ଶବକୁ ସମ୍ମାନ ଦେଲାନି ସଂକ୍ରମଣ ସନ୍ଦେହ: ହାତୀ ପାଦ ତଳେ ପ୍ରାଣ ହରାଇବା ପରେ ପାଖ ମାଡିଲେନି ପରିଜନ । ଆପଣା ଲୋକେ ପର କରିବା ପରେ ପୋଲିସ ଆଗେଇ ଆସିଲା, ଶ୍ମଶାନରେ ଅନ୍ତିମ ସଂସ୍କାର କଲା…
ପ୍ରଶ୍ନ ଉଠୁଛି ଯେବେ ମହାମାରୀର ଏ ମାୟାଜାଲ ଛିଡିବ ସେତେବେଳେ ସନ୍ଦେହ ଘେରରେ ଥିବା ସମ୍ପର୍କର ସୂତା ପୁଣି ଥରେ ଯୋଡି ହେବ ତ ? କରୋନା ପାଇଁ କବର ନେଇଥିବା ମାନବିକତା ପୁଣି ଥରେ ମୁଣ୍ଡଟେକି ମୁହଁ ଦେଖାଇ ପାରିବ ତ ?
କନକ ବୁରୋ: ଭରସା ଭାଙ୍ଗୁଛି ଭୂତାଣୁ ଭୟ । ବିଶ୍ୱାସ ବୁଡାଉଛି ସଂକ୍ରମଣ ସନ୍ଦେହ । କରୋନା ପାଇଁ ଲୋକଙ୍କ ମନରୁ ମରି ଗଲାଣି ବିଶ୍ୱାସ । ସନ୍ଦେହ ପାଇଁ ସମାଜରୁ ଲିଭିବାକୁ ବସିଲାଣି ବିଶ୍ୱାସ ବୋଲି ଶବ୍ଦ । ପର ତ ପର ଆପଣାର ଲୋକେ ବି ଆଡ ଆଖିରେ ଦେଖୁ ନାହାନ୍ତି । ସଂକ୍ରମିତ ହୋଇଯିବା ଭୟରେ ପାଖ ମାଡୁ ନାହାନ୍ତି । ଆଉ ମଲା ପରେ ମୃତଦେହକୁ ନିଜର ଲୋକେ ବି ନେବାକୁ ଆସୁ ନାହାନ୍ତି । ଆଜି ଆମେ ଆପଣଙ୍କୁ ଏମିତି ଏକ କାହାଣୀ କହିବୁ ଯାହା ଶୁଣିଲା ପରେ ଆପଣ ବି କହିବେ, ସତରେ ! ଏ ସନ୍ଦେହ ପାଇଁ ସମାଧି ନେଇଛି ମଣିଷପଣିଆ…
Kanak News is now on WhatsApp
Join and get latest news updates delivered to you via WhatsApp
କର୍ଣ୍ଣାଟକ ମୈସୁର ଚାମରାଜନଗର ଅଞ୍ଚଳରେ ଜଣେ ମାନସିକ ବିକାରଗ୍ରସ୍ତ ଲୋକଙ୍କୁ ଦଳି ମାରିଦେଇଥିଲା ହାତୀ । ଜଙ୍ଗଲୀ ଇଲାକା ହୋଇଥିବାରୁ ହାତୀ ପାଦତଳେ ଯାଇଥିଲା ୪୪ ବର୍ଷୀୟ ବ୍ୟକ୍ତିଙ୍କ ଜୀବନ । ତେବେ ପୋଷ୍ଟମର୍ଟମ ପରେ ମୃତଦେହକୁ ନେଇନଥିଲେ ମୃତ ବ୍ୟକ୍ତିଙ୍କ ପରିବାର ଲୋକ । ମାନସିକ ବିକାରଗ୍ରସ୍ତ ଥିବାରୁ କାଳେ ସଂକ୍ରମିତ ହୋଇଥିବେ ସେହି ସନ୍ଦେହରେ ପାଖ ମାଡିନଥିଲେ ପରିଜନ ।
ତେବେ ଆପଣାର ଲୋକେ ପର କରିଦେବା ପରେ ଆଗେଇ ଆସିଲା ପୋଲିସ । ଶବକୁ ଶେଷ ସମ୍ମାନ ଦେବାକୁ ଯେଉଁଠି ରକ୍ତ ସମ୍ପର୍କ କୁଣ୍ଠାବୋଧ କରୁଛନ୍ତି ସେଇଠି ରକ୍ଷାକର୍ତ୍ତା କୋଳେଇ ନେଇଥିଲେ । ଆତ୍ମୀୟ ସିନା ଚାହିଁଲେନି ହେଲେ ସଙ୍କଟ ସମୟର ସିପାହୀ ସମ୍ମାନର ସହ ଶବ ସକ୍ରାର କଲେ । ହିନ୍ଦୁ ରିତୀନୀତିରେ ମୃତ ବ୍ୟକ୍ତିଙ୍କ ଅନ୍ତିମ ସଂସ୍କାର କଲେ ୩ ପୋଲିସ ।
ଏମିତିକି ସନ୍ଦେହ ପାଇଁ ଯେତେବେଳେ ପରିବାର ଲୋକେ ଶବକୁ ଛୁଇଁଲେନି । ସେଠି ଗାଁ ଲୋକେ ବା କେମିତି ଆସନ୍ତେ । ତେଣୁ ବାଧ୍ୟ ହୋଇ ନିଜେ ମାଟି ଖୋଳି ଶବକୁ ସମାଧି ଦେଇଥିଲେ ଆଉ ଧୂପ ଜଳାଇ ଆତ୍ମାର ସଜଗତି ପାଇଁ ପ୍ରାର୍ଥନା କରିଥିଲେ । ତେବେ ଏଠି ପ୍ରଶ୍ନ ଉଠୁଛି ଯେବେ ମହାମାରୀର ଏ ମାୟାଜାଲ ଛିଡିବ ସେତେବେଳେ ସନ୍ଦେହ ଘେରରେ ଥିବା ସମ୍ପର୍କର ସୂତା ପୁଣି ଥରେ ଯୋଡି ହେବ ତ ? କରୋନା ପାଇଁ କବର ନେଇଥିବା ମାନବିକତା ପୁଣି ଥରେ ମୁଣ୍ଡଟେକି ମୁହଁ ଦେଖାଇ ପାରିବ ତ ?