ମହାକାଳପଡା କଲେଜ ପରିସରରେ ନିର୍ବାଚନ ସଭା ନେଇ କାର୍ଯ୍ୟାନୁଷ୍ଠାନ : କଲେଜ ପ୍ରିନ୍ସିପାଲ ବିକାଶ ଦାସଙ୍କ ବିରୋଧରେ ମାମଲା ରୁଜୁ
ପୂର୍ବରୁ ଏସଡିପିଓ ଓ କଲେଜ ଅଧ୍ୟକ୍ଷ ହୋଇସାରିଛନ୍ତି ନିଲମ୍ବିତ
କନକ ବ୍ୟୁରୋ : କେନ୍ଦ୍ରାପଡା ମହାକାଳପଡା ମା’ ତାରିଣୀ କଲେଜରେ ନିର୍ବାଚନୀ ସଭା ପ୍ରସଙ୍ଗରେ କଠୋର କାର୍ଯ୍ୟାନୁଷ୍ଠାନ ହୋଇଛି । ରାଜ୍ୟ ନିର୍ବାଚନ କମିଶନଙ୍କ ନିର୍ଦ୍ଦେଶକ୍ରମେ ପ୍ରିନ୍ସିପାଲଙ୍କ ବିରୋଧରେ ଏଫଆଇଆର କରିଛନ୍ତି ସ୍ଥାନୀୟ ତହସିଲଦାର । କୋଭିଡ ନିୟମ ଉଲ୍ଲଂଘନ ଅଭିଯୋଗରେ ଏହି ମାମଲା କରାଯାଇଥିବା ନିର୍ବାଚନ କମିଶନଙ୍କୁ ଜଣାଇଛନ୍ତି କେନ୍ଦ୍ରାପଡା ଜିଲ୍ଲାପାଳ । ମହାକାଳପଡା ତହସିଲଦାର ସ୍ଥାନୀୟ ଅଧିକାରୀ ହୋଇଥିବାରୁ ବିପର୍ଯ୍ୟୟ ପରିଚାଳନା ଆଇନ ୨୦୦୫ ଅଧିନରେ ଏହି ମାମଲା କରିଥିବା ଚିଠିରେ ଉଲ୍ଲେଖ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ପୂର୍ବରୁ ନିର୍ବାଚନ ଆଚରଣ ବିଧି ଉଲ୍ଲଂଘନ ଅଭିଯୋଗରେ କାର୍ଯ୍ୟାନୁଷ୍ଠାନ ନେବାକୁ ଗଣଶିକ୍ଷା ବିଭାଗକୁ ଚିଠି ଲେଖିଥିଲେ ନିର୍ବାଚନ କମିଶନ୍ । କଲେଜ ଅଧ୍ୟକ୍ଷ ବିକାଶ ଚନ୍ଦ୍ର ଦାଶଙ୍କୁ ନିଲମ୍ବନ କରିବା ପାଇଁ ଚିଠିରେ ଉଲ୍ଲେଖ କରାଯାଇଥିଲା । ସେହିଭଳି ସାଲେପୁର ଏସଡିପିଓ ପ୍ରଶାନ୍ତ ମାଝିଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେଇ ତାଙ୍କୁ ନିଲମ୍ବନ କରିବା ପାଇଁ ପୁଲିସ ମହାନିର୍ଦେଶକଙ୍କୁ ସୁପାରିଶ କରିଥିଲେ । ଏହାପରେ ଉଭୟଙ୍କୁ ନିଲମ୍ବନ କରାଯାଇଥିଲା । ତେବେ ଉଭୟଙ୍କ ବିରୋଧରେ ଆଇନ୍ ଅନୁସାରେ ମାମଲା ରୁଜୁ କରିବା ପାଇଁ କୁହାଯାଇଥିଲା । ତେଣୁ ଜିଲ୍ଲାପାଳ ଏନେଇ ପଦକ୍ଷେପ ନେଇଥିବା ନିର୍ବାଚନ କମିଶନଙ୍କୁ ଜଣାଇ ଦେଇଛନ୍ତି ।
ଗତ ୧୬ ତାରିଖରେ କେନ୍ଦ୍ରାପଡ଼ା ଜିଲ୍ଲା ମହାକାଳପଡ଼ା ବ୍ଲକ୍ ଅନ୍ତର୍ଗତ ଯୁକ୍ତଦୁଇ ତାରେଣୀ ସରକାରୀ ମହାବିଦ୍ୟାଳୟରେ ଏହି ନିର୍ବାଚନୀ ସଭାର ଆୟୋଜନ କରାଯାଇଥିଲା। କଲେଜ ଅଧ୍ୟକ୍ଷ ବିକାଶ ଦାସ ଓ ଏସ୍ଡିପିଓ ପ୍ରଶାନ୍ତ ମାଝୀ ଅୟୋଜନରେ ମୁଖ୍ୟ ଭୂମିକା ଗ୍ରହଣ କରିଥିଲେ । ଅନ୍ୟମାନଙ୍କ ମଧ୍ୟରେ, ଗଡ଼ରୋମିତ ପଞ୍ଚାୟତର ଆଶାୟୀ ସରପଞ୍ଚ ପ୍ରାର୍ଥୀ ପ୍ରିୟଙ୍କା ସାମଲ, ବର୍ତ୍ତମାନର ସରପଞ୍ଚ ଉତରା ତରାଇ, ପୂର୍ବତନ ସରପଞ୍ଚ ଦୁଷ୍ମନ୍ତ ସେଠୀଙ୍କ ସମେତ ପାଖାପାଖି ଦୁଇ ଶହରୁ ଅଧିକ ଲୋକ ସଭାସ୍ଥଳରେ ଉପସ୍ଥିତ ଥିଲେ । କଲେଜରୁ ଗାଁ ଦୂର ଥିବାରୁ ଗାଡ଼ିରେ ବୁହାଇ ଲୋକଙ୍କୁ ଅଣାଯାଇଥିଲା । ଭୋଜିଭାତ ପାଇଁ ଭାତ-ଚିକେନ୍ ବ୍ୟବସ୍ଥା କରାଯାଇଥିଲା ।
ନିର୍ବାଚନ ଆଚରଣବିଧି ଏବ˚ କୋଭିଡ୍ର କଡ଼ା କଟକଣା ସତ୍ତ୍ବେ ସରକାରଙ୍କ ଦୁଇ ବରିଷ୍ଠ ଅଧିକାରୀ ବେଆଇନ ଭାବେ ନିର୍ବାଚନୀ ସଭା ଆୟୋଜନ କରିବା ଏବ˚ ସିଧାସଳଖ ଆଶାୟୀ ପ୍ରାର୍ଥୀଙ୍କ ପାଇଁ ଭାଷଣ ଦେଇ ଭୋଟ୍ ମାଗିବା ଘଟଣା ପୂରା ମାମଲାକୁ ବିବାଦୀୟ କରି ଦେଇଥିଲା । ଏ ସ˚କ୍ରାନ୍ତରେ ଖବର ପ୍ରକାଶ ପାଇବାପରେ ରାଜ୍ୟ ନିର୍ବାଚନ କମିସନ୍ ଘଟଣାକୁ ଗୁରୁତ୍ବର ସହିତ ନେଇ ଜିଲ୍ଲାପାଳଙ୍କୁ ରିପୋର୍ଟ ମାଗିଥିଲେ । ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ସୋମବାର ଦିନ ମାଜିଷ୍ଟ୍ରେଟ୍ ତଥା ମହାକାଳପଡ଼ା ତହସିଲଦାର ସୌଭାଗ୍ୟ ର˚ଜନ ପଣ୍ତା ଏବ˚ ମାର୍ଶାଘାଇ ଥାନାଧିକାରୀ ପ୍ରଦୀପ୍ତ କୁମାର କାନୁନ୍ଗୋ କଲେଜ ଯାଇ ଘଟଣାର ତଦନ୍ତ କରିଥିଲେ। ସିସି କ୍ୟାମେରା ହାର୍ଡଡିସ୍କ୍ ଜବତ୍ କରିବା ସହିତ କଲେଜ ରେଜିଷ୍ଟର୍ ଯାଞ୍ଚ କରିଥିଲେ ।