କନକ ବ୍ୟୁରୋ: ବେଙ୍ଗାଳୁରୁରେ ଘଟିଛି ଏକ ଅଭାବନୀୟ ଘଟଣା । ବିନାୟକ ନଗରର ବିଚ୍ ରାସ୍ତାରେ ସର୍ବସମ୍ମୁଖରେ ଜଣେ ମହିଳା ଓକିଲଙ୍କୁ ଜଣେ ବ୍ୟକ୍ତି ନିସ୍ତୁକ ମାଡ ମାରୁଥିବା ଦେଖିବାକୁ ମିଳିଛି । ମହିଳା ଓକିଲଙ୍କୁ ବ୍ୟକ୍ତି ଜଣକ ସମସ୍ତଙ୍କ ଆଗରେ ନିର୍ଦ୍ଦୟ ଭାବେ ଗୋଇଠା ବିଧା ମାରୁଥିବା ଭିଡିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି । ଏହି ସମ୍ବେଦନଶୀଳ ଘଟଣାରେ ଅଭିଯୁକ୍ତଙ୍କୁ ପୋଲିସ ଗିରଫ କରିଛି ।
Kanak News is now on WhatsApp
Join and get latest news updates delivered to you via WhatsApp
ପୋଲିସର ପ୍ରାଥମିକ ସୂଚନା ମୁତାବକ, ମହିଳା ଓକିଲଙ୍କୁ ମାଡ ମାରୁଥିବା ବ୍ୟକ୍ତି ଜଣକ ହେଉଛନ୍ତି ତାଙ୍କ ପଡୋଶୀ ମହାନ୍ତେଶ । ଭାଇରାଲ ହୋଇଥିବା ଭିଡିଓରେ ବ୍ୟକ୍ତି ଜଣକ ମହିଳାଙ୍କୁ ଗୋଇଠା ବିଧା ମାରୁଛନ୍ତି । ମହିଳା ଓକିଲ ଜଣକ ନିଜକୁ ବଞ୍ଚାଇବାକୁ ପ୍ରତିରୋଧ କରିଥିବାବେଳେ ମହାନ୍ତେଶ ଅଧିକ ଆକ୍ରମଣାତ୍ମକ ହୋଇପଡୁଥିବା ଦେଖିବାକୁ ମିଳିଛି । ଏହି ଘଟଣା ସମସ୍ତଙ୍କ ସାମ୍ନାରେ ଘଟୁଥିଲେ ବି ମହିଳାଙ୍କୁ ରକ୍ଷା କରିବାକୁ କେହି ବି ଆସିନଥିଲେ । ବରଂ କିଛି ଲୋକ ସେଠାରେ ଏକାଠି ହୋଇ ଘଟଣାଟିକୁ ନିଜ ମୋବାଇଲରେ କଏଦ କରିବାରେ ବ୍ୟସ୍ତ ଥିଲେ ।
ବ୍ୟକ୍ତିଗତ ଶତ୍ରୁତାକୁ ନେଇ ଦୁହିଁଙ୍କ ମଧ୍ୟରେ ଏପରି ମାଡଗୋଳ ହୋଇଥିବା କୁହାଯାଉଛି । ପ୍ରଥମେ ଦୁହିଁଙ୍କ ମଧ୍ୟରେ ବଚସା ଓ ତା’ପରେ ମହାନ୍ତେଶ ମହିଳାଙ୍କୁ ଗୋଇଠା, ଚାପୁଡା ମାରିଥିଲେ । ଏହି ଭିଡିଓ ଭାଇରାଲ ହେବାରେ ଏହାକୁ ତୀବ୍ର ନିନ୍ଦା କରାଯିବା ସହ ଲୋକଗହଳି ସ୍ଥାନରେ ବି ମହିଳା କେତେ ସୁରକ୍ଷିତ ବୋଲି ପ୍ରଶ୍ନ ଉଠୁଛି ।