ଇଚ୍ଛା ଶକ୍ତି ଆଗରେ ସବୁ ସମ୍ଭବ । ଉଦାହରଣ ସୃଷ୍ଟି କଲେ କେନ୍ଦ୍ରାପଡା ଓସ୍ତଆ ଗାଁର ମହିଳା ସମିତି । ମୁଢି ପ୍ରସ୍ତୁତ କରି ବାର୍ଷିକ ଆୟ କରୁଛନ୍ତି ୮୦ ଲକ୍ଷ
କନକ ବ୍ୟୁରୋ : କଠିନ ପରିଶ୍ରମ ଓ ଇଚ୍ଛା ଶକ୍ତିି ବଳରେ ଅସମ୍ଭବ ସମ୍ଭବ ହୋଇଥାଏ । ଏହି ଉକ୍ତିକୁ ପ୍ରମାଣ କରିଛନ୍ତି କେନ୍ଦ୍ରାପଡ଼ା ଜିଲ୍ଲାର ରାଜକନିକା ବ୍ଳକର ଓସ୍ତଆ ଗାଁର ମହିଳାମାନେ । ମୁଢ଼ି ପ୍ରସ୍ତୁତ ରାଜ୍ୟର ବିଭିନ୍ନ ଅଂଚଳକୁ ପଠାଇ ବାର୍ଷିକ ପ୍ରାୟ ୮୦ ଲକ୍ଷ ଟଙ୍କା କାରବାର କରି ପାରିଛନ୍ତି । ସୃଷ୍ଟି ଉତ୍ପାଦକ ଗ୍ରୁପ ଗଠନ କରି ସ୍ୱାବଲମ୍ବୀ ହୋଇ ପାରଛନ୍ତି ୩୦ ଜଣ ମହିଳା ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ରାପଡା ଜିଲ୍ଲା ରାଜକନିକା ବ୍ଲକର ଓସ୍ତଆ ଗାଁର ୩୦ ଜଣ ମହିଳା ସୃଷ୍ଟି ଉତ୍ପାଦକ ଗ୍ରୁପ ଗଠନ କରି ଏପରି କିଛି କରି ଦେଖାଇଛନ୍ତି, ଯାହା ଅନ୍ୟମାନଙ୍କ ପାଇଁ ଉଦାହରଣ ପାଲଟିଛି । ଦୁଇ ବର୍ଷ ତଳେ ମିସନ ଶକ୍ତି ମାଧ୍ୟମରେ ଅଳ୍ପ କିଛି ଟଙ୍କା ଋଣ ଆଣି ମେସିନ୍ ସାହାଯ୍ୟରେ ମୁଢ଼ି ପ୍ରସ୍ତୁତ କରିଥିଲେ ମହିଳାମାନେ । କଠିନ ପରିଶ୍ରମ କରି ଖୁବ କମ୍ ଦିନ ମଧ୍ୟରେ ସେମାନଙ୍କ ଉତ୍ପାଦନ ବଢ଼ିଥିଲା । ଆଉ ଏବେ ଏହି ମହିଳାମାନେ ଅନ୍ୟମାନଙ୍କ ପାଇଁ ଉଦାହରଣ ପାଲଟିଛନ୍ତି ।
ପ୍ରତିଦିନ ଘର କାମ ସାରି ମୁଢି ପ୍ରସ୍ତୁତି ପାଇଁ ଆସିଥାନ୍ତି ଗ୍ରୁପର ମହିଳାମାନେ । ଦିନକୁ ପ୍ରାୟ ୩ ଘଂଟା କାମ ସାରି ମହିଳାମାନେ ଘରକୁ ଫେରିଥାନ୍ତି । ମେସିନ ସାହାଯ୍ୟରେ ମୁଢି ପ୍ରସ୍ତୁତ କରିବା ପରେ ତାକୁ ପ୍ୟାକିଙ୍ଗ କରି ଭଦ୍ରକ, କେନ୍ଦ୍ରାପଡା, ଯାଜପୁର ଆଦି ଜିଲ୍ଲାକୁ ବିକ୍ରି ପାଇଁ ପଠାଇଥାନ୍ତି । ଏବେ ଏହି ଗ୍ରୁପର ବାର୍ଷିକ କାରବାର ପ୍ରାୟ ୭୦ରୁ ୮୦ ଲକ୍ଷ ଟଙ୍କା ।
ମୁଢ଼ି ପ୍ରସ୍ତୁତ କରି ବିକ୍ରି କରିବା ଦିନ ଠାରୁ ଏହି ମହିଳାମାନେ ସେମାନଙ୍କ ପରିବାର ପ୍ରତିପୋଷଣରେ ହାତ ବଢ଼ାଇଛନ୍ତି । ଆଉ ସେମାନଙ୍କ ଅଭାବ ଅସୁବିଧା ଦୂର ହୋଇଛି ।
ଗ୍ରୁପର ପ୍ରତ୍ୟେକ ମାସିକ ପ୍ରାୟ ୫ରୁ ୬ହଜାର ଟଙ୍କା ରୋଜଗାର କାରିପାରୁଛନ୍ତି । ଯଦି ସରକାରଙ୍କ ତରଫରୁ ଆଉ କିଛି ସାହାଯ୍ୟ ମିଳନ୍ତା, ତାହାଲେ ଆହୁରି ଆଗକୁ ବଢ଼ିପାରନ୍ତେ ବୋଲି କହିଛନ୍ତି ସ୍ୱଂୟ ସହାୟିକାର ଗୋଷ୍ଠୀର ମହିଳାମାନେ ।