ଅସହାୟ ବୃଦ୍ଧାଙ୍କ ଉପରେ ପଡୁନି ପ୍ରଶାସନର ଶୁଭ ନଜର: ଘର ନାହିଁ, ଗଛ ମୁଳେ ପଲିଥିନ ତଳେ ବିତିଲାଣି ୧୫ବର୍ଷ
ଜନପ୍ରତିନିଧି ଓ ସରକାରୀ ବାବୁଙ୍କୁ ଦେଖାଯାଉ ନାହିଁ କେନ୍ଦ୍ରାପଡା ଜିଲ୍ଲା ମହାନପୁର ଗାଁର ବାସନ୍ତୀ ମଳିକଙ୍କ ଦହଗଞ୍ଜ ଜୀବନ
କନକ ବ୍ୟୁରୋ: ଗରିବ ଲୋକଙ୍କ ପାଇଁ ସରକାର ଯୋଜନା ଉପରେ ଯୋଜନା କରୁଛନ୍ତି । ହେଲେ ପ୍ରକୃତ ଗରିବ ଲୋକଙ୍କ ପାଖରେ ସରକାରୀ ଯୋଜନାର ସୁଫଳ ପହଂଚି ପାରୁ ନାହିଁ । କେନ୍ଦ୍ରାପଡା ଆଳି ବ୍ଲକ ସାଇରା ପଂଚାୟତ ମହାନପୁର ଗାଁର ୭୦ବର୍ଷ ବୟସ୍କ ବୃଦ୍ଧା ବାସନ୍ତି ମଳିକଙ୍କୁ ଦେଖିଲେ ଆପଣ ମଧ୍ୟ ସେୟା କହିବେ । ଗାଁ ମୁଣ୍ଡରେ ଥିବା ଏକ ବରଗଛ ମୂଳରେ ଦୀର୍ଘ ୧୫ ହେଲା ପଡି ରହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନିଜ ମାନସିକ ବିକାରଗ୍ରସ୍ତ ବଢିଲା ଝିଅ ସହ ବାସନ୍ତି ଏହି ଛିଣ୍ଡା ପଲିଥିନ ତଳେ ୧୫ବର୍ଷ ହଲା ଖରା, ବର୍ଷା, ଶୀତରେ ପଡି ରହିଛନ୍ତି । ଘର ଖଣ୍ଡେ ପାଇଁ ଜନ ପ୍ରତିନିଧିଙ୍କ ଠାରୁ ଆରମ୍ଭ କରି ପ୍ରଶାସନିକ ଅଧିକାରୀ ସମସ୍ତଙ୍କୁ ଜଣାଇ ନିରାଶ ହୋଇଛନ୍ତି ବାସନ୍ତୀ । ବାର୍ଧକ୍ୟ ଭତା ଓ ରାସନ ଚାଉଳ ସହ ପାଖ ପଡିଶାଙ୍କ ସହଯୋଗରେ ସେ କଷ୍ଟେ ମଷ୍ଟେ ଚଳିଯାଉଛନ୍ତି । ବାସନ୍ତୀଙ୍କ ଦୁଃଖଦ ଅବସ୍ଥା ନେଇ ଆଳି ବିଡିଓଙ୍କୁ ଆମ ପ୍ରତିନିଧି ଜଣାଇବା ପରେ ତୁରନ୍ତ ଘର ଓ ଅନ୍ୟାନ୍ୟ ସୁବିଧା ଯୋଗାଇ ଦିଆଯିବ ବୋଲି କହିଛନ୍ତି ।