କର୍ଣ୍ଣାଟକରେ କାହିଁକି ହାରିଲା ବିଜେପି? ପଢନ୍ତୁ, ‘ପଦ୍ମ’ ଦଳର ପରାଜୟ ପଛରେ ଥିବା ୫ ପ୍ରମୁଖ କାରଣ…

କନକ ବ୍ୟୁରୋ: କର୍ଣ୍ଣାଟକରେ ପୁଣି ହାତ ଉଠିଛି, ଆଉ ପଦ୍ମ ମଉଳିଛି । ୩୫ ବର୍ଷ ଧରି ଜାରି ରହିଥିବା ସରକାର ପରିବର୍ତ୍ତନର ପରମ୍ପରା ଏଥର ବି ଦେଖିବାକୁ ମିଳିଥିବାବେଳେ, କଂଗ୍ରେସକୁ କର୍ଣ୍ଣାଟକରେ ମିଳିଛି ବଡ ବିଜୟ । ତେବେ ଦକ୍ଷିଣ ଭାରତର ଏହି ରାଜ୍ୟରେ କାହିଁକି ହାରିଲା ବିଜେପି? ମୋଦୀଙ୍କ ଲଗାତାର ରୋଡ୍ ସୋ’ ଏବଂ ରାଲି ପରେ କାହିଁକି ଏତେ ନୈରାଶ୍ୟଜନକ ପ୍ରଦର୍ଶନ କଲା ଭାରତୀୟ ଜନତା ପାର୍ଟି? ଏବେ ଚାଲିଛି ଏହି ପ୍ରଶ୍ନର କାରଣ ଖୋଜା ।

ତେବେ ନଜର ପକାନ୍ତୁ, କର୍ଣ୍ଣାଟକରେ ବିଜେପି ପରାଜୟ ପଛର କିଛି ପ୍ରମୁଖ କାରଣ ଉପରେ…

ସରକାର ବିରୋଧୀ ହାୱା

କର୍ଣ୍ଣାଟକରେ ବିଜେପି ପରାଜୟ ପଛର ପ୍ରମୁଖ କାରଣ ଭିତରୁ ଗୋଟିଏ ହେଲା ସରକାର ବିରୋଧୀ ହାୱା । ଏଥର କର୍ଣ୍ଣାଟକ ନିର୍ବାଚନରେ ସତ୍ତା ବିରୋଧୀ ହାୱା ପ୍ରବଳ ମାତ୍ରାରେ ଦେଖିବାକୁ ମିଳିଥିଲା । ବୋମାଇ ସରକାର ବିରୋଧରେ ଲୋକଙ୍କ ମନରେ ଥିବା ଅସନ୍ତୋଷ ଭୋଟରେ ବଦଳିଥିଲା । । ତେବେ ସୂଚନା ମୁତାବକ, ବିଜେପିର କେନ୍ଦ୍ରୀୟ ନେତୃତ୍ୱ ଏନେଇ ଆଭାସ ପାଇଥିଲେ, ଦିଲ୍ଲୀରେ ମଧ୍ୟ ଏହାକୁ ନେଇ ମିଟିଂ ହୋଇଥିଲା । ହେଲେ କୌଣସି ଫଳାଫଳ କିନ୍ତୁ ଦେଖିବାକୁ ମିଳିନଥିଲା । ପିଏମ୍ ମୋଦୀଙ୍କ ନେତୃତ୍ୱରେ ଦଳ ନିର୍ବାଚନ ମୈଦାନକୁ ଓହ୍ଲାଇଥିଲେ ବି, ସତ୍ତା ବିରୋଧୀ ହାୱା କାରଣରୁ ୩୫ ବର୍ଷ ଧରି ଚାଲିଆସିଥିବା ସରକାର ପରିବର୍ତ୍ତନର ପରମ୍ପରା ଏଥର ମଧ୍ୟ କାୟମ୍ ରହିଥିଲା ।

ନ୍ୟାସନାଲ ମୁଦ୍ଦା ଉପରେ ସ୍ଥାନୀୟ ମୁଦ୍ଦା ଭାରି

ଏଥର କର୍ଣ୍ଣାଟକ ନିର୍ବାଚନରେ କଂଗ୍ରେସ ମୁଖ୍ୟତଃ ସ୍ଥାନୀୟ ମୁଦ୍ଦାକୁ ସାମ୍ନାକୁ ଆଣିଥିଲା । ଯେମିତି କି ଭ୍ରଷ୍ଟାଚାର ମୁଦ୍ଦାକୁ କଂଗ୍ରେସ ଜୋରସୋରରେ ପ୍ରଚାରରେ ଉଠାଇଥିଲା, ଆଉ ସରକାର ବିରୋଧୀ ହାୱା ଭିତରେ କଂଗ୍ରେସର ଏହି ଗେମ୍ ପ୍ଲାନ୍ ସଠିକ୍ ମଧ୍ୟ ସାବ୍ୟସ୍ତ ହୋଇଥିଲା । ଗୋଟିଏ ପଟେ ବିଜେପି ଜାତୀୟ ମୁଦ୍ଦାକୁ ନେଇ ପ୍ରଚାର ମୈଦାନକୁ ଓହ୍ଲାଉଥିବାବେଳେ, କଂଗ୍ରେସ କିନ୍ତୁ ଲୋକାଲ ମୁଦ୍ଦାକୁ ନେଇ ରଣନୀତି ପ୍ରସ୍ତୁତ କରିଥିଲା । ଯାହା ଦଳକୁ ଆଜି ବଡ ବିଜୟ ଦେବାରେ ପ୍ରମୁଖ ଭୂମିକା ନେଇଥିବା କୁହାଯାଉଛି ।

ୟେଦୁରପ୍ପାଙ୍କୁ ଅଣଦେଖା କରିବା ପଡିଲା ଭାରି

କର୍ଣ୍ଣାଟକରେ ବିଜେପି ପରାଜୟ ପଛର ଆଉ ଏକ ବଡ କାରଣ ହେଲା ଦଳର ସବୁଠୁ ଅନୁଭବୀ ନେତା ବିଏସ୍ ୟେଦୁରପ୍ପାଙ୍କୁ ଅଣଦେଖା କରିବା । ଏହାସତ ଯେ, କର୍ଣ୍ଣାଟକରେ ବିଏସ୍ ୟେଦୁରପ୍ପା ହେଉଛନ୍ତି ବିଜେପିର ସବୁଠୁ ଲୋକପ୍ରିୟ ନେତା । ତେଣୁ ବିଜେପି ତାଙ୍କୁ ଯେତେବେଳେ ମାର୍ଗଦର୍ଶନ ମଣ୍ଡଳରେ ସାମିଲ କଲା, ସେତେବେଳେ ଏହି ନିଷ୍ପତ୍ତିକୁ ନେଇ ଲିଙ୍ଗାୟତ ସମୁଦାୟ ଖୁସି ନଥିଲା । ଫଳସ୍ୱରୂପ ଲିଙ୍ଗାୟତ ବହୁଳ ଅଞ୍ଚଳରେ ବିଜେପି ପଛରେ ପଡିବା ସହିତ ଅଧିକ ସିଟ୍ ଜିତିବାକୁ ସକ୍ଷଣ ହୋଇନଥିଲା । ମହାରାଷ୍ଟ୍ର-କର୍ଣ୍ଣାଟକ ସୀମାବର୍ତ୍ତୀ ଅଞ୍ଚଳରେ ଗତଥର ବିଜେପି ୩୦ ସିଟ୍ ଜିତିଥିବାବେଳେ, ଏଥର କିନ୍ତୁ ଏହାର ପରିମାଣ ୧୪ ତଳକୁ ଖସିଆସିଛି । ଅନ୍ୟପଟେ ମୁଖ୍ୟମନ୍ତ୍ରୀ ବାସବରାଜ ବୋମାଇ ଲିଙ୍ଗାୟତ ସମୁଦାୟରୁ ଆସୁଥିଲେ ବି, ତାଙ୍କର ପ୍ରଭାବ ଲୋକଙ୍କ ଉପରେ ସେତେଟା ପଡିନଥିବା ଦେଖିବାକୁ ମିଳିନଥିଲା ।

ବିଜେପିକୁ ଭାରିପଡିଲା ଧ୍ରୁବୀକରଣ ରାଜନୀତି!

କର୍ଣ୍ଣାଟକରେ ଧ୍ରୁବୀକରଣ ରାଜନୀତିକୁ ଲୋକ ପସନ୍ଦ କରିନାହାଁନ୍ତି । ବଜରଙ୍ଗ ଦଳର ତୁଳନା ବଜରଙ୍ଗବଲୀଙ୍କ ସହ କରିବା ବିଜେପି ପାଇଁ ଭାରିପଡିଛି । କଂଗ୍ରେସ ନିଜର ନିର୍ବାଚନୀ ଇସ୍ତହାରରେ କହିଥିଲା ଯେ, ଇଲେକ୍ସନ ଜିତିଲେ ବଜରଙ୍ଗଦଳକୁ ବ୍ୟାନ୍ କରିବ । ଏହି ମୁଦ୍ଦାକୁ ବିଜେପି ମଧ୍ୟ ଉଠାଇ, କଂଗ୍ରେସକୁ କାଉଣ୍ଟର କରିଥିଲା । ଖୋଦ୍ ପିଏମ୍ ମୋଦୀ ମଧ୍ୟ ଏହି କଥା ରାଲିରେ ଉଠାଇଥିଲେ । ହେଲେ ଏହାର ପ୍ରଭାବ କିନ୍ତୁ ଲୋକଙ୍କ ଉପରେ ପଡିନି । ଅନ୍ୟପଟେ ନିର୍ବାଚନ ପୂର୍ବରୁ ବିଜେପି ସଂରକ୍ଷଣ କାର୍ଡ ଖେଳିଥିଲା । ଅଳ୍ପସଂଖ୍ୟକ ମୁସଲିମଙ୍କ ୪ ପ୍ରତିଶତ ସଂରକ୍ଷଣକୁ କାଟି ଏହାକୁ ଲିଙ୍ଗାୟତ ଓ ବୋକ୍କାଲିଙ୍ଗାଙ୍କ ଭିତରେ ବାଣ୍ଟି ଦେଇଥିଲା । ତା ସହିତ ଫିଲ୍ମ କେରଳ ଷ୍ଟୋରୀ କଥା ମଧ୍ୟ କର୍ଣ୍ଣାଟକରେ ଉଠିଥିଲା । ହେଲେ ଏ ସବୁ ଭିତରେ ବି ବିଜେପିକୁ ପରାଜୟ ଭୋଗିବାକୁ ପଡିଛି ।କର୍ଣ୍ଣାଟକ ବିଜେପିରେ ଗୋଷ୍ଠୀକନ୍ଦଳ

କର୍ଣ୍ଣାଟକ ବିଜେପିରେ ଗୋଷ୍ଠୀ କନ୍ଦଳ ଦଳ ପାଇଁ କ୍ଷତିକାରୀ ସାବ୍ୟସ୍ତ ହୋଇଛି । ଗୋଟିଏ ପଟେ କଂଗ୍ରେସ ବେଳ ଥାଉ ନିଜର କନ୍ଦଳକୁ ବୁଝି ଏହାର ସମାଧାନ ପାଇଁ ଆଗକୁ ବଢିଥିଲା । ହେଲେ କର୍ଣ୍ଣାଟକ ବିଜେପିରେ କିନ୍ତୁ ଲଗାତାର ଦଳୀୟ କନ୍ଦଳ ରହିଥିଲା ବୋଲି ରାଜନୈତିକ ପଣ୍ଡିତମାନେ କହୁଛନ୍ତି । ୟେଦୁରପ୍ପାଙ୍କୁ ସାଇଡ୍ ଲାଇନ୍ କରିବା ପରେ ଦଳରେ କନ୍ଦଳ ବଢିଯାଇଥିଲା । ନିର୍ବାଚନର କିଛି ଦିନ ପୂର୍ବରୁ ହିଁ ୟେଦୁରପ୍ପା ଜଗଦୀଶ ସେଟ୍ଟରଙ୍କ ପାଇଁ ପ୍ରଚାର କରିଥିଲେ । ହେଲେ ଜଗଦୀଶ କଂଗ୍ରେସ ଶିବିରରେ ସାମିଲ ହେବା ସହିତ ଲିଙ୍ଗାୟତ ଭୋଟକୁ ନିଜ ପକ୍ଷରେ ନେଇଥିବା କୁହାଯାଉଛି । ଯାହାର ପ୍ରଭାବ ସିଟ୍ ସଂଖ୍ୟା ଉପରେ ମଧ୍ୟ ପଡିଛି ।
ତେବେ ଏ ସବୁ ଭିତରେ କର୍ଣ୍ଣାଟକରେ କଂଗ୍ରେସକୁ ମିଳିଛି ବଡ ବିଜୟ । ଦଳ ପୁଣିଥରେ ଦକ୍ଷିଣ ଭାରତର ଏହି ରାଜ୍ୟରେ ସରକାର ଗଢିବାକୁ ଯାଉଛି । ତେବେ ବିଜେପି ଏଠି କାହିଁକି ହାରିଲା, କାହିଁକି ପୁଣିଥରେ ସରକାର ଗଠନ କରିବାକୁ ଅକ୍ଷମ ହେଲା, ସେ ନେଇ ଚାଲିଛି ଚର୍ଚ୍ଚା ଆଲୋଚନା ।