କଳାହାଣ୍ଡିରେ ସେଓ ଚାଷର ନୂଆ ସମ୍ଭାବନା ସୃଷ୍ଟି କରିଛନ୍ତି ଚାଷୀ କାଳେଶ୍ୱର କାଣ୍ଡ, ହିମାଚଳରୁ ନୂଆ ପ୍ରଜାତିର ଚାରା ଆଣି ଫଳାଇଛନ୍ତି ସବୁଜ ସେଓ

କନକ ବ୍ୟୁରୋ : କଳାହାଣ୍ଡି ମାଟିରେ ସବୁଜ ସେଓ ଚାଷର ନୂତନ ସମ୍ଭାବନା । ଧର୍ମଗଡ଼ ଅଂଚଳର ଚାଷୀ କାଳେଶ୍ୱର କାଣ୍ଡ ୟୁଟ୍ୟୁବରୁ ଚାଷ କରିବା ପ୍ରଣାଳି ବିଷୟରେ ଜ୍ଞାନ ଆହରଣ କରି ଏହି ଚାଷ କରିଛନ୍ତି । ସେ ତାଙ୍କ ବାଡ଼ିରେ ଏଚଆରଏମଏନ୍ ନାଇଂଟ ନାଇନ୍ ପ୍ରଜାତିର ସେଓ ଚାଷ କରିଛନ୍ତି । ଅନଲାଇନ୍ରେ ପ୍ରଥମେ ୧୫୦ଟି ସେଓ ଚାରା ଅର୍ଡର କରି ଏକ ଏକର ଜମିରେ ଏହାକୁ ରୋପଣ କରିଥିଲେ । ଏଥିପାଇଁ ସେ ୨ଲକ୍ଷ ଟଙ୍କା ଖର୍ଚ୍ଚ କରିଥିବା ବେଳେ ଅଢ଼େଇ ବର୍ଷ ପରେ ଗଛରେ ଫଳ ଆସିଛି । ବର୍ତମାନ ସେଓ ଗଛରେ ସେଓ ଫଳିବା ଆରମ୍ଭ ହୋଇଥିବା ବେଳେ ଏହାକୁ ନେଇ ସେ ବେଶ ଖୁସି ଅଛନ୍ତି । ପ୍ରଥମ ଫଳକୁ ବିକ୍ରି ନକରି ନିଜ ସମ୍ପର୍କୀୟ ମାନଙ୍କୁ ଉପହାର ସ୍ୱରୁପ ଦେଉଛନ୍ତି ଚାଷୀ କାଳେଶ୍ୱର । ଏହି କାମରେ ତାଙ୍କୁ ତାଙ୍କ ସ୍ତ୍ରୀ ସହଯୋଗ କରୁଛନ୍ତି ।

ସେଓ ଚାଷ କଥା ମନକୁ ଆସିଲେ ପ୍ରଥମେ ଶୀତଳ ଜଳବାୟୁ କଥା ମନକୁ ଆସେ । ଜାମ୍ମୁ କାଶ୍ମୀର, ହିମାଚଳ ପ୍ରଦେଶର ଶିତଳ ଜଳବାୟୂରେ ପ୍ରଚୁର ପରିମାଣରେ ସେଓ ଚାଷ ହୋଇଥାଏ । କିନ୍ତୁ କଳାହାଣ୍ଡିରେ ସଫଳ ଚାଷୀଙ୍କ ଏଭଳି ସେଓ ଚାଷ କରିବା ଅନ୍ୟମାନଙ୍କ ପାଇଁ ପ୍ରେରଣା ପାଲଟିଛି । ୪୦ରୁ ୪୨ ଡିଗ୍ରୀ ତାପମାତ୍ରା ଭିତରେ ଗ୍ରୀନ୍ ସେଓ ଚାଷ କରି ସେ ସଫଳ ହୋଇଛନ୍ତି । କ୍ୱଚିତ୍ ଓ କମ୍ ସ୍ଥାନରେ ହେଉଥିବା ଏହି ଚାଷ ଦେଖିବା ପାଇଁ ଆଖପାଖ ଅଂଚଳର ଲୋକଙ୍କ ସୁଅ ଛୁଟୁଛି ।

କାଳେଶ୍ୱରଙ୍କ ଭଳି ଉଦ୍ୟମି ଚାଷୀଙ୍କ ଏଭଳି ପ୍ରୟାସ ଅନ୍ୟ ଚାଷୀଙ୍କ ପାଇଁ ଉଦାହରଣ ପାଲଟିଛି । ଉଦ୍ୟାନ ବିଭାଗ ପକ୍ଷରୁ ଏହି ଚାଷୀଙ୍କୁ ସହଯୋଗ ମିଳିଲେ ସେ କୃଷି କ୍ଷେତ୍ରରେ ଆହୁରି ଉନ୍ନତି କରିପାରିବେ ବୋଲି କହିଛନ୍ତି ।