ଗ୍ୟାଙ୍ଗଷ୍ଟାର ବରକୁ କନିଆ ଲେଡି ଡନ୍ । ପୋଲିସ୍ ଛାଉଣୀ ଭିତରେ ହେଲା ବିବାହ

କନକ ବ୍ୟୁରୋ: ଗ୍ୟାଙ୍ଗଷ୍ଟାର ବରକୁ, କନିଆ ଲେଡି ଡନ୍ । ଦିଲ୍ଲୀରେ ଗ୍ୟାଙ୍ଗଷ୍ଟାରଙ୍କ ବିବାହକୁ ନେଇ ସାରା ଦେଶରେ ଚର୍ଚ୍ଚା । ଦିଲ୍ଲୀର କୁଖ୍ୟାତ ଗ୍ୟାଙ୍ଗଷ୍ଟାର ସନ୍ଦୀପ ଓରଫ କାଲା ଜଥେଡି ଏବଂ ଲେଡି ଡନ୍ ଅନୁରାଧା ଚୌଧୁରୀ ଓରଫ୍ ମ୍ୟାଡାମ୍ ମିଂଜ୍ ବିବାହ ବନ୍ଧନରେ ଆବଦ୍ଧ ହୋଇଛନ୍ତି । ଦିଲ୍ଲୀ ଦ୍ୱାରକା ସ୍ଥିତ ସନ୍ତୋଷ ଗାର୍ଡେନରେ ମଙ୍ଗଳବାର ବିବାହ କରିଛନ୍ତି ଏହି ଦୁଇ ଗ୍ୟାଙ୍ଗଷ୍ଟାର । ତେବେ ଏହି ଗ୍ୟାଙ୍ଗଷ୍ଟାର ବିବାହ ପାଇଁ ଦିଲ୍ଲୀ ଦ୍ୱାରକା ଅଞ୍ଚଳରେ ପୋଲିସ ଛାଉଣୀ ଦେଖିବାକୁ ମିଳିଥିଲା । ଏହି ବିବାହ କାର୍ଯ୍ୟକ୍ରମ ପାଇଁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରିଥିଲା ଦିଲ୍ଲୀ ପୋଲିସ ।

ପ୍ରତ୍ୟେକ ଅତିଥିଙ୍କ ଆଇଡି କାର୍ଡ ଯାଞ୍ଚ୍ କରିବା ପରେ ହିଁ ଭିତରକୁ ଛାଡୁଥିଲା ପୋଲିସ । ଗ୍ୟାଙ୍ଗଷ୍ଟାରଙ୍କ ବିବାହ ପାଇଁ ପୋଲିସ ମାତ୍ର ଅଧ ଘଣ୍ଟାର ସମୟ ଦେଇଥିଲା । କୌଣସି ବଡ ଅଘଟଣରୁ ଦୃଷ୍ଟିରେ ରଖି ସଜାଗ ରହିଥିଲା ପୋଲିସ୍ । ଉଭୟ କାଲା ଜଥେଡି ଓ ମ୍ୟାଡାମ୍ ମିଂଜଙ୍କ ବିରୋଧରେ ଏକାଧିକ ମାମଲା ରହିଛି । ଦୁହିଁଙ୍କ ଭିତରେ ପ୍ରେମ ସମ୍ପର୍କ ତିନି ବର୍ଷ ପୂର୍ବରୁ ଆରମ୍ଭ ହୋଇଥିଲା । ସେତେବେଳେ ଦୁହେଁ ଦୁଇଟି ଭିନ୍ନ ଭିନ୍ନ ମାମଲାରେ ୱାଂଟେଡ୍ ରହିଥିଲେ । ଦୁହେଁ ପ୍ରଥମେ ବନାରସରେ ମନ୍ଦିରରେ ବିବାହ କରିଥିଲେ । ହେଲେ ଏବେ ପରିବାର ଲୋକଙ୍କ ଇଚ୍ଚା ଅନୁସାରେ ସର୍ବ ସମ୍ମୁଖରେ ବିବାହ କରିଛନ୍ତି ।