କନକ ବ୍ୟୁରୋ : କେନ୍ଦ୍ରାପଡ଼ା ନିକିରାଇ ଥାନା ଏଏସଆଇଙ୍କୁ ଆକ୍ରମଣ ଘଟଣାକୁ ଦେଢମାସ ବିତିଯାଇଥିଲେ ମଧ୍ୟ ଆକ୍ରମଣକାରୀ ଏବେ ଖୁଲମଖୁଲା ବାହାରେ ବୁଲୁଛି । ତେବେ ପୋଲିସର କାର୍ଯ୍ୟାନୁଷ୍ଠାନକୁ ନେଇ ଏବେ ସାଧାରଣରେ ପ୍ରଶ୍ନ ଉଠିଛି । ଆକ୍ରମଣକାରୀ ଇନ୍ଦ୍ର ମଲିକ ଶାସକ ଦଳର ଛାତ୍ର ନେତା ହୋଇଥିବାରୁ ତାଙ୍କୁ ଗିରଫ କରାଯାଉନଥିବା ଅଭିଯୋଗ ହୋଇଛି । ପୂର୍ବରୁ କଂଗ୍ରେସ ଛାଡ଼ି ବିଜେଡ଼ିରେ ସାମିଲ ହୋଇଥିଲା ନିକିରାଇ ଅଂଚଳର ଇନ୍ଦ୍ର ମଲିକ ।
Kanak News is now on WhatsApp
Join and get latest news updates delivered to you via WhatsApp
ତେବେ ଅକ୍ଟୋବର ୧୭ରେ କୌଣସି କାରଣ ନଥାଇ ନିକିରାଇ ଥାନାର ଏଏସଆଇ ପ୍ରକାଶ ଚନ୍ଦ୍ର ନାୟକଙ୍କୁ ଥାନା ନିକଟରେ କାର୍ଯ୍ୟରେ ଥିବା ବେଳେ ଅସଭ୍ୟଭାଷାରେ ଗାଳିଗୁଲଜ କରିବା ସହ ମାଡ଼ ମାରି ହତ୍ୟା ଉଦ୍ୟମ କରିଥିଲା । ଏହି ଘଟଣା ପରେ ନିକିରାଇ ଥାନା ଏଏସଆଇ ଏତଲା ଦେଇଥିଲେ । ତେବେ ଆକ୍ରମଣ ଘଟଣାକୁ ଦେଢମାସ ବିତିଯାଇଥିଲେ ମଧ୍ୟ ପୋଲିସ ଅପରାଧୀକୁ ଗିରଫ କରିନାହିଁ ।
ଅନ୍ୟପଟେ ଶାସକ ଦଳର ରକ୍ତଦାନ କାର୍ଯ୍ୟକ୍ରମ ଏବଂ ଅନେକ ସଭା ସମିତି କାର୍ଯ୍ୟକ୍ରମରେ ଅଭିଯୁକ୍ତଙ୍କୁ ଦେଖିବାକୁ ମିଳୁଥିବା ବେଳେ ପୋଲିସ ଅପରାଧୀକୁ ପାଉନଥିବା ଏବେ ପ୍ରଶ୍ନ ସୃଷ୍ଟି କରିଛି । ଦଫା ୩୧୪, ୨୯୪,୩୨୩, ୩୫୪, ୩୦୭ ଏବଂ ୫୦୬ ଦଫାରେ ମାମଲା ରୁଜୁ ହୋଇଛି । କିନ୍ତୁ ପୋଲିସ ଏହି ଘଟଣାରେ ଚୁପ୍ ବସିଛି । ପୂର୍ବରୁ ଏହି ଅପରାଧୀ ନାଁରେ ୨ଟି ମାମଲା ରହିଛି ।