କନକ ବ୍ୟୁରୋ: ଏ ବର୍ଷ ବର୍ଷା ଅଭାବରୁ ସରକାର ଆଳୁ ଚାଷକୁ ପ୍ରୋତ୍ସାହନ ଦେଇଛନ୍ତି । କନ୍ଧମାଳ ଜିଲ୍ଲାରେ ଧାନ ବଦଳରେ ଆଳୁ ଚାଷ କରିବାକୁ ଚାଷୀଙ୍କୁ ଉତ୍ସାହିତ କରିଛନ୍ତି । ଫୁଲବାଣୀ ଜିଲ୍ଲାରେ ଚାଷୀ ଆଳୁ ଚାଷ ପାଇଁ ଆଗ୍ରହ ପ୍ରକାଶ କରିଛନ୍ତି । କିନ୍ତୁ ଉଦ୍ୟାନ ବିଭାଗ ପକ୍ଷରୁ ସବ୍ସିଡରେ ଦିଆଯାଇଥିବା ଆଳୁ ବିହନ ଗୁଡିକ ନିମ୍ନମାନର ହୋଇଥିବା ଅଭିଯୋଗ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ବର୍ଷାର ଲୁଚକାଳି ଖେଳ ଯୋଗୁଁ କନ୍ଧମାଳ ଜିଲ୍ଲାରେ ମାତ୍ର ୨୨ ପ୍ରତିଶତ ଜମିରେ ଧାନ ଚାଷ ହୋଇଥିବା ବେଳେ ବାକି ଜମିରେ ଆଳୁ ଚାଷ ହୋଇଛି । ଢିପ ଜମିରେ ଧାନ ବଦଳରେ ଆଳୁ ଚାଷ କରିବାକୁ ସରକାର ପ୍ରୋତ୍ସାହିତ କରିଛନ୍ତି । ସରକାରଙ୍କ ଠାରୁ ଆଳୁ ବିହନ ନେଇ ଚାଷୀ ପ୍ରଥମ ଥର ପାଇଁ ଖରିଫ ଋତୁରେ ଆଳୁ ଚାଷ କରିଛନ୍ତି । କିନ୍ତୁ ପ୍ରଶାସନ ଦେଇଥିବା ନିମ୍ନମାନର ବିହନ ଯୋଗୁଁ ଗଛ ବଡ ହୋଇଥିଲେ ମଧ୍ୟ ଆଳୁ ଫଳି ନାହିଁ ।
ଚାଷୀ, ୧୫୦୦ ଟଙ୍କା ଦେଇ ବିହନ କିଣିବା ସହ ଅନ୍ୟାନ ଖର୍ଚ୍ଚରେ ୨୫୦ ହେକ୍ଟର ଜମିରେ ଆଳୁ ଚାଷ କରିଛନ୍ତି । ୧ ହଜାର ୭୪୪ ଜଣ ଆଳୁଚାଷ କରିଛନ୍ତି । ବର୍ତମାନ ଆଳୁ ଗଛରେ ଫଳ ଧରିନଥିବାରୁ ଚାଷୀ ହତାଷ ହୋଇଛନ୍ତି । ଏପଟେ ଉଦ୍ୟାନ ବିଭାଗ କହିଛି, ଆଳୁ ଫଳିବାକୁ ୧୦୦ ଦିନ ଲାଗେ । ଥଣ୍ଡା ପଡିଲେ ଗଛରେ ଆଳୁ ଧରିବ । ତେଣୁ ଚାଷୀ ବ୍ୟସ୍ତ ନହେବାକୁ ଉଦ୍ୟାନ ବିଭାଗ ଅଧିକାରୀ ପରାମର୍ଶ ଦେଇଛନ୍ତି । ଆଳୁ ଫଳିଲେ ତ ଭଲ କଥା । ଯଦି ଆଳୁ ନଫଳେ ତେବେ ଚାଷୀମାନଙ୍କୁ ଉଚିତ କ୍ଷତିପୂରଣ ଦେବାର ଆବଶ୍ୟକତା ରହିଛି ।