କୋଟିପତି କବାଡିବାଲାଙ୍କୁ ଟିକେଟ ଦେଲା କଂଗ୍ରେସ । ଅଦରକାରୀ ଜିନିଷ ବିକି କମାଇଛନ୍ତି କୋଟି କୋଟି ଟଙ୍କା, ପିନ୍ଧୁଛନ୍ତି କୋଟିଏ ଟଙ୍କାର ଘଣ୍ଟା ।
କନକ ବ୍ୟୁରୋ : ଅଦରକାରୀ ଜିନିଷ ବା ଭଙ୍ଗା ଲୁହା(କବାଡି) ବିକ୍ରି କରି କୋଟିପତି ହେଲେ ଓ ଏବେ କଂଗ୍ରେସ ଟିକେଟରୁ ନିର୍ବାଚନ ଲଢ଼ିବାକୁ ଯାଉଛନ୍ତି କର୍ଣ୍ଣାଟକର ଜଣେ ବ୍ୟକ୍ତି । ଆଜି ଆମେ ଆପଣଙ୍କୁ ଏମିତି ଜଣେ ବ୍ୟକ୍ତିଙ୍କ ବାବଦରେ କହିବୁ, ଯିଏ କି ଦିନେ ସଂଘର୍ଷ କରିଥିଲେ, ଆଉ ଏବେ ସେ କର୍ଣ୍ଣାଟକର ସବୁଠାରୁ ଧନୀ ରାଜନେତା ଭାବେ ପରିଚିତ ହୋଇଛନ୍ତି । ବାଙ୍ଗାଲୋର ସହରରୁ ଏମଏଲସି ନିର୍ବାଚନ ପାଇଁ ୟୁସୁଫ ସରିଫ ଓରଫ ସ୍କ୍ରାପ ବାବୁଙ୍କୁ କଂଗ୍ରେସ ଟିକେଟ ଦେଇଛି । ନିର୍ବାଚନ ଆୟୋଗକୁ ଦେଇଥିବା ଆଫିଡେଭିଟରେ ସେ ଦର୍ଶାଇଛନ୍ତି ଯେ ତାଙ୍କ ପାଖରେ ବର୍ତ୍ତମାନ ୧୭୪୩ କୋଟି ଟଙ୍କାର ସମ୍ପତ୍ତି ରହିଛି ।
Kanak News is now on WhatsApp
Join and get latest news updates delivered to you via WhatsApp
ଏହା ସହ ସେ କର୍ଣ୍ଣାଟକର ସବୁଠାରୁ ଧନୀ ରାଜନେତା ହୋଇପାରିଛନ୍ତି। ଏହାପୂର୍ବରୁ ବିଜେପିର ଜଣେ ମନ୍ତ୍ରୀ ଏମଟିବି ନାଗରାଜ ୧୨୦୦ କୋଟି ଟଙ୍କା ସମ୍ପତ୍ତି ଘୋଷଣା କରିଥିଲେ। ୫୪ ବର୍ଷୀୟ ୟୁସୁଫ ନିଜ ଆଫିଡେଭିଟରେ ଉଲ୍ଲେଖ କରିଛନ୍ତି ଯେ, ତାଙ୍କ ପାଖରେ ୧ କୋଟି ୧୦ ଲକ୍ଷ ଟଙ୍କାର ହାତଘଣ୍ଟା, ୪.୮ କିଲୋଗ୍ରାମର ସୁନା ସହ ବାଙ୍ଗାଲୋର ସହର ଏବଂ ଏହାର ଆଖପାଖରେ ଶହ ଶହ ଏକର କୃଷି ଓ ଅଣ କୃଷି ଜମି ଅଛି, ଯାହାର ମୂଲ୍ୟ ୧୫୯୩.୨୭ କୋଟି ଟଙ୍କା ।
ୟୁସୁଫ ସରିଫ ୧୪ ଭାଇଭଉଣୀଙ୍କ ମଧ୍ୟରୁ ସବୁଠାରୁ ବଡ ହୋଇଥିବାବେଳେ ସେ ରିଅଲ୍ ଇଷ୍ଟେଟ୍ ସହିତ ଅନେକ ବ୍ୟବସାୟ କରୁଛନ୍ତି । ସୂତ୍ରରୁ ମିଳିଥିବା ସୂଚନା ମୁତାବକ ତାଙ୍କ ସମ୍ପତ୍ତିର ମୂଲ୍ୟ ୪୦୦୦ କୋଟିରୁ ଅଧିକ । ୟୁସୁଫ ସରିଫ ପ୍ରଥମେ ଏକ ଅଟୋ ଚଳାଇଥିଲେ । ପରେ ସେ କବାଡି ବ୍ୟବସାୟ ଆରମ୍ଭ କଲେ, ଯାହା ତାଙ୍କ ଭାଗ୍ୟକୁ ଚମକାଇଦେଇଥିଲା ।