ପଞ୍ଚାୟତ ନିର୍ବାଚନ ପୂର୍ବରୁ ରାଜନଗରରେ ରୋଚକ ରାଜନୀତି : ଯେଉଁ ସ୍ଥାନରେ କଂଗ୍ରେସ କର୍ମୀ ଅନଶନ କରିଥିଲେ ସେହି ସ୍ଥାନରେ ଗୋବର ପାଣି ଛିଞ୍ଚିଲେ ବିଜେଡ଼ି କର୍ମୀ
କନକ ବ୍ୟୁରୋ : ରାଜ୍ୟରେ ପଂଚାୟତ ଓ ପୌର ନିର୍ବାଚନ ପାଖେଇ ଆସୁଥିବାବେଳେ ରୋଚକ ହେବାରେ ଲାଗିଛି ଗ୍ରାମାଂଚଲ ରାଜନୀତି । ଏହିଭଳି ଏକ ରୋଚକ ଦୃଶ୍ୟ କେନ୍ଦ୍ରାପଡା ରାଜନଗରରୁ ଆସିଛି । କିଭଳି ବିଜେଡି କର୍ମୀ ଓ ନେତାଙ୍କ ଉପସ୍ଥିତିରେ ଗୋବର ପାଣି ଛିଞ୍ଚୁଛନ୍ତି ଜଣେ ମହିଳା । ଏହାପରେ ରାସ୍ତାକୁ ଝାଡୁ କରାଯାଉଛି । ଅର୍ଥାତ ଗୋବର ପାଣିରେ ଲିପି ଏହି ଅଂଚଳକୁ ବିଶୋଧନ କରୁଛି ବିଜେଡି ଦଳ । ରାଜନଗର ବ୍ଲକ ବାଘମାରି ପଂଚାୟତରେ ଏଭଳି ହାଇଡ୍ରାମା ଦେଖିବାକୁ ମିଳିଛି । ଯେଉଁ ସ୍ଥାନରେ କଂଗ୍ରେସ କର୍ମୀମାନେ ଅନଶନ କରିଥିଲେ, ସେହି ସ୍ଥାନରେ ଗୋବର ପାଣି ଛିଞ୍ଚି ଅଭିନବ ଢଙ୍ଗରେ କଂଗ୍ରେସ ମିଛର ପ୍ରତିବାଦ କରିଛି ବିଜୁ ଜନତା ଦଳ ।
Kanak News is now on WhatsApp
Join and get latest news updates delivered to you via WhatsApp
କଂଗ୍ରେସର ଅଭିଯୋଗ ହେଲା କିଛି ରିଲିଫ ଚୁଡାକୁ ପୋତାଯାଇଛି । ଏହାକୁ ନେଇ ରାଜନଗର କଂଗ୍ରେସ ପକ୍ଷରୁ ବିଡିଓଙ୍କୁ ଦାବି ପତ୍ର ଦିଆଯାଇଥିବାବେଳେ ସପ୍ତାହେ ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ହୋଇନଥିବାରୁ କଂଗ୍ରେସ ଜିଲ୍ଲା ସଭାପତି ତଥା ରାଜନଗରର ପୂର୍ବତନ ବିଧାୟକ ଅଂଶୁମାନ ମହାନ୍ତିଙ୍କ ନେତୃତ୍ୱରେ କଂଗ୍ରେସ କର୍ମୀମାନେ ବାଘମାରି ପଂଚାୟତ ଅଫିସ ସାମ୍ନାରେ ଅନଶନ କରିଥିଲେ । ହେଲେ କଂଗ୍ରେସ ମିଛ ପ୍ରଚାର କରି ହୀନ ରାଜନୀତି କରୁଥିବା ଅଭିଯୋଗରେ ରାସ୍ତାକୁ ଓହ୍ଲାଇଥିଲା ବିଜେଡି । ଏକ ରାଲିରେ ଆସି ବିଜେଡି କର୍ମୀମାନେ କଂଗ୍ରେସ ଅନଶନ କରିଥିବା ସ୍ଥଳରେ ଗୋବର ପାଣି ପକାଇ ବିଶୋଧନ କରିଥିବା ଦେଖିବାକୁ ମିଳିଛି । ତେବେ ଦୁଇ ପ୍ରମୁଖ ରାଜନୈତିକ ଦଳର ଏଭଳି ହାଇଡ୍ରାମା ଏବେ ସମଗ୍ର ଅଂଚଳରେ ଚର୍ଚ୍ଚାର ବିଷୟ ହୋଇଛି ।