ଅବହେଳିତ ଅଭୟାରଣ୍ୟ ବାସିନ୍ଦା । ବିଜୁଳି ନାହିଁ କି ରାସ୍ତା ନାହିିଁ, ଗୋଳିଆ ପାଣିକୁ ଛାଣି ପିଉଛନ୍ତି ଲୋକେ । ଜଙ୍ଗଲ ଭିତରେ କନକ ନ୍ୟୁଜର ରିଅଲିଟି ଚେକ୍

361

କନକ ବ୍ୟୁରୋ: ଡରି ଡରି ବଂଚୁଛନ୍ତି ଡମପଡା ଅଭୟାରଣ୍ୟ ବାସିନ୍ଦା । ଜଙ୍ଗଲ ଭିତରେ ରହୁଥିବା ଲୋକେ ସରକାରୀ ଯୋଜନା କହିଲେ କଣ ଜାଣି ନାହାନ୍ତି । ସ୍ୱାଧିନତାର ୭ ଦଶନ୍ଧି ପରେ ବି ଗାଁକୁ ବିଦ୍ୟୁତ ସଂଯୋଗ ହୋଇପାରିନାହିଁ । ଆଜି ବି ଅନ୍ଧାର ଦୂର କରୁଛି ଡିବିରି ଆଲୁଅ । ଖାଲି ଏତିକି ନୁହେଁ ଗୋଳିଆ ପାଣିକୁ ଛାଣି ପିଉଛନ୍ତି ଲୋକେ । ଅଭୟାରଣ୍ୟ ଭିତରେ କେମିତି ରହୁଛନ୍ତି ଲୋକେ, କନକ ନ୍ୟୁଜର ରିଅଲିଟ୍ ଚେକ୍ ।

ଅନ୍ଧାର ଭିତରେ ଶୀତୁଆ ରାତିର ଅଭୟାରଣ୍ୟ । କନକ ନ୍ୟୁଜ କ୍ୟାମେରା ଦେଖିଛି ରାତିର ଅଭୟାରଣ୍ୟ । ସମୟ ରାତି ୯ଟା । ସ୍ଥାନ- ଚନ୍ଦକା ଡମପଡା ଅଭୟାରଣ୍ୟ । ଅଭୟାରଣ୍ୟ ଭିତରେ ୫ କିଲୋମିଟର ଜଙ୍ଗଲି ରାସ୍ତା ଅତିକ୍ରମ କରି ବେହେଣ୍ଡା ସାହିରେ ପହଂଚିଥିଲେ ଆମ ପ୍ରତିନିଧି । ଗାଁରେ ବସବାସ କରନ୍ତି ୫୦ରୁ ଅଧିକ ପରିବାର । ଏମାନେ ଅଭୟାରଣ୍ୟର ମୂଳ ବାସିନ୍ଦା ହୋଇଥିବା ବେଳେ ସ୍ୱାଧିନତା ସାତ ଦଶନ୍ଧି ପରେ ବି ଏମାନଙ୍କ ପାଇଁ ସାତ ସପନ ପାଲଟିଛି ସରକାରୀ ଯୋଜନା । ଗାଁକୁ ନା ରାସ୍ତା ଅଛି, ନା ବିଜୁଳି ଆଉ ଅନ୍ଧାର ରାତିରେ ଜଙ୍ଗଲି ଜନ୍ତ୍ୁଙ୍କ ଭୟ ଦୂର କରୁଛି ଡିବିରି ଆଲୁଅ ।

ସଂଧ୍ୟା ହେଲେ ଅଭୟାରଣ୍ୟ ଭିତରକୁ ୧୦୮ ଆମ୍ବୁଲାନ୍ସ ଆସିବାକୁ ବାରଣ କରିଛି ବନବିଭାଗ । ତେଣୁ ସଂଜ ନଇଁଲେ ଯଦି କାହାର ଦେହ ଅସୁସ୍ଥ ହୁଏ ତେବେ କଥା ସରେ । ଦୋଳା କିମ୍ବା ଖଟିଆରେ ବୋହି ଡମପଡା ଡାକ୍ତରଖାନାକୁ ନେବାକୁ ପଡେ । ବେହେଣ୍ଡା ସାହିର ବେହାଲ ସ୍ଥିତି ଦେଖିବା ପରେ ଆମ ପ୍ରତିନିଧି ବୁଲିଥିଲେ ଆଉ ୪ଟି ଗାଁ । ଡମପଡା ଅଭୟାରଣ୍ୟ ଭିତରେ ଡାହାଣୀଗାଡିଆ, ପିଠାଖିଆ, ନୂଆକୂଅ ଓ ଢୋଲକାଠ ଗାଁରେ ପହଂଚି ଲୋକଙ୍କ ସମସ୍ୟା ବୁଝିଛି କନକ ନ୍ୟୁଜ ଟିମ୍ ।

ତେବେ ଚନ୍ଦକା ବନାଂଚଳର ଡମପଡା ଅଭୟାରଣ୍ୟ ଭିତରେ ୫ଟି ଗାଁରେ ପ୍ରାୟ ୧୨ଶହ ଲୋକ ବସବାସ କରୁଥିବା ବେଳେ ଏମାନଙ୍କ ନିକଟରେ ସରକାରୀ ଯୋଜନା ପହଂଚାଇବା ଜରୁରୀ ହୋଇପଡିଛି ।

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ସମ୍ବାଦ ଓ କନକ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ‘ସମ୍ବାଦ’ ଗ୍ରୁପର ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

Comments are closed.