲୋକେ ୨ ଦୁର୍ବୃତଙ୍କୁ କାବୁ କରି ପୋଲିସର ଜିମା ଦେଇଛନ୍ତି । ସେପଟେ ଅନ୍ୟ ଜଣେ ଅଭିଯୁକ୍ତ ଖସିପଳାଇଛି । ସମସ୍ତଙ୍କ ଘର ଅନୁଗୁଳ ଜିଲ୍ଲା ତାଳଚେରର ବୋଲି ଜଣାପଡିଛି ।