ରାଜନୀତିରେ ଏଣ୍ଟ୍ରି ମାରିଲେ ଦବଙ୍ଗ ଆଇପିଏସ ଅଫିସର । କାନପୁର ପୋଲିସ କମିଶନରଙ୍କ ଭିଆରଏସ ସ୍ୱୀକାର, ବିଜେପି ଟିକେଟରେ ଲଢିପାରନ୍ତି ନିର୍ବାଚନ ।

କନକ ବ୍ୟୁରୋ : କାନପୁର ପୋଲିସ କମିଶନର ଅସୀମ ଅରୁଣଙ୍କ ଭିଆରଏସ ଆବେଦନ ମଞ୍ଜୁର ହୋଇଛି । ଆଉ ଏହାସହ ଅସୀମ ଆଇପିଏସ ପଦରୁ ସେବାନିବୃତ ହୋଇଛନ୍ତି । ଖାକି ବର୍ଦ୍ଦିକୁ ବାଏ ବାଏ କରି ଏବେ ପଲିଟିକାଲ ମୈଦାନରେ ନିଜର ଭାଗ୍ୟ ପରୀକ୍ଷା କରିବାକୁ ଯାଉଛନ୍ତି ଅସୀମ । ମିଳିଥିବା ସୂଚନା ମୁତାବକ, ଅସୀମ ଅରୁଣ କନୌଜ ଆସନରୁ ବିଜେପି ଟିକେଟରୁ ନିର୍ବାଚନ ଲଢିପାରନ୍ତି । ତେବେ ନିର୍ବାଚନ ମୈଦାନକୁ ଓହ୍ଲାଇବା ପୂର୍ବରୁ ସେ ଭିଆରଏସ ନେଇଛନ୍ତି ।

ଅସୀମ ଅରୁଣ ଶନିବାର ପୋଲିସ ଚାକିରିରୁ ଭିଆରଏସ ନେବା ପରେ ବିଜେପି ସଦସ୍ୟତା ଗ୍ରହଣ କରିଥିଲେ । ଶନିବାର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କୁ ଭେଟିବା ପରେ ଅସୀମ ଅରୁଣ ଚାକିରି ଛାଡିବାକୁ ନିଷ୍ପତ୍ତି ନେଇଥିଲେ । ଅସୀମ ଅରୁଣ କନୌଜର ଠଠିଆର ବାସିନ୍ଦା । ତେଣୁ ଏହି ସ୍ଥାନକୁ ସେ ନିଜର ରାଜନୈତିକ କ୍ୟାରିୟର କର୍ମଭୂମି କରିବାକୁ ଚାହୁଁଛନ୍ତି ।

ଶନିବାର ବିଜେପିରେ ସାମିଲ ହେବା ପରେ ଅସୀମ ଏକ ଫେସବୁକ୍ ପୋଷ୍ଟ କରିଥିଲେ ଯେଉଁଥିରେ ଲେଖିଥିଲେ ଯେ, ତାଙ୍କୁ ଯୋଗୀ ଆଦିତ୍ୟନାଥଙ୍କ ତରଫରୁ ବିଜେପିରେ ସାମିଲ ହେବାକୁ ଅଫର ମିଳିଥିଲା । ଏଥିପାଇଁ ଯୋଗ୍ୟ ଭାବିଥିବାରୁ ଖୁସିବ୍ୟକ୍ତ କରିଥିଲେ ଅସୀମ ଅରୁଣ । ଏହାସହ ଅସୀମ କହିଛନ୍ତି, ମହାତ୍ମା ଗାନ୍ଧୀଙ୍କ ସିଦ୍ଧାନ୍ତକୁ ନେଇ ଆଗକୁ ବଢିବି, କାମ କରିବି । ସମାଜର ପ୍ରତି ବର୍ଗକୁ ସମ୍ମାନ ଦେବା ପାଇଁ ପରିଶ୍ରମ କରିବି ।

ଏହାସହ ଫେସବୁକ୍ ପୋଷ୍ଟରେ ଅସୀମ ଦୁଃଖ ପ୍ରକାଶ କରିବା ସହ କହିଛନ୍ତି, ମୁଁ ପୁଣିଥରେ ପୋଲିସ ପୋଷାକ ପିନ୍ଧିପାରିବି ନାହିଁ । କଷ୍ଟ ଲାଗୁଛି ଯେ, ନିଜ ଆଲମାରୀରେ ସବୁଠୁ ସୁନ୍ଦର ପୋଷାକକୁ ଆଉ କେବେ ପିନ୍ଧିପାରିବି ନାହିଁ । ତେବେ ପ୍ରତିଶ୍ରୁତି ଦେଉଛି ଯେ, ଏହି ବର୍ଦ୍ଦିର ସମ୍ମାନ ପାଇଁ ସବୁଠୁ ଆଗରେ ଛିଡା ହେବି ।