ନାବାଳିକା ପୀଡିତାକୁ ବିବାହ ପ୍ରସ୍ତାବ ନେଇ ସୁପ୍ରିମକୋର୍ଟ ପ୍ରଧାନ ବିଚାରପତିଙ୍କ ସ୍ପଷ୍ଟୀକରଣ । କହିଲେ ସେଭଳି କୌଣସି ପ୍ରସ୍ତାବ ଦେଇନଥିଲେ ଖଣ୍ଡପୀଠ ।
କନକ ବ୍ୟୁରୋ: ବଳାତ୍କାରର ଶିକାର ହୋଇଥିବା ପୀଡିତାଙ୍କୁ ବିବାହ କରିବାକୁ, କୌଣସି ବଳାକ୍ରାରୀଙ୍କୁ ମୁଁ କେବେ ବି କହିନାହିଁ । ଆଜି ଏନେଇ ସ୍ପଷ୍ଟ କରିଛନ୍ତି ସୁପ୍ରିମକୋର୍ଟ ପ୍ରଧାନ ବିଚାରପତି ଜଷ୍ଟିସ୍ ଶରଦ ଅରବିନ୍ଦ ବୋବଡେ । ଏକ ବଳାକ୍ରାର ମାମଲାରେ ଅଭିଯୁକ୍ତର ଜାମିନ ଶୁଣାଣି ସମୟରେ ଏକ ରାୟକୁ ନେଇ ବିବାଦ ସୃଷ୍ଟି ହେବା ପରେ, ଆଜି ଏ ନେଇ ସ୍ପଷ୍ଟ କରିଦେଇଛନ୍ତି ସୁପ୍ରିମକୋର୍ଟର ପ୍ରଧାନ ବିଚାରପତି । ଏହା ସହିତ ଏକ ଅନୁଷ୍ଠାନ ଭାବେ ସୁପ୍ରିମକୋର୍ଟର ନାରୀ ସମାଜ ପ୍ରତି ସବୁଠାରୁ ଅଧିକ ସମ୍ମାନ ରହିଛି ବୋଲି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆଜି ସୁପ୍ରିମକୋର୍ଟରେ ପ୍ରଧାନ ବିଚାରପତି ଜଷ୍ଟିସ୍ ଶରଦ ଅରବିନ୍ଦ ବୋବଡେଙ୍କ ନେତୃତ୍ୱରେ ଗଠିତ ଏକ ଖଣ୍ଡପୀଠରେ ଗର୍ଭବତୀ ହୋଇଥିବା ଜନୈକା ବଳାକ୍ରାର ପୀଡିତାଙ୍କ ଗର୍ଭସ୍ଥ ଶିଶୁର ଗର୍ଭପାତ କରାଇବାକୁ ଏକ ମାମଲାର ଶୁଣାଣି ସମୟରେ ପ୍ରଧାନ ବିଚାରପତି ଏହି ସ୍ପଷ୍ଟୀକରଣ ରଖିଥିଲେ । ପୂର୍ବ ମାମଲା ସମ୍ପର୍କରେ ଉଲ୍ଲେଖ କରି ସୁପ୍ରିମକୋର୍ଟ ଖଣ୍ଡପୀଠ କହିଛନ୍ତି, ଏପରିକି ଶେଷ ଘଟଣାରେ ମଧ୍ୟ ଆମମାନଙ୍କ ମଧ୍ୟରୁ କୌଣସି ପ୍ରସ୍ତାବ ନଥିଲା ଯେ ଅଭିଯୁକ୍ତ ପୀଡିତାଙ୍କୁ ବିବାହ କରିବା ଉଚିତ । କାରଣ ଆମ ଆଗରେ କୌଣସି ବୈବାହିକ ବଳାକ୍ରାର ମାମଲା ନଥିବାରୁ ଆମେ ଏହାକୁ ଯାଂଚ କରିଥିଲୁ । ମହିଳାଙ୍କ ପ୍ରତି ଆମର ସର୍ବୋଚ୍ଚ ସମ୍ମାନ ରହିଛି ।
ଏଠାରେ ସୂଚନା ଦିଆଯାଇପାରେ, ପୂର୍ବରୁ ମାର୍ଚ୍ଚ ମାସରେ ପ୍ରଧାନ ବିଚାରପତି ଜଷ୍ଟିସ୍ ଏସଏ ବୋବଡେଙ୍କ ନେତୃତ୍ୱରେ ଜଷ୍ଟିସ୍ ବୋପନ୍ନା ଓ ଜଷ୍ଟିସ୍ ଆର ସୁବ୍ରମଣ୍ୟନଙ୍କୁ ନେଇ ଗଠିତ ଏକ ଖଣ୍ଡପୀଠ ଏକ ବଳାକ୍ରାର ମାମଲାରେ ମହାରାଷ୍ଟ୍ର ରାଜ୍ୟ ବିଦ୍ୟୁତ ଉତ୍ପାଦନ କମ୍ପାନୀରେ ଟେକନିସିଆର ଭାବେ କାମ କରୁଥିବା ଜନୈକ ଅଭିଯୁକ୍ତ ବଳାକ୍ରାରୀର ଜାମିନ ଆବେଦନ ଉପରେ ଶୁଣାଣି କରୁଥିଲେ । ଏହି ଖଣ୍ଡପୀଠ ଅଭିଯୁକ୍ତକୁ ପଚାରିଥିଲା, ଆପଣ ତାଙ୍କୁ ବିବାହ କରିବାକୁ ପ୍ରସ୍ତୁତ କି? ଯଦି ଆପଣ ତାଙ୍କୁ ବିବାହ କରିବାକୁ ଇଛୁକ ତେବେ ଆମେ ଏହାକୁ ବିଚାର କରିପାରିବା, ନଚେତ୍ ଆପଣ ଜେଲ ଯିବେ । ପୁଣି ଖଣ୍ଡପୀଠ କହିଥିଲେ ଆମେ ଆପଣଙ୍କୁ ବିବାହ କରିବାକୁ ବାଧ୍ୟ କରୁନାହୁଁ । ଅଭିଯୁକ୍ତଙ୍କ ଓକିଲ ଖଣ୍ଡପୀଠଙ୍କୁ କହିଥିଲେ ପ୍ରଥମେ ଅଭିଯୁକ୍ତ ପୀଡିତାଙ୍କୁ ବିବାହ କରିବାକୁ ରାଜିଥିଲା, ପରେ ସେ ମନା କରି ଦେଇଥିଲା ।