କେନ୍ଦୁଝର ଖଣିରେ ଶ୍ରମିକଙ୍କୁ ବୁଝାଇବା ପାଇଁ ପହଞ୍ଚିଲେ ପଦ୍ମଶ୍ରୀ ଦୈତାରୀ ନାୟକ । ଲୋଡିଂ ଏଜେନ୍ସିର ପକ୍ଷ ନେଇ ଶ୍ରମିକଙ୍କୁ ବୁଝାଇଲେ । ସ୍ଥାନୀୟ ଲୋକେ କହିଲେ, ସରଳ ଦୈତାରୀଙ୍କୁ ବ୍ୟବହାର କରୁଛି ଲୋଡିଂ ଏଜେନ୍ସି ।
କନକ ବ୍ୟୁରୋ : କେନ୍ଦୁଝର ଜିଲ୍ଲା ଶୁଆକାଟୀ ଗନ୍ଧମାର୍ଦ୍ଦନ ଓଏମସି ଖଣିରେ ଏକ ମାସ ହେବ ଶ୍ରମିକ ଆନ୍ଦୋଳନ ଚାଲିଛି । ଏହି ଆନ୍ଦୋଳନକୁ ନେଇ ନିଜ ରାଜନୈତିକ ପତିଆରା ବଢାଇବା ପାଇଁ ବିଜେଡିର ବରିଷ୍ଠ ନେତା ବଦ୍ରି ପାତ୍ର ଓ ବିଜେପିର ମୋହନ ମାଝିଙ୍କ ମଧ୍ୟରେ ବିବାଦ ବି ବେଶ ଚର୍ଚ୍ଚାରେ ରହିଛି । ଅନ୍ୟପଟେ ଶ୍ରମିକ ଆନ୍ଦୋଳନର ସମାଧାନ ପାଇଁ ପଦ୍ମଶ୍ରୀ ଦୈତାରୀ ନାୟକଙ୍କୁ ମଧ୍ୟସ୍ଥି କରିଛନ୍ତି ଲୋଡିଂ ଏଜେନ୍ସି ।
Kanak News is now on WhatsApp
Join and get latest news updates delivered to you via WhatsApp
ସିନେ ପରଦାର ଦଶରଥ ମାଝିଙ୍କ ଭଳି କେନ୍ଦୁଝରର ଏହି କାହାଣୀ ସେତେବେଳେ ଓଡିଶାରେ ବେଶ ଚର୍ଚ୍ଚାର ବିଷୟ ପାଲଟିଥିଲା । ପାଣି ପାଇଁ ପାହାଡ ଖୋଳି ଝରଣାର ସ୍ରୋତ ବଦଳାଇ ଦେଇଥିଲେ ଦୈତାରୀ ନାୟକ । ଆଉ ସେଥିପାଇଁ ତାଙ୍କୁ ପଦ୍ମଶ୍ରୀ ସମ୍ମାନ ମିଳିଥିଲା ।
ସମସ୍ୟା ସମାଧାନ ପାଇଁ ଦୈତାରୀଙ୍କୁ ପଡୁଛି ଡାକରା । ଖଣିରେ ଶ୍ରମିକ ଆନ୍ଦୋଳନ ବନ୍ଦ ପାଇଁ ଦୈତାରୀ ସାହାରା । କେନ୍ଦୁଝର ବାଂଶପାଳ ବ୍ଲକର ଗନ୍ଧମାର୍ଦ୍ଦନ ଲୌହ ଖଣିରେ ଆନ୍ଦୋଳନ ବନ୍ଦ କରିବା ପାଇଁ, ଟ୍ରକରେ ଖଣିଜ ପଦାର୍ଥ ଉଠାଉଥିବା ଲୋଡିଂ ଏଜେନ୍ସି ଗୁଡିକ ଏବେ ଦୈତାରୀ ନାୟକଙ୍କୁ ମଧ୍ୟସ୍ଥ କରିଛନ୍ତି । ଯେହେତୁ ସ୍ଥାନୀୟ ଅଂଚଳରେ ଦୈତାରୀଙ୍କ ସମ୍ମାନ ରହିଛି, ସେଥିପାଇଁ ତାଙ୍କ ଜରିଆରେ କାମ କରିବା ପାଇଁ ଚେଷ୍ଟା କରୁଛନ୍ତି ଲୋଡିଂ ଏଜେନ୍ସି ମାନେ ।
କେନ୍ଦୁଝର ବାଂଶପାଳ ବ୍ଲକ ଶୁଆକାଟୀସ୍ଥିତ ଗନ୍ଧମାର୍ଦ୍ଦନ ଲୌହ ଖଣିରେ ଶ୍ରମିକ ଅଶାନ୍ତି ନେଇ କେନ୍ଦୁଝରର ୨ ହେଭିୱେଟ ନେତା ବଦ୍ରୀ ପାତ୍ର ଏବଂ ମୋହନ ମାଝୀଙ୍କ ମଧ୍ୟରେ ବିବାଦ ଏବେ ଜିଲ୍ଲାରେ ଚର୍ଚ୍ଚାର ବିଷୟ ହୋଇଛି । ଗୋଟିଏ ପଟେ ଅଛନ୍ତି, ଆନ୍ଦୋଳନକାରୀ ଅନ୍ୟପଟେ ଅଛନ୍ତି ଲୋଡିଂ ଏଜେନ୍ସି । ଆଉ ତା ମଝିରେ ଏବେ ପଶିଛନ୍ତି ସରଳ ଓ ନୀରିହ, ଦୈତାରୀ ନାୟକ । ଗନ୍ଧମାର୍ଦ୍ଦନ ଓଏମସି ଖଣିରେ ଦୀର୍ଘ ୧ ମାସ ହେବ ଶ୍ରମିକ ଆନ୍ଦୋଳନ ଜାରି ରହିଛି । ସେପଟେ ଦୈତାରୀ ଏହି ମାମଲାରେ ପଶିବା ପରେ ପ୍ରଧାନମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ଚିଠି ମଧ୍ୟ ଲେଖିଛନ୍ତି ।