ବବାନା ଷ୍ଟାଡିୟମରେ ଆନ୍ଦୋଳନରତ ଚାଷୀଙ୍କ ପାଇଁ ଜେଲ ନିର୍ମାଣ କରିବାକୁ ଦିଲ୍ଲୀ ପୋଲିସ ଦେଇଥିଲା ପ୍ରସ୍ତାବ । ଖାରଜ କଲେ କେଜ୍ରିୱାଲ ସରକାର
କନକ ବ୍ୟୁରୋ : ପୁଣି ମୁଣ୍ଡ ଟେକିଛି ଚାଷୀ ଆନ୍ଦୋଳନ । ପଞ୍ଜାବ, ହରିଆଣା ଓ ଦେଶର ବିଭିନ୍ନ ପ୍ରାନ୍ତରୁ ଚାଷୀମାନେ ସେମାନଙ୍କ ଦାବି ନେଇ ଦିଲ୍ଲୀ ଅଭିମୁଖେ ଯାତ୍ରା କରିଛନ୍ତି । ଚାଷୀମାନଙ୍କୁ ରାସ୍ତାରେ ଅଟକାଇବାକୁ ଦିଲ୍ଲୀ ପୋଲିସ କଡା ବନ୍ଦୋବସ୍ତ କରିଛି । ଏସବୁ ଭିତରେ କିଛି ଚାଷୀ ସଂଗଠନ ଟ୍ରାକ୍ଟର ସହ ଦିଲ୍ଲୀରେ ପହଂଚି ସାରିଛନ୍ତି । ପୋଲିସ ସେମାନଙ୍କ ଉପରକୁ ଲୁହାବୁହା ଗ୍ୟାସ ଛାଡିଛି । ରାସ୍ତାରେ କୀଳାପୋତି ଅଟକାଇବାକୁ ଚେଷ୍ଟା କରିଛି । ବିଭିନ୍ନ ସ୍ଥାନରେ ସମେଣ୍ଟର ବ୍ୟାରିକେଡ ଲଗାଇଛି ତ କେଉଁଠି କେଉଁଠି ଟ୍ରକ ଠିଆ କରି ଚାଷୀଙ୍କ ରାସ୍ତା ଅବରୋଧ କରିବାକୁ ଚେଷ୍ଟା କରିଛି ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଏସବୁ ଭିତରେ ଦିଲ୍ଲୀ ପୋଲିସ ବବାନା ଷ୍ଟାଡିୟମରେ ଆନ୍ଦୋଳନରତ ଚାଷୀଙ୍କ ପାଇଁ ଏକ ଜେଲ ନିର୍ମାଣ କରିବାକୁ କେଜ୍ରିୱାଲ ସରକାରଙ୍କୁ ପ୍ରସ୍ତାବ ଦେଇଥିଲା । ହେଲେ ଦିଲ୍ଲୀ ସରକାର ଏହାକୁ ଖାରଜ କରିଦେଇଛନ୍ତି । ଦିଲ୍ଲୀ ସରକାର କହିଛନ୍ତି କି, କୃଷକମାନେ ଯେଉଁ ଦାବି କରି ଆନ୍ଦୋଳନକୁ ଓହ୍ଲାଇଛନ୍ତି ତାହା ନାର୍ଯ୍ୟ ଦାବି । ଶାନ୍ତିପୂର୍ଣ୍ଣ ଭାବେ ଆନ୍ଦୋଳନ କରିବା ଓ ନିଜର ହକ୍ ମାଗିବାକୁ ସମ୍ବିଧାନ ଅଧିକାର ଦେଇଛି । କୃଷକ ଦେଶର ଅନ୍ନଦାତା ତେଣୁ ସେମାନଙ୍କୁ ଜେଲରେ ଭର୍ତ୍ତି କରିବା ଠିକ୍ ନୁହେଁ । ଏହି କାରଣ ଦର୍ଶାଇ ଦିଲ୍ଲୀ ପୋଲିସର ପ୍ରସ୍ତାବକୁ ଖାରଜ କରିଛନ୍ତି କେଜ୍ରିୱାଲ ସରକାର ।
ସୂଚନା ଥାଉ କି, ଆଜି ବିଭିନ୍ନ କୃଷକ ସଂଗଠନ ସେମାନଙ୍କ ଦାବି ନେଇ ଦିଲ୍ଲୀରେ ପହଂଚିବା ପରେ ରାଜଧାନୀ ସଡକ ଜାମ୍ ହୋଇଛି । ୪୮ ନମ୍ବର ଜାତୀୟ ରାଜପଥରେ ଲମ୍ବା ଲାଇନ ଲାଗିଛି । ସେହିଭଳି ୯ ନମ୍ବର ଜାତୀୟ ରାଜପଥ ଗାଜିପୁର ସୀମା ନିକଟରେ କୃଷକଙ୍କ ପ୍ରବେଶ ରୋକିବାକୁ ଲୁହାର କୀଳା ଓ ତାରବାଡ ବିଛାଯାଇଛି ।