ମକର ସଂକ୍ରାନ୍ତି ପରେ ଓଡିଶାରେ ଆର୍ବିଭାବ ହେବ ନୂଆ ଆଞ୍ଚଳିକ ଦଳ ! ଆସନ୍ତାକାଲି ନାମୀ ହୋଟେଲରେ ନୂଆ ଦଳ ପାଇଁ ଖୋଳାଯିବ ପୁନାଦି
ବିଜେଡିରୁ ବିଦା ହେବା ପରେ ବର୍ଷେ ହେବ ରାଜନୈତିକ ଭବିଷ୍ୟତ ନେଇ ନିଷ୍ପତି ନେଇପାରୁନଥିବା ବୈଜୟନ୍ତ ଏବଂ ବିଜେପିକୁ ବାଏ ବାଏ କରିଥିବା ବିଜୟ ଓ ଦିଲ୍ଲୀପଙ୍କ ମଧ୍ୟରେ ଏହି ଗୁପ୍ତ ବୈଠକ ହେବ ବୋଲି ଶୁଣିବାକୁ ମିଳୁଛି ।
କନକ ବ୍ୟୁରୋ : ୨୦୧୯ ନିର୍ବାଚନ ପୂର୍ବରୁ ଓଡିଶାରେ ଆର୍ବିଭାବ ହେବ ଆଉ ଏକ ନୂଆ ଆଞ୍ଚଳିକ ଦଳ । ମକର ସଂକ୍ରାନ୍ତି ପରେ ପରେ ଶୁଭଲଗ୍ନ ଦେଖି ଏହି ନୂଆ ଦଳର ହଠାତ୍ ହେବ ଆର୍ବିଭାବ । ଏଥିପାଇଁ ଆସନ୍ତାକାଲି କାଳେ ପୁନାଦି ଖୋଳାଯିବ । ପୂରାପୁରି ଗୁପ୍ତ ଢଙ୍ଗରେ ଏହାର ବ୍ଲୁ-ପ୍ରିଣ୍ଟ ପ୍ରସ୍ତୁତ ହୋଇସାରିଛି । କେବଳ ଜୟଦେବ ବିହାରର ଦାମୀ ହୋଟେଲରେ ଚୂଡାନ୍ତ ଆଲୋଚନା ପରେ ଏହି ଦଳର ଘୋଷଣା କରାଯିବ । ଏଭଳି ଏକ ଚର୍ଚ୍ଚା ଶୀତ ଦିନର ଚା’ ଖଟିକୁ ଗରମ କରିଛି ।
Kanak News is now on WhatsApp
Join and get latest news updates delivered to you via WhatsApp
ଚର୍ଚ୍ଚା ଅନୁଯାୟୀ, ଏହି ନୂଆ ଦଳ ପାଇଁ ଆସନ୍ତାକାଲି ଜୟଦେବ ବିହାର ଅଞ୍ଚଳରେ ଥିବା ନାମୀ ହୋଟେଲରେ ଶେଷ ପର୍ଯ୍ୟାୟ ଆଲୋଚନା ହେବ । ଏହି ଗୁପ୍ତ ବୁଝାମଣା ରାଜ୍ୟର ୩ ହେଭିୱେଟ ନେତାଙ୍କ ମଧ୍ୟରେ ହେବ ବୋଲି ଶୁଣିବାକୁ ମିଳୁଛି । ବିଜେଡିରୁ ବିଦା ହେବା ପରେ ବର୍ଷେ ହେବ ରାଜନୈତିକ ଭବିଷ୍ୟତ ନେଇ ନିଷ୍ପତି ନେଇପାରୁନଥିବା ବୈଜୟନ୍ତ ଏବଂ ବିଜେପିକୁ ବାଏ ବାଏ କରିଥିବା ବିଜୟ ଓ ଦିଲ୍ଲୀପଙ୍କ ମଧ୍ୟରେ ଏହି ଗୁପ୍ତ ବୈଠକ ହେବ ବୋଲି ଶୁଣିବାକୁ ମିଳୁଛି । ଖାସକରି ୨୦୧୯ ନିର୍ବାଚନରେ ନବୀନଙ୍କୁ ଚେକମେଟ ଦେବାକୁ ଏହି ୩ ନେତା ହାତ ମିଳାଇପାରନ୍ତି ବୋଲି ରାଜନୈତିକ ମହଲରେ ଶୁଣିବାକୁ ମିଳୁଛି ।
ଗୋଟିଏ ପଟେ ବିଜେଡିରୁ ବିଦା ହେବା ପରେ ବୈଜୟନ୍ତ ପ୍ରଥମେ ପଦ୍ମ ପୋଖରୀରେ ବୁଡ ମାରିବେ ବୋଲି ଚର୍ଚ୍ଚା ହେଉଥିଲା । କିନ୍ତୁ ଏହି ଚର୍ଚ୍ଚାରେ ସେତେବେଳେ ବ୍ରେକ ଲାଗିଲା ଯେତେବେଳେ ବୈଜୟନ୍ତ ଡିସେମ୍ବର ୨୫ରେ ମୋଦିଙ୍କ ଓଡିଶା ଗସ୍ତ ପରେ ରାଜ୍ୟ ବିଜେପିକୁ ଟ୍ୱିଟ୍ କରି ମାରିଥିଲେ ତେରଛା ବାଣ । ଆଉ ଏହାସହ ବୈଜୟନ୍ତଙ୍କ ବିଜେପି କ୍ୟାମ୍ପକୁ ଯିବା ଚର୍ଚ୍ଚା ଉପରେ ଛକି ଚିହ୍ନ ଟାଣି ହୋଇଯାଇଥିଲା । ଏପରିକି ମଝିରେ ଦାମଙ୍କ ଦଳରେ ବୈଜୟନ୍ତ ସାମିଲ ହେବାର ଉଡା ଖବର ରାଜ୍ୟ ରାଜନୀତିକୁ ଉଷ୍ମ କରିଥିଲା । କିନ୍ତୁ ବୈଜୟନ୍ତ ଏହି ଖବରକୁ ଖଣ୍ଡନ କରିବା ପରେ ଏହି ଚର୍ଚ୍ଚାରେ ମଧ୍ୟ ବରଫ ଜମାଟ ମାଡିଯାଇଥିଲା ।
ଠିକ୍ ସେହିଭଳି ବିଜେପିରେ ଦୀର୍ଘ ଦିନ ଧରି କୋଣଠେସା ହୋଇ ପଡିଥିବା ବିଜୟ ମହାପାତ୍ର ଓ ଦିଲ୍ଲୀପ ରାୟ ନଭେମ୍ବର ୩୦ରେ ଦେହରୁ ଗେରୁଆ ଗାମୁଛା ଓହ୍ଲାଇଦେବା ପରେ ସବୁଜ ଗାମୁଛା ପକାଇ ଶଙ୍ଖ ପୁଙ୍ଖିବେ ବୋଲି ଚର୍ଚ୍ଚା ଜୋର ଧରିଥିଲା । ପୁଣିଥରେ ପୁରୁଣା ଘରକୁ ଏହି ଦୁଇ ନେତା କମବ୍ୟାକ୍ କରିବେ ବୋଲି ସବୁଜ କ୍ୟାମ୍ପର ଅନ୍ଦର ମହଲରୁ ଶୁଣିବାକୁ ମିଳୁଥିଲା । କିନ୍ତୁ ବିଜୟଙ୍କ ଫେସବୁକ ଲାଇଭ ଏହି ଚର୍ଚ୍ଚାରେ ପୂର୍ଣ୍ଣଚ୍ଛେଦ ପକାଇଥିଲା । ଏହାଛଡା ଦିଲ୍ଲୀପ ଅନ୍ୟ ଦଳ ଆଡୁ ଅଫର ଆସୁଥିବା କହି କଂଗ୍ରେସରେ ଏଣ୍ଟ୍ରି ମାରିବା ଚର୍ଚ୍ଚାକୁ ଖୋରାକ ଯୋଗାଇଥିଲେ । ଏପରିକି ଦାମଙ୍କ ଦଳରେ ଦିଲ୍ଲୀପ ଓ ବିଜୟ ସାମିଲ ହେଉଥିବା ନେଇ ମଧ୍ୟ କିଛି ଉଡା ଖବର ସାମ୍ନାକୁ ଆସିଥିଲା ।
ଏସବୁ ଭିତରେ ଦଳ ଛାଡିବା ପରେ ରାଜ୍ୟ ରାଜନୀତିରେ ଥଳକୁଳ ପାଉନଥିବା ଏହି ୩ ହେଭିୱେଟ ନେତାଙ୍କ ରାଜନୈତିକ ଭବିଷ୍ୟତ କଣ ହେବ ତାହାକୁ ନେଇ ଚର୍ଚ୍ଚା ହେଉଛି । ତେବେ ଏହି ଚର୍ଚ୍ଚାକୁ ବିରାମ ଦେବାକୁ ନୂଆ ଦଳ ଗଠନ କରି ଏହା ସାହାରାରେ ୨୦୧୯ ନିର୍ବାଚନରେ ଏହି ୩ ନେତା ଆଉ ଏକ ନୂଆ ରାଜନୈତିକ ଇନିଂସ ଆରମ୍ଭ କରିବାକୁ ଯୋଜନା କରୁଥିବା ଚର୍ଚ୍ଚା ହେଉଛି । ତେବେ ଆଗାମୀ ଦିନରେ ଓଡିଶାରେ ଆଉ ଏକ ଆଞ୍ଚଳିକ ଦଳ ଗଠନ ହେବ ନା ବୈଜୟନ୍ତଙ୍କ ଗେରୁଆ କ୍ୟାମ୍ପ ଏବଂ ଦିଲ୍ଲୀପ ଓ ବିଜୟଙ୍କ ସବୁଜ କ୍ୟାମ୍ପକୁ ଯିବା ନେଇ ଉଠିଥିବା ଚର୍ଚ୍ଚା ଭଳି ଏହା ମଧ୍ୟ ଥଣ୍ଡା ପଡିଯିବ ତାହା ଦେଖିବା ବାକି ରହିଲା ।