କନକ ବ୍ୟୁରୋ: ଚା’ ଆଉ ଚା’ବାଲାଙ୍କ କାହାଣୀ ଆପଣ ଅନେକ ସମୟରେ ଶୁଣିଥିବେ ଏବଂ ଦେଖିଥିବେ । ହେଲେ ଓଡ଼ିଶାର ଜଣେ ଦିବ୍ୟାଙ୍ଗ ଚା’ବାଲାଙ୍କୁ ନେଇ ଏବେ ଚାରିଆଡ଼େ ଚର୍ଚ୍ଚା । ସେ ଶୁଣି ପାରନ୍ତିନି କି କଥା କହି ପାରନ୍ତିନି ହେଲେ ତାଙ୍କ କପେ ଚା’ କଥା କୁହେ ଆଉ ସେ ଇସାରାରେ ଦେଉଥିବା ଢୋକେ ଉଷୁମ ଚା’ରେ ଇସ୍କ ହୋଇଯାଏ ।

Advertisment

ଚା’ କାହାକୁ ପସନ୍ଦ ନୁହେଁ ଯେ? ପାଟିକୁ ଟିକେ ଉଷୁମ ଚା’ ମିଳିଗଲେ ଦିନଟା ପୂରା ମସ୍ତ ହୋଇଯାଏ । ସେମିତି ଏକ କପେ ଚା’ର କାହାଣୀ ଆସିଛି ବିରଜା କ୍ଷେତ୍ର ଯାଜପୁରରୁ । ଶାରୀରିକ ଅକ୍ଷମତା ଥାଇ ଆତ୍ମବିଶ୍ବାସରେ ହାରିନାହାନ୍ତି ସୀତାକାନ୍ତ ମହାଳାକ । ସୀତାକାନ୍ତ ପିଲାଦିନୁ କହିପାରନ୍ତିନି କିମ୍ବା ଶୁଣି ପାରନ୍ତିନି ହେଲେ ବି ଇସାରାରେ ବୁଝି ପାରନ୍ତି ସାମ୍ନାବାଲାର ମନକଥା । ଯାଜପୁର ସହରର କଳିମେଘା ଅଞ୍ଚଳରେ ଚା’ ଦୋକାନ ଚଳାଇ ସେ ଆତ୍ମନିର୍ଭର ଉଦାହରଣ ପାଲଟିଛନ୍ତି । 

ଆଖିରେ ଆଖିଏ ସ୍ଵପ୍ନ ଓ ହୃଦୟରେ ଅମାପ ଆତ୍ମବିଶ୍ଵାସ ନେଇ ନିଜ ପରିବାରର ପେଟ ପୋଷିବକୁ ସୀତାକାନ୍ତ ଚଳାଇଛନ୍ତି ଚା’ ଦୋକାନଟେ । ଛୋଟ ଚା’ ଦୋକାନଟିଏ ହେଲେ ବି ହସ ହସ ମୁହଁରେ ଚା’ କଫି ତିଆରି କରି ଦିଅନ୍ତି ସେ । ସୀତାକାନ୍ତଙ୍କ ହାତ ତିଆରି ଚା’ର ଟେଷ୍ଟ ଯେମିତି ବେଷ୍ଟ୍, ସେମିତି ତାଙ୍କ ବ୍ୟବହାର ମଧ୍ୟ ବହୁତ ବଢ଼ିଆ । ସେଥିପାଇଁ ତ ଖରା ହେଉ କି ବର୍ଷା ସବୁବେଳେ ସୀତାକାନ୍ତଙ୍କ ସୁଆଦିଆ ଚା’ ପାଇଁ ଜମିଥାଏ ଗ୍ରାହକଙ୍କ ଭିଡ଼ ।

ଜୀବନ ପାଇଛେ ମାନେ ସୁଃଖ ଦୁଃଖ ସବୁର ସାମ୍ନା କରିବାକୁ ପଡ଼ିବ । କିନ୍ତୁ ଯିଏ ନହାରି ଲଢ଼େଇ କରେ ସେ ହିଁ ସିକନ୍ଦର ପାଲଟେ । ଆଉ ଏହାର ଜଳ୍ବନ୍ତ ଉଦାହରଣ ହେଉଛନ୍ତି ଦିବ୍ୟାଙ୍ଗ ଚା’ ବାଲା ସୀତାକାନ୍ତ ।