କନକ ବ୍ୟୁରୋ : ଆସନ୍ତା ୨୮ ତାରିଖରେ କଂଗ୍ରେସରେ ସାମିଲ ହୋଇପାରନ୍ତି କହ୍ନେୟା କୁମାର ଏବଂ ଜିଗ୍ନେଶ ମେୱାନି । ସିପିଆଇ ନେତା ତଥା ପୂର୍ବତନ ଜେଏନୟୁ ଛାତ୍ର ସଂସଦ ସଭାପତି କହ୍ନେୟା କୁମାର ଆସନ୍ତା ୨୮ରେ କଂଗ୍ରେସରେ ଯୋଗ ଦେଇପାରନ୍ତି । ମିଳିଥିବା ସୂଚନା ଅନୁସାରେ ଏହା ଭିତରେ କଂଗ୍ରେସର ପୂର୍ବତନ ସଭାପତି ରାହୁଲ ଗାନ୍ଧୀଙ୍କୁ କହ୍ନେୟା କୁମାର ଭେଟିଥିବା କୁହାଯାଉଛି । ତେଣୁ ଖୁବଶୀଘ୍ର କଂଗ୍ରେସରେ କହ୍ନେୟା ସାମିଲ ହେବା ନେଇ ଚର୍ଚ୍ଚା ବଢିଛି । ଏପରିକି କଂଗ୍ରେସ ପକ୍ଷରୁ ମଧ୍ୟ କହ୍ନେୟା କୁମାରଙ୍କୁ ଦଳରେ ସାମିଲ କରିବା ନେଇ ଶୀର୍ଷ ନେତୃତ୍ୱଙ୍କ ମଧ୍ୟରେ ମାନସମନ୍ଥନ ଚାଲିଛି ।
Kanak News is now on WhatsApp
Join and get latest news updates delivered to you via WhatsApp
ସେହିଭଳି ଆସନ୍ତାବର୍ଷ ଗୁଜୁରାଟରେ ନିର୍ବାଚନ ହେବାକୁ ଥିବା ବେଳେ ସ୍ୱାଧୀନ ବିଧାୟକ ଜିଗ୍ନେଶ ମେୱାନିଙ୍କୁ ଦଳରେ ସାମିଲ କରିବାକୁ ଉଦ୍ୟମ ଆରମ୍ଭ ହୋଇଛି । ଜିଗ୍ନେଶଙ୍କ ଭଳି ଯୁବ ଚେହେରାଙ୍କୁ ଦଳରେ ସାମିଲ କରି ଗୁଜୁରାଟରେ ଶକ୍ତି ବଢାଇବାକୁ ଚାହୁଁଛି କଂଗ୍ରେସ । ଆଉ ଜିଗ୍ନେଶଙ୍କ ପକ୍ଷରୁ ମଧ୍ୟ କଂଗ୍ରେସରେ ସାମିଲ ହେବା ନେଇ ଗ୍ରୀନ୍ ସିଗନାଲ ମିଳିଥିବା କୁହାଯାଉଛି । ପଟିଦାର ଆନ୍ଦୋଳନରୁ ଜିଗ୍ନେଶଙ୍କ ରାଜନୈତିକ ଯାତ୍ର୍ରା ଆରମ୍ଭ ହୋଇଥିଲା । ୨୦୧୭ ଗୁଜୁରାଟ ବିଧାନସଭା ନିର୍ବାଚନରେ ସ୍ୱାଧୀନ ଭାବେ ଲଢି ବିଜୟୀ ହୋଇଥିଲେ ଜିଗ୍ନେଶ । ଏହାଛଡା ଦଳିତ ସମ୍ପ୍ରଦାୟର ହୋଇଥିବାରୁ କଂଗ୍ରେସ ଜିଗ୍ନେଶଙ୍କ ମାଧ୍ୟମରେ ଗୁଜୁରାଟରେ ଦଳିତ ଭୋଟବ୍ୟାଙ୍କ ହାତେଇବାକୁ ଲକ୍ଷ୍ୟ ରଖିଛି ।
ଅନ୍ୟପଟେ ଗତ ୨୦୧୯ରେ ବିହାରର ବେଗୁସରାଇ ଆସନରୁ ସିପିଆଇ ଟିକେଟରୁ ଲୋକସଭା ନିର୍ବାଚନ ଲଢିଥିଲେ କହ୍ନେୟା । ଏପରିକି କହ୍ନେୟାଙ୍କ ରାଲିରେ ପ୍ରବଳ ଭିଡ଼ ହେଉଥିବା ବେଳେ ଯୁବବର୍ଗଙ୍କ ମଧ୍ୟରେ କ୍ରେଜ ରହିଥିଲା । କିନ୍ତୁ ଲୋକସଭା ନିର୍ବାଚନରେ ଗିରିରାଜଙ୍କ ଠାରୁ ମାତ୍ ଖାଇଥିଲେ କହ୍ନେୟା । ତେବେ ଏହାପରେ ମୋଦି ସରକାରଙ୍କୁ ନେଇ କହ୍ନେୟାଙ୍କର ଯେଉଁ ଆଭିମୁଖ୍ୟ ରହିଥିଲା ତାହାକୁ ଦେଶର ଯୁବବର୍ଗ ବେଶ ପସନ୍ଦ କରିଥିଲେ । ଆଉ ଏଭଳି ଜଣେ ନେତାଙ୍କୁ ଦଳରେ ସାମିଲ କରିବାକୁ କଂଗ୍ରେସ ପକ୍ଷରୁ କସରତ ଆରମ୍ଭ ହୋଇଛି । ଗୋଟିଏ ପଟେ ସିପିଆଇ ନେତୃତ୍ୱ ସହ କହ୍ନେୟାଙ୍କର ସମ୍ପର୍କ ଭଲ ନଥିବା ବେଳେ ବିଭିନ୍ନ ପ୍ରସଙ୍ଗକୁ ନେଇ ବୟାନବାଜି ଜାରି ରହିଛି । ଏପରିକି ହାଇଦ୍ରାବାଦରେ ବସିଥିବା ଦଳର ବୈଠକରେ ପାଟନା ମାରପିଟ୍ ମାମଲାକୁ ନେଇ କହ୍ନେୟାଙ୍କ ନାଁରେ ନିନ୍ଦା ପ୍ରସ୍ତାବ ପାରିତ ହୋଇଥିଲା । ଯାହାକୁ ନେଇ ଦଳର ଶୀର୍ଷ ନେତୃତ୍ୱଙ୍କ ଉପରେ ଅସନ୍ତୁଷ୍ଟ ଥିଲେ କହ୍ନେୟା । ଆଉ ଏଭଳି ସ୍ଥଳେ ଖବୁଶୀଘ୍ର କହ୍ନେୟା କଂଗ୍ରେସର ହାତ ଧରିବା ନେଇ ଚର୍ଚ୍ଚା ଆରମ୍ଭ ହୋଇଛି ।
CPI leader Kanhaiya Kumar and RDAM MLA Jignesh Mewani from Gujarat to join Congress on September 28: Sources
(file phots of Mewani and Kumar, respectively) pic.twitter.com/9lCzGBvBme
— ANI (@ANI) September 25, 2021
କଂଗ୍ରେସରେ କହ୍ନେୟା ଓ ଜିଗ୍ନେଶଙ୍କୁ ସାମିଲ କରିବା ନେଇ ସେତେବେଳେ ଚର୍ଚ୍ଚା ବଢିଛି ଯେତେବେଳେ କଂଗ୍ରେସର ଅନେକ ଯୁବ ଚେହେରା ଦଳର ହାତ ଛାଡିଛନ୍ତି । ଯାହାଦ୍ୱାରା ଦଳ ଛାଡିଥିବା ଯୁବ ନେତାଙ୍କ ସ୍ଥାନ ପୂରଣ କରିପାରିବ କଂଗ୍ରେସ ଏବଂ ଯୁବବର୍ଗଙ୍କୁ ଆକୃଷ୍ଟ କରିବାରେ ସଫଳ ହେବ । ଆଗାମୀ ୨୦୨୪ ନିର୍ବାଚନକୁ ଦୃଷ୍ଟିରେ ରଖି ଏଭଳି ଋଣନୀତି କଂଗ୍ରେସ ପ୍ରସ୍ତୁତ କରୁଥିବା କୁହାଯାଉଛି । ବିହାରରେ ଗତ ୩ ଦଶକ ହେବ ହାତ ଟେକି ପାରୁନି କଂଗ୍ରେସ । ଏପରିକି ବିହାରରେ ମହାଗଠବନ୍ଧନ କରି ଦଳକୁ ନିର୍ବାଚନ ଲଢିବାକୁ ପଡୁଛି । ତେଣୁ ବିହାରରେ ପୁଣିଥରେ କଂଗ୍ରେସକୁ କମବ୍ୟାକ କରାଇବାକୁ କହ୍ନେୟା କୁମାରଙ୍କୁ ସାଥୀରେ ନେଇପାରେ କଂଗ୍ରେସ । ସେହିଭଳି ଗୁଜୁରାଟରେ ଗତ ନିର୍ବାଚନରେ ବିଜେପିକୁ କଡା ଟକ୍କର ଦେଇଥିଲା କଂଗ୍ରେସ । ତେଣୁ ଏଥର ଶାସନ କ୍ଷମତାରେ ବସିବାକୁ କଂଗ୍ରେସ ଜିଗ୍ନେଶଙ୍କ ଭଳି ଯୁବ ଚେହେରାଙ୍କୁ ଦଳରେ ସାମିଲ କରୁଛି । ଯେଉଁମାନେ ବିଭିନ୍ନ ଆନ୍ଦୋଳନର ନେତୃତ୍ୱ ନେଉଥିବେ ଏବଂ ସଂଘର୍ଷ କରି ରାଜନୀତିରେ ନିଜର ପରିଚୟ ହାସଲ କରିଥିବେ ସେହିଭଳି ଚେହେରାଙ୍କ ହାତ ଧରିବାକୁ ଚାହୁଁଛି କଂଗ୍ରେସ । ପୂରା ଦେଶକୁ ବିଜେପି ଗୁଜୁରାଟ ମଡେଲ ଦେଖାଉଥିବା ବେଳେ ଗୁଜୁରାଟରେ ଦଳକୁ ଧରାଶାୟୀ କରିବାକୁ ଉଦ୍ୟମ କରୁଛି କଂଗ୍ରେସ । ଯାହାଦ୍ୱାରା ପୂରା ଦେଶକୁ ଏକ ଭିନ୍ନ ବାର୍ତ୍ତା ଯିବ ଏବଂ କଂଗ୍ରେସ ପୁଣିଥରେ ଶାସନ କ୍ଷମତାକୁ ଫେରିପାରିବ ।