ଆଜି ଖାତାକୁ ଆସିବ ‘କାଳିଆ’ ଟଙ୍କା ! ପୁରୀବାସୀଙ୍କୁ ମିଳିବନି ସହାୟତା
କନକ ବ୍ୟୁରୋ : ଆଜି ଗଣପର୍ବ ନୂଆଖାଇ । ନୂଆଖାଇ ପାଇଁ ପଶ୍ଚିମଓଡିଶାର ସବୁଠି ମହକି ଉଠୁଛି ପିଠାପଣାର ବାସ୍ନା । ନୂଆଖାଇ ଏକ କୃଷି ଭିତିକ ପର୍ବ । ମାଆ ମାଟିକୁ କୃତଜ୍ଞତା ଜଣାଇବାର ପର୍ବ । ପ୍ରଥମ ଅମଳ ଧାନକୁ ଇଷ୍ଟଦେବୀଙ୍କୁ ଭୋଗ ଲଗାଇ ନିଜେ ସେବନ କରନ୍ତି ସମସ୍ତେ । ଏଥିସହ ନୂଆଖାଇ ଏକ ଭାଇଚାରାର ପର୍ବ ହୋଇଥିବାରୁ ପରସ୍ପର ପ୍ରତି ଥିବା ସମସ୍ତ କ୍ରୋଧ, ଅସୂୟା ଭାବକୁ ପଛରେ ପକାଇ ସମସ୍ତେ ପରସ୍ପରର ଶୁଭ ମନାସିବା ସହ ଶୁଭେଛା ଜଣାଇଥାନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଉ ଏହି ଅବସରରେ ରାଜ୍ୟ ସରକାରଙ୍କ ପକ୍ଷରୁ ଚାଷୀଙ୍କ ମୁଁହରେ ହସ ଫୁଟାଇବା ପାଇଁ ‘କାଳିଆ’ ସହାୟତା ବଣ୍ଟନ କାର୍ଯ୍ୟକ୍ରମ ରହିଛି । ତେବେ ପୁରୀ ଜିଲ୍ଲାର ଚାଷୀଙ୍କୁ ଏହି ସହାୟତା ମିଳିବ ନାହିଁ । ଚଳିତମାସ ୩୦ରେ ପିପିଲି ଉପନିର୍ବାଚନ ଅନୁଷ୍ଠିତ ହେବାକୁ ରହିଥିବାରୁ ନିର୍ବାଚନ କଟକଣା ପାଇଁ ଜିଲ୍ଲାବାସୀଙ୍କୁ ଅଧିକ ସମୟ ଅପେକ୍ଷା କରିବାକୁ ପଡିବ ।
ସରକାରଙ୍କ ତଥ୍ୟ ଅନୁଯାୟୀ ଆଜି ଅପରାହ୍ଣ ସାଢେ ୫ଟାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କାଳିଆ ସହାୟତା ବଣ୍ଟନ କରିବେ । ଏଥିରେ ରାଜ୍ୟର ପାଖାପାଖି ୩୭ଲକ୍ଷ ୭୫ ହଜାର ଚାଷୀଙ୍କୁ କାଳିଆ ବାବଦକୁ ୨ହଜାର ଟଙ୍କା ଲେଖାଏଁ ସହାୟତା ବଣ୍ଟନ କରାଯିବ । ଏଥିପାଇଁ ରାଜ୍ୟ ସରକାରଙ୍କ ପକ୍ଷରୁ ୭୫୫ କୋଟି ଟଙ୍କା ଖର୍ଚ୍ଚ ହେବାକଥା, କିନ୍ତୁ ପୁରୀ ଜିଲ୍ଲାର ଚାଷୀଙ୍କୁ ସହାୟତା ବାବଦ ଅର୍ଥ ଦିଆଯିବ ନାହିଁ । ଏବାବଦକୁ ପ୍ରାୟ ୧୩କୋଟି ଟଙ୍କା କମ୍ ରହିବ ବୋଲି ଜଣାଯାଇଛି ।