ମିଶନ୍ ୨୦୧୯ ! ଧର୍ମେନ୍ଦ୍ରଙ୍କ ଜନ ସମ୍ପର୍କ ପଦଯାତ୍ରା, ସେପଟେ ଅପରାଜିତାଙ୍କ ଜନ ପରାମର୍ଶ ପଦଯାତ୍ରା, କାହାକୁ ମିଳିବ ଫାଇଦା ।
ଓଡ଼ିଶା ଉପରେ ବେଶ୍ ଫୋକସ କରୁଛି ବିଜେପି । ଯେଉଁଥି ପାଇଁ ଲୋକମାନଙ୍କ ନିକଟତର ହେବାକୁ ପ୍ରୟାସ କରୁଛନ୍ତି ବିଜେପିର ବରିଷ୍ଠ ନେତା ।
କନକ ବ୍ୟୁରୋ: ଗତ ଡିସେମ୍ବର ୧୧ ତାରିଖରେ ଆସିଥିବା ୫ ରାଜ୍ୟର ନିର୍ବାଚନ ଫଳାଫଳ ପରେ ବିଜେପିକୁ ଲାଗିଛି ବଡ଼ ଝଟକା । କାରଣ ବିଜେପି ଶାସିତ ୩ ରାଜ୍ୟରୁ ପଦ୍ମ ପାଖୁଡ଼ା ଖସିଲା ଭଳି ଗାଦି ଛଡ଼ାଇ ନେଇଛି କଂଗ୍ରେସ । ସେଥିପାଇଁ ଏବେ ଓଡ଼ିଶା ଉପରେ ବେଶ୍ ଫୋକସ କରୁଛି ବିଜେପି । ଯେଉଁଥି ପାଇଁ ଲୋକମାନଙ୍କ ନିକଟତର ହେବାକୁ ପ୍ରୟାସ କରୁଛନ୍ତି ବିଜେପିର ବରିଷ୍ଠ ନେତା । ତେବେ ରାଜ୍ୟ ବିଜେପିର ମଙ୍ଗୁଆଳ ଧର୍ମେନ୍ଦ୍ର ପ୍ରଧାନ ଏବଂ ନିକଟରେ ବିଜେପିରେ ଯୋଗଦେଇଥିବା ଅପରାଜିତା ଷଡ଼ଙ୍ଗୀ ଏନେଇ ଭରପୂର ପ୍ରୟାସ ଜାରି ରଖିଥିବା ଦେଖିବାକୁ ମିଳିଛି ।
Kanak News is now on WhatsApp
Join and get latest news updates delivered to you via WhatsApp
ଗତ କିଛିଦିନ ହେବ ରାଜ୍ୟ ବିଜେପି ଏହି ଦୁଇ ଚର୍ଚ୍ଚିତ ଚେହେରା ଓଡ଼ିଶାର ବିଭିନ୍ନ ଜିଲ୍ଲାରେ ନଜର ଆସୁଛନ୍ତି । କେଉଁଠି ଧର୍ମେନ୍ଦ୍ର ପ୍ରଧାନ ପଦଯାତ୍ରା କରୁଛନ୍ତି ତ ଆଉ କେଉଁଠି ଅପରାଜିତା ଷଡ଼ଙ୍ଗୀ ଯାଇ ଜନ ପରାମର୍ଶ ପଦଯାତ୍ରା କରି ଲୋକଙ୍କ ନିକଟତର ହେବାକୁ ପ୍ରୟାସ ଚଳାଇଛନ୍ତି । ତେବେ ଏହାପଛର ଗୁମର କ’ଣ ଜଣାପଡ଼ି ନଥିଲେ ମଧ୍ୟ ରାଜ୍ୟ ବିଜେପିର ଦୁଇ ମୁଖ୍ୟମନ୍ତ୍ରୀ ପ୍ରାର୍ଥୀ ପ୍ରଚାର ମଇଦାନକୁ ଓହ୍ଲାଇଛନ୍ତି ବୋଲି ଖଟିରେ ଚର୍ଚ୍ଚା ଜୋର ଧରିଛି । ସବୁଠାରୁ ଗୁରୁତ୍ୱପୂର୍ଣ୍ଣ ବିଷୟ ହେଲା ଯେ, ଧର୍ମେନ୍ଦ୍ର ପ୍ରଧାନ ଏବେ ଲୋକମାନଙ୍କ ପାଖକୁ ଯାଇ ବିଭିନ୍ନ ନିର୍ବାଚନ ମଣ୍ଡଳୀରୁ ରାଜ୍ୟ ସରକାରଙ୍କୁ ସମାଲୋଚନା କରି ବିଭିନ୍ନ ହିସାବ କିତାବ ଦେଉଛନ୍ତି । ଅନ୍ୟପଟେ ପଦ୍ମକୁ ଓଡ଼ିଶାରେ ଫୁଟାଇବା ପାଇଁ ମଙ୍ଗଧରିଥିବା ଅପରାଜିତା ମଧ୍ୟ ଧିରେ ଧିରେ ଲୋକଙ୍କ ନିକଟତର ହେବାକୁ ଜନସମ୍ପର୍କରେ ଲାଗିପଡ଼ିଛନ୍ତି ।
ଅନ୍ୟପଟେ ଉଭୟଙ୍କ ଜନ ସମ୍ପର୍କ ପଦଯାତ୍ରାକୁ ଆଗାମୀ ନିର୍ବାଚନ ପାଇଁ ବିଜେପିର କସରତ ବୋଲି କହୁଛନ୍ତି ରାଜନୀତି ବିଶେଷଜ୍ଞ । କାରଣ ଆସନ୍ତା ୨୪ ତାରିଖ ଦିନ ଓଡ଼ିଶା ଆସିବେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ଆଉ ଖୋର୍ଦ୍ଧାରେ ହେବାକୁ ଥିବା ବିଶାଳ ଦଳୀୟ ସମାବେଶରେ ମୋଦି ଯୋଗଦେବାର କାର୍ଯ୍ୟକ୍ରମ ରହିଛି । ଏହି ଅବସରରେ ହୁଏତ ରାଜ୍ୟ ବିଜେପିର ଏହି ଦୁଇ ଚର୍ଚ୍ଚିତ ନେତାଙ୍କୁ କାର୍ଯ୍ୟଶୈଳୀକୁ ଅନୁଧ୍ୟାନ କରି ଗୁରୁମନ୍ତ୍ର ଦେବେ ବୋଲି ଖଟିରେ ଶୁଣିବାକୁ ମିଳୁଛି । ୨୦୧୯ ନିର୍ବାଚନ ପାଇଁ କର୍ମୀଙ୍କୁ ଗୁରୁମନ୍ତ୍ର ଦେବା ସହ ଏକପ୍ରକାର ନିର୍ବାଚନୀ ପ୍ରଚାର ଆରମ୍ଭ କରିବେ ବୋଲି ଚର୍ଚ୍ଚା ହେଉଛି । ତେବେ ଏସବୁ ଭିତରେ ପ୍ରଶାସିକା ପଦ ଛାଡି ପଦ୍ମ ପୋଖରୀକୁ ଡେଇଁଥିବା ଅପରାଜିତାଙ୍କ ପାଇଁ ଖାସ୍ ମୋଦି ଓଡିଶା ଆସୁଛନ୍ତି ବୋଲି ରାଜନୀତିର ଅନ୍ଦରମହଲରେ ଚର୍ଚ୍ଚା ହେଉଛି ।