ପରଲୋକରେ ପ୍ରଖ୍ୟାତ କଥକ ନୃତ୍ୟଗୁରୁ ପଣ୍ଡିତ ବିରଜୁ ମହାରାଜ : ୮୩ ବର୍ଷ ବୟସରେ ହୃଦଘାତରେ ଦେହାନ୍ତ

କନକ ବ୍ୟୁରୋ : ବିଶିଷ୍ଟ କଥକ ନୃତ୍ୟଗୁରୁ ପଣ୍ଡିତ ବିରଜୁ ମହାରାଜଙ୍କର ପରଲୋକ ହୋଇଛି । ୮୩ ବର୍ଷ ବୟସରେ ହୃଦଘାତରେ ତାଙ୍କର ଦେହାନ୍ତ ହୋଇଛି । ଦିଲ୍ଲୀ ସ୍ଥିତ ବାସଭବନରେ ସେ ଆଖିବୁଜିଥିବା ତାଙ୍କ ନାତି ସ୍ୱରାନ୍ସ ମିଶ୍ରା ଟ୍ୱିଟ କରି ସୂଚନା ଦେଇଛନ୍ତି । ସୂଚନା ଅନୁସାରେ, ପଣ୍ଡିତ ବିରଜୁ ମହାରାଜ ୧୬ ତାରିଖ ରାତିରେ ନିଜର ନାତି ସହିତ ଖେଳୁଥିବା ବେଳେ ହଠାତ୍ ଅସୁସ୍ଥତା ଅନୁଭବ କରିଥିଲେ । ଏହାପରେ ସେ ଚେତାଶୂନ୍ୟ ହୋଇପଡ଼ିଥିଲେ । ସଙ୍ଗେସଙ୍ଗେ ତାଙ୍କୁ ଦିଲ୍ଲୀର ସାକେତ ହସ୍ପିଟାଲକୁ ନିଆଯାଇଥିଲା । ସେଠାରେ ଡାକ୍ତରମାନେ ତାଙ୍କୁ ମୃତ ଘୋଷଣା କରିଥିଲେ । କିଛିଦିନ ଆଗରୁ ପଣ୍ଡିତ ବିରଜୁ ମହାରାଜ କିଡନି ରୋଗରେ ପୀଡ଼ିତ ହୋଇଥିଲେ ଏବଂ ତାଙ୍କର ଡାଇଲିସିସ୍ କରାଯାଉଥିଲା ।

ବିରଜୁ ମହାରାଜଙ୍କ ପ୍ରକୃତ ନାମ ହେଉଛି ବୃଜମୋହନ ମିଶ୍ର । ୪ ଫେବୃୟାରୀ ୧୯୩୮ରେ ଲକ୍ଷ୍ନୌରେ ଜନ୍ମ ଗ୍ରହଣ କରିଥିଲେ । କଥକ ନୃତ୍ୟ ପାଇଁ ପଦ୍ମବିଭୂଷଣ ସମେତ ଅନେକ ସମ୍ମାନରେ ସମ୍ମାନୀତ ହୋଇଛନ୍ତି । ଏକ ଖାନଦାନୀ କଥକ ନୃତ୍ୟଶିଳ୍ପୀ ପରିବାରରେ ଜନ୍ମିତ ବିରଜୁ ମହାରାଜ ପିଲାଟି ଦିନରୁ ନିଜର ପିତା ଜଗନ୍ନାଥ ମହାରାଜଙ୍କ ଠାରୁ ନୃତ୍ୟଶିକ୍ଷା ଆରମ୍ଭ କରିଥିଲେ । ମାତ୍ର ୧୩ ବର୍ଷ ବୟସରେ ସେ ମଂଚରେ ନୃତ୍ୟ ପରିବେଷଣ ଆରମ୍ଭ କରିଥିଲେ । ୧୯୪୭ ମସିହାରେ  ତାଙ୍କର ବାପାଙ୍କର ପରଲୋକ ହେବା ପରେ ନିଜର ଦୁଇ ଦାଦା ତଥା ଲକ୍ଷ୍ନୌ ଘରାନାର ପ୍ରସିଦ୍ଧ ନୃତ୍ୟଗୁରୁ ଲଚ୍ଛୁ ମହାରାଜ ଓ ଶମ୍ଭୁ ମହାରାଜଙ୍କ ଠାରୁ ନୃତ୍ୟର ଉଚ୍ଚତର ଶିକ୍ଷା ଗ୍ରହଣ କରିଥିଲେ । ନୃତ୍ୟ କ୍ଷେତ୍ରରେ ସକ୍ରିୟ ହେବା ପରେ ବିରଜୁ ମହାରାଜ ବେଶ ଲୋକପ୍ରିୟ ହୋଇଉଠିଥିଲେ । ଯୁବାବସ୍ଥାରେ ହିଁ ସେ ନିଜକୁ ଜଣେ ଅପ୍ରତିଦ୍ବନ୍ଦ୍ବୀ ଶିଳ୍ପୀ ତଥା ଗୁରୁ ଭାବେ ପ୍ରତିପାଦିତ କରିଥିଲେ । ଦେଶ-ବିଦେଶରେ ପଣ୍ଡିତ ବିରଜୁ ମହାରାଜଙ୍କର ବହୁ ଶିଷ୍ୟଶିଷ୍ୟା ରହିଛନ୍ତି ।