ଦିଲ୍ଲୀରେ ବଡୁଛି କରୋନା ସଂକ୍ରମଣ। ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ କହିଲେ, ରାଜଧାନୀରେ ଚାଲିଛି ସଂକ୍ରମଣ ଚତୁର୍ଥ ଲହର । ଏବେ ପାଇଁ ଲକଡାଉନ କରିବାର ନାହିଁ କୌଣସି ଯୋଜନା…
କନକ ବ୍ୟୁରୋ: ବର୍ତ୍ତମାନ ଲକଡାଉନ ବାବଦରେ ଦିଲ୍ଲୀ ସରକାର କୌଣସି ବିଚାର କରିନାହାନ୍ତି । ଏକଥା ସ୍ପଷ୍ଟ କରିଛନ୍ତି ଖୋଦ୍ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ । ସେ କହିଛନ୍ତି ଯେ ସହରରେ କରୋନା ଭାଇରସର ସଂକ୍ରମଣ ବଢିଚାଲିଥିଲେ ବି ଲକଡାଉନର କୌଣସି ସମ୍ଭାବନା ନାହିଁ। ଯଦି ଏପରି ପରିସ୍ଥିତି ଉପୁଜେ, ତେବେ ସମସ୍ତ ଦିଗ ଉପରେ ବିଚାର କରିବା ପରେ ହିଁ ଏହି ଶେଷ ବିକଳ୍ପ ଉପରେ ନିଷ୍ପତ୍ତି ନିଆଯିବ ।
Kanak News is now on WhatsApp
Join and get latest news updates delivered to you via WhatsApp
ଶୁକ୍ରବାର ସନ୍ଧ୍ୟାରେ ସାମ୍ବାଦିକ ସମ୍ମିଳନୀରେ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ କହିଛନ୍ତି ଯେ, ଦିଲ୍ଲୀରେ ପୁଣିଥରେ କରୋନା ଭାଇରସ ମାମଲା ଶୀଘ୍ର ବଢ଼ିବାରେ ଲାଗିଛି । ଏଭଳି ପରିସ୍ଥିତିରେ ଏହି ମହାମାରୀକୁ ରୋକିବା ପାଇଁ ଟେଷ୍ଟିଙ୍ଗ, ଟ୍ରେସିଙ୍ଗ ଓ ଆଇସୋଲେସନ ଉପରେ ଗୁରୁତ୍ୱ ଦିଆଯାଉଛି। ସେ କହିଛନ୍ତି ଯେ ଏପର୍ଯ୍ୟନ୍ତ ଆସିଥିବା କରୋନାର ତିନୋଟି ୱେଭକୁ ଦିଲ୍ଲୀର ଲୋକମାନେ ସମ୍ଭାଳି ନେଇଛନ୍ତି । ଏଥର ମଧ୍ୟ ସହରର ଲୋକମାନେ ସହଯୋଗ କରିବେ ଏବଂ ଏହି ଚତୁର୍ଥ ୱେଭକୁ ମଧ୍ୟ ପରାସ୍ତ କରିବେ ବୋଲି ଆଶା କରାଯାଉଛି ।
ମୁଖ୍ୟମନ୍ତ୍ରୀ କେଜ୍ରିୱାଲ ସ୍ପଷ୍ଟ କରିଛନ୍ତି ଯେ ସରକାର ଲକଡାଉନ ପାଇଁ ଚିନ୍ତା କରୁନାହାଁନ୍ତି। ଭବିଷ୍ୟତରେ ଯଦି ଲକଡାଉନ୍ ଆବଶ୍ୟକ ହୁଏ ତେବେ ମାମଲାର ସମସ୍ତ ଦିଗ ଉପରେ ଦୃଷ୍ଟି ଦିଆଯିବ । ସେ କହିଛନ୍ତି ଯେ ଆଜି ଡାକ୍ତରଖାନାର ଅବସ୍ଥା, ଆମ୍ବୁଲାନ୍ସ, ଭେଣ୍ଟିଲେଟର ଏବଂ ଆଇସିୟୁ ବ୍ୟବସ୍ଥାର ଯାଞ୍ଚ କରାଯାଇଛି। କରୋନା ଭୂତାଣୁକୁ ମୁକାବିଲା ପାଇଁ ଏକ ସମ୍ପୂର୍ଣ୍ଣ ଯୋଜନା ପ୍ରସ୍ତୁତ କରାଯାଇଛି।
ସରକାର ୩ଟି ଦିଗରେ କାର୍ଯ୍ୟ କରୁଛନ୍ତି। ଏଗୁଡିକ ହେଉଛି ଟେଷ୍ଟିଙ୍ଗ, ଟ୍ରେସିଙ୍ଗ ଓ ଆଇସୋଲେସନ । ଏହି ମହାମାରୀକୁ ରୋକିବାରେ ସରକାରଙ୍କ ବଦଳରେ ଜନସାଧାରଣଙ୍କ ଭୂମିକା ଅଧିକ ବୋଲି ମୁଖ୍ୟମନ୍ତ୍ରୀ କହିଛନ୍ତି। ଯଦି ଲୋକମାନେ ସମର୍ଥନ କରନ୍ତି, ତେବେ ଏହି ଯୁଦ୍ଧ ଶୀଘ୍ର ଜିତାଯାଇପାରିବ ।