ବିତର୍କକୁ ନେଇ ବିବାଦ ! ଅଭିଜିତ ଆୟାରଙ୍କ ପ୍ରସଙ୍ଗରେ ବିଧାନସଭାକୁ ଚ୍ୟାଲେଂଜ ଦେଲେ ଖାରବେଳ ସ୍ୱାଇଁ, କହିଲେ ତଳକୁ ଖସିଲା ଗୃହର ମର୍ଯ୍ୟାଦା ।
କନକ ବ୍ୟୁରୋ : ବିତର୍କକୁ ନେଇ ବଢ଼ିଲା ବିବାଦ । ଅଭିଜିତ୍ ଆୟାର ମିତ୍ରଙ୍କ ଗିରଫଦାରୀ ପ୍ରସଙ୍ଗରେ ବରିଷ୍ଠ ନେତା ଖାରବେଳ ସ୍ୱାଇଁ ରଖିଥିବା ମତକୁ ନେଇ ସୃଷ୍ଟି ହୋଇଛି ନୂଆ ବିବାଦ । ଖାରଖେଳ ସ୍ୱାଇଁ କହିଥିଲେ, ଓଡ଼ିଶା ବିଧାନସଭା ଗୃହ କମିଟି ପ୍ରତିହିଂସା ପରାୟଣ ହୋଇଉଠିଛି । ସେହିପରି ବିଧାନସଭାକୁ ନିମ୍ନଶ୍ରେଣୀର ବିଧାନଗୃହ ବୋଲି ଆକ୍ଷେପ କରିଥିଲେ । ଯାହାକୁ ନେଇ ସୃଷ୍ଟି ହୋଇଛି ଝଡ଼ । ଖାରଖେଳ ସ୍ୱାଇଁ ଏହି ବୟାନକୁ କେନ୍ଦ୍ରକରି, କେନ୍ଦ୍ରାପଡ଼ା ଆଳିରେ ଆଜି ତାଙ୍କୁ ବିରୋଧର ସାମ୍ନା କରିବାକୁ ପଡ଼ିଛି । ଖାରବେଳ ସ୍ୱାଇଁଙ୍କ ଉପରେ କିଛି ଲୋକ ଆକ୍ରମଣ କରିଥିବା ନେଇ ମଧ୍ୟ ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଅଭିଜିତ୍ ଆୟାର କ୍ଷମା ମାଗିବା ପରେ ବି ବିଧାନସଭା ଗୃହ କମିଟି ପ୍ରତିହିଂସା ପରାୟଣ ହୋଇ ପଡ଼ିଛି ବୋଲି ଅଭିଯୋଗ କରିଛନ୍ତି ଖାରବେଳ । କେବଳ ଏତିକି ନୁହେଁ, ବିଧାନସଭାକୁ ନିମ୍ନଶ୍ରେଣୀର ବିଧାନଗୃହ ବୋଲି ଆକ୍ଷେପ କରି ଖୋଲା ଚ୍ୟାଲେଂଜ୍ ଦେଇଛନ୍ତି । ଓଡ଼ିଶା ବିଧାନସଭାକୁ ଖାରବେଳଙ୍କ ଚ୍ୟାଲେଂଜ୍ । ଗୃହ କମିଟିର ଆଭିମୁଖ୍ୟକୁ ନେଇ ଉଠାଇଲେ ପ୍ରଶ୍ନ । କେବଳ ରାଜନୈତିକ ଉଦ୍ଦେଶ୍ୟ ରଖି ଅଭିଜିତଙ୍କ ବିରୋଧରେ କଠୋର ଆଭିମୁଖ୍ୟ ଗ୍ରହଣ କରାଯାଇଥିବା ଖାରବେଳ ଅଭିଯୋଗ କରିଛନ୍ତି । ଯାହା ଓଡ଼ିଆ ଜାତି ତଥା ଓଡ଼ିଶା ବିଧାନସଭାର ମର୍ଯ୍ୟାଦା ବୃଦ୍ଧି କରୁନି ବରଂ ତଳକୁ ଖସାଇଛି ବୋଲି ସେ କହିଛନ୍ତି ।
ଏପଟେ ଖାରବେଳଙ୍କ ଏଭଳି ଯୁକ୍ତିକୁ ପରୋକ୍ଷରେ ସମର୍ଥନ କରିଛନ୍ତି ପୂର୍ବତନ ଅର୍ଥମନ୍ତ୍ରୀ ପଂଚାନନ କାନୁନଗୋ । ସେ କହିଛନ୍ତି, ଏଭଳି କିଛି କରାନଯାଉ, ଯାହା ଭୁଲ ବାର୍ତା ଦେବ । ଖାରବେଳଙ୍କ ମନ୍ତବ୍ୟରେ ବିଧାନସଭା କିମ୍ବା ବିଧାୟକଙ୍କୁ ଆକ୍ଷେପ ହୋଇଛି ନା ନାହିଁ ସେନେଇ ବିଚାର କରାଯିବ ବୋଲି ସୂଚନା ଦେଇଛନ୍ତି ଗୃହ କମିଟିର ଅଧ୍ୟକ୍ଷ ନରସିଂହ ମିଶ୍ର । ଏପଟେ ଅଭିଜିତଙ୍କ ସପକ୍ଷରେ ଖାରବେଳ ସ୍ୱାଇଁ ଯେଉଁ ମନ୍ତବ୍ୟ ରଖିଛନ୍ତି ତାକୁ ନେଇ କେନ୍ଦ୍ରାପଡ଼ାରେ ପ୍ରତିକ୍ରିୟା ପ୍ରକାଶ ପାଇଛି । ଖାରବେଳଙ୍କ ମନ୍ତବ୍ୟକୁ ବିରୋଧ କରି କିଛି ଲୋକ ତାଙ୍କ ସଭାରେ ପ୍ରତିବାଦ କରିଛନ୍ତି । ଏପରିକି ତାଙ୍କ ଉପରକୁ ଆକ୍ରମଣ କରାଯାଇଥିବା ମଧ୍ୟ ଅଭିଯୋଗ ହୋଇଛି ।