କର୍ଣ୍ଣାଟକ ବୁଥ ବାହୁଡା ମତ ପରେ ଆସିଲା ରାହୁଲ ଗାନ୍ଧୀଙ୍କ ପ୍ରତିକ୍ରିୟା, ଦଳର ନେତା ଓ କାର୍ଯ୍ୟକର୍ତ୍ତାଙ୍କ ଉଦ୍ଦେଶ୍ୟରେ କହିଲେ ଏଭଳି କଥା

କନକ ବ୍ୟୁରୋ : କର୍ଣ୍ଣାଟକ ବିଧାନସଭା ନିର୍ବାଚନ ପାଇଁ ଆଜି ଭୋଟ ଗ୍ରହଣ ସମାପ୍ତ ହୋଇଛି । ଭୋଟ ଗ୍ରହଣ ପରେ ବିଭିନ୍ନ ସର୍ଭେ ଏଜେନ୍ସି ଦ୍ୱାରା କରାଯାଇଥିବା ବୁଥ ବାହୁଡା ମତ ପ୍ରକାଶ ପାଇଛି । ଏହି ଏକ୍ସିଟ୍ ପୋଲ ଆସିବା ପରେ କଂଗ୍ରେସ ନେତା ରାହୁଲ ଗାନ୍ଧୀ ଟ୍ୱିଟ୍ କରିଛନ୍ତି । ସେ ତାଙ୍କ ଟ୍ୱିଟ ମାଧ୍ୟରେ କଂଗ୍ରେସ ନେତା ଓ କାର୍ଯ୍ୟକର୍ତ୍ତାଙ୍କୁ ଗାରିମାପୂର୍ଣ୍ଣ ଅଭିଯାନ ପାଇଁ ଧନ୍ୟବାଦ ଦେଇଛନ୍ତି ।

ସେ ତାଙ୍କ ଟ୍ୱିଟରରେ ଲେଖିଛନ୍ତି କି, ପ୍ରଗତିଶୀଳ ଭବିଷ୍ୟତ ପାଇଁ କର୍ଣ୍ଣାଟକବାସୀ ବହୁସଂଖ୍ୟାରେ ମତଦାନ କରିଥିବାରୁ ସେ କର୍ଣ୍ଣାଟକର ଭୋଟରଙ୍କୁ ଧନ୍ୟବାଦ ଦେଇଛନ୍ତି । କର୍ଣ୍ଣାଟକରେ ୨୨୪ ବିଧାନସଭା ଆସନ ପାଇଁ ଭୋଟ ଗ୍ରହଣ ହୋଇଛି । ଏଥିରେ ଅପରାହ୍ନ ୫ଟା ସୁଦ୍ଧା ୬୫.୬୯ ଭୋଟ ଗ୍ରହଣ ହୋଇଥିବା ଭାରତୀୟ ନିର୍ବାଚନ କମିଶନ ସୂଚନା ଦେଇଛନ୍ତି । ମତଦାନ ପରେ ଆସିଥିବା ଭୋଟ ବାହୁଡା ମତରୁ କଂଗ୍ରେସ ସବୁଠାରୁ ବଡ ପାର୍ଟି ବୋଲି ଆକଳନ କରାଯାଇଛି ।

I want to thank the Babbar Sher workers and leaders of Congress for a well-run, dignified and solid people-oriented campaign.

Thank you to the people of Karnataka for coming out in large numbers to vote for a progressive future.

— Rahul Gandhi (@RahulGandhi) May 10, 2023

ଭୋଟ ବାହୁଡା ମତ ନେଇ ବିଭିନ୍ନ ସର୍ଭେ ସଂସ୍ଥାର ଏକ୍ସିଟ ପୋଲ ଆସିଛି । ଇଣ୍ଡିଆ ଟୁଡେର ସର୍ଭେ ମୁତାବକ କଂଗ୍ରେସକୁ ୧୨୨-୧୪୦ ଆସନ, ବିଜେପିକୁ ୬୨-୮୦ ଓ ଜେଡିଏସକୁ ୨୦-୨୫ ଆସନ ମିଳିବାକୁ ଯାଉଛି । ସେହିଭଳି ଜନ କି ବାତର ସର୍ଭେ ମୁତାବକ କଂଗ୍ରେସ ୯୧-୧୦୬, ବିଜେପି ୯୪-୧୧୭ ଓ ଜେଡିଏସ ୧୪-୨୪ । ଅନ୍ୟପଟେ ସି ଭୋଟର ସର୍ଭେ ମୁତାବକ କଂଗ୍ରେସକୁ ୧୦୦-୧୧୨, ବିଜେପିକୁ ୮୮-୯୮ ଓ ଜେଡିଏସକୁ ୨୧-୨୬ ଆସନ ମିଳିପାରେ ।