କେରଳକୁ ନେଇ ଯୋଗୀ ଦେଇଥିବା ବୟାନ ଉପରେ ପ୍ରତିକ୍ରିୟା ରଖିଲେ ବିଜୟନ, କହିଲେ ଏଭଳି କଥା

କନକ ବ୍ୟୁରୋ : ଉତ୍ତର ପ୍ରଦେଶ ନିର୍ବାଚନକୁ ନେଇ ରାଜ୍ୟ ରାଜନୀତି ସରଗରମ ରହିଥିବା ବେଳେ ଏବେ ମୁଖ୍ୟମନ୍ତ୍ରୀ ଯୋଗୀଙ୍କ ବୟାନ ଦେଶର ଅନ୍ୟକିଛି ରାଜ୍ୟର ପାରଦ ବଢାଇ ଦେଇଛି । ଏକ ଜନସଭାକୁ ସମ୍ବୋଧିତ କରି ଯୋଗୀ କହିଥିଲେ କି କେରଳ ଓ ପଶ୍ଚିମବଙ୍ଗ ଭଳି ଉତ୍ତର ପ୍ରଦେଶ ହେବା ପୂର୍ବରୁ ରାଜ୍ୟବାସୀ ରାଜ୍ୟକୁ ରକ୍ଷା କରିବେ । ଯୋଗୀଙ୍କ ଏଭଳି ବୟାନ ପରେ ଏହା ଉପରେ ପ୍ରତିକ୍ରିୟା ରଖିଛନ୍ତି କେରଳ ମୁଖ୍ୟମନ୍ତ୍ରୀ ପିନାରାଇ ବିଜୟନ । ବିଜୟନ ଏକ ଭିଡିଓ ଜାରି କରି କହିଛନ୍ତି କି, “ୟୁପି କାଳେ କେରଳ ଭଳି ହୋଇଯିବ ଏନେଇ ଯୋଗୀଙ୍କ ଭୟ ଘାରିଛି,” ଏହାସହ ବିଜୟନ ଜାରି କରିଥିବା ଭିଡିଓରେ କହୁଛନ୍ତି କି, ଦେଶର ସର୍ବଶ୍ରେଷ୍ଠ ଶିକ୍ଷା ବ୍ୟବସ୍ଥା, ସ୍ୱାସ୍ଥ୍ୟ ବ୍ୟବସ୍ଥ, ସମାଜ କଲ୍ୟାଣ, ଲୋକଙ୍କର ଉଚ୍ଚ ଜୀବନ ଶୈଳୀ ଭଳି ଯଦି ୟୁପି ହୋଇଯାନ୍ତା ତେବେ ସେଠାରେ ଧର୍ମ ଆଧାରରେ ଲୋକମାନେ ହତ୍ୟାର ଶିକାର ହୁଅନ୍ତେ ନାହିଁ । ୟୁପି କେବେ କେରଳ ଭଳି ହେବ ସେନେଇ ଲୋକମାନେ ଆଶାବାନ୍ଧି ବସିଛନ୍ତି ।

अगर यूपी केरल जैसा हो जाता है, जिसका डर @myogiadityanath को है, तो देश की सर्वश्रेष्ठ शिक्षा एवं स्वास्थ्य सुविधा, समाज कल्याण, उच्च जीवन स्तर और सौहार्दपूर्ण समाज को यूपी में स्थापित किया जा सकेगा जहाँ जाति और धर्म के नाम पर लोगों की हत्या नहीं होगी। यूपी की जनता यही चाहती है।

— Pinarayi Vijayan (@vijayanpinarayi) February 10, 2022

କେବଳ ବିଜୟନ ନୁହଁନ୍ତି ଯୋଗୀଙ୍କ ଏଭଳି ବୟାନ ଉପରେ ପ୍ରତିକ୍ରିୟା ରଖିଛନ୍ତି କଂଗ୍ରେସ ନେତା ଶଶି ଥରୁର, ସେ ତାଙ୍କ ଟ୍ୱିଟର ହ୍ୟାଣ୍ଡଲରେ ଲେଖିଛନ୍ତି କି, ଯୋଗୀ ଆଦିତ୍ୟନାଥ ରାଜ୍ୟର ଭୋଟରମାନଙ୍କୁ ଭରଶା ଦେଇଛନ୍ତି କି ଯଦି ରାଜ୍ୟରେ ପୁଣିଥରେ ବିଜେପି ସରକାର ଗଠନ ହୁଏ ତେବେ ରାଜ୍ୟରେ କେରଳ, ପଶ୍ଚିମବଙ୍ଗ ଓ କାଶ୍ମୀର ଭଳି ବିକାଶର ଚିତ୍ର ଦେଖିବାକୁ ମିଳିବ । ସେ କହିଛନ୍ତି କି କାଶ୍ମୀର ଭଳି ସୁନ୍ଦରତା, ପଶ୍ଚିମବଙ୍ଗ ଭଳି ସଂସ୍କୃତି ଓ କେରଳ ଭଳି ଶିକ୍ଷା ଦେବାକୁ ଯୋଗୀ ସରକାର ଅନ୍ୟପଟେ ପ୍ରତିଶ୍ରୁତି ଦେଇଛନ୍ତି ।

କହିରଖୁ କି ଯୋଗୀ ଆଦିତ୍ୟନାଥ ପ୍ରଥମ ପର୍ଯ୍ୟାୟ ମତଦାନ ଆରମ୍ଭ ହେବାର କିଛି ସମୟ ପୂର୍ବରୁ ଏକ ଭିଡିଓ ଜାରି କରିଥିଲେ । ଏହି ଭିଡିଓରେ ସେ କେରଳ ଓ ପଶ୍ଚିମବଙ୍ଗ ବାବଦରେ କହିବାକୁ ଯାଇ ଭୋଟର ମାନଙ୍କୁ ବିଜେପିକୁ ଭୋଟ ଦେବାକୁ ନିବେଦନ କରିଥିଲେ ।