ତେଜରାତି ଦୋକାନରୁ ଦୁବାଇ ଯାତ୍ରା । ବାକି ଖାତାର ହିସାବ ଲେଖୁଥିଲେ, ଏବେ IPLରେ ରନର ହିସାବ ରଖିବେ ଓଡିଆ ପୁଅ । ଚଳିତ ଆଇପିଏଲର ସ୍କୋରର ଦାୟିତ୍ୱ ତୁଲାଇବେ ସୂର୍ଯ୍ୟକାନ୍ତ ।
କନକ ବ୍ୟୁରୋ : ତେଜରାତି ଦୋକାନରୁ ଚକାଚକ ଷ୍ଟାଡିୟମ । ବାକି ଖାତା ହିସାବ ଲେଖୁଥିଲେ ଏବେ ପ୍ରତି ବଲର ସ୍କୋର ଲେଖିବେ । ଆଜି ଆମେ ଆପଣଙ୍କୁ ଏମିତି ଜଣେ ମଣିଷଙ୍କ ବାବଦରେ କହିବୁ ଯିଏ ଜୀବନରେ ଅନେକ ସଂଘର୍ଷ ପରେ ପାଇଛନ୍ତି ବଡ ସଫଳତା । ରୋଜଗାର ପାଇଁ ଭିଟାମାଟି ଛାଡି ଅନ୍ୟ ରାଜ୍ୟକୁ ଯାଇଛନ୍ତି, ଆଉ ଏସବୁ ପରେ ବି ମନରେ ଦୁକୁଦୁକୁ ହୋଇ ଜଳୁଥିବା ଆଶାକୁ ପୂରଣ କରିବାରେ ସେ ସଫଳ ହୋଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏଥର ୟୁଏଇରେ ଆୟୋଜିତ ହେବାକୁ ଥିବା ଆଇପିଏଲ ମ୍ୟାଚ ପାଇଁ ରନ ସ୍କୋରର ଭାବେ ମନୋନୀତ ହୋଇଛନ୍ତି ସୂର୍ଯ୍ୟକାନ୍ତ ପଣ୍ଡା । ମାତ୍ର ଦଶମ ଯାଏଁ ପାଠ ପଢିଥିବା ସୂର୍ଯ୍ୟକାନ୍ତ ପଶ୍ଚିମବଙ୍ଗର ହୁଗୁଳୀରେ ଏକ ତେଜରାତି ଦୋକାନରେ ସହାୟକ ଭାବେ କାମ କରନ୍ତି । ଗ୍ରାହକଙ୍କୁ ସାମଗ୍ରୀ ବିକିବାରେ ଦୋକାନୀଙ୍କୁ ସାହାଯ୍ୟ କରନ୍ତି ଓ ଗ୍ରାହକମାନଙ୍କର ବାକି ଖାତାର ହିସାବ ରଖନ୍ତି । ବଡ କଥା ହେଉଛି, ସୂର୍ଯ୍ୟକାନ୍ତ ପ୍ରଥମ ଥର ପାଇଁ ଏଥର ବିମାନରେ ବସିବେ । ସୂର୍ଯ୍ୟକାନ୍ତ ପଣ୍ଡା ଅଗଷ୍ଟ ୨୭ ତାରିଖରେ ଦୁବାଇ ଅଭିମୁଖେ ଯାତ୍ରା କରିବେ । ଆଇପିଏଲ୍ ସମୟରେ ପ୍ରତ୍ୟେକଟି ଅପଡେଟ୍ ସୂର୍ଯ୍ୟକାନ୍ତଙ୍କ ମାଧ୍ୟମରେ ଇଲେକ୍ଟ୍ରୋନିକ୍ ସ୍କୋର ବୋର୍ଡରେ ପ୍ରଦର୍ଶନ କରାଯିବ । ସେପ୍ଟେମ୍ବର ୧୯ ରୁ ନଭେମ୍ବର ୧୦ ତାରିଖ ପର୍ଯ୍ୟନ୍ତ ଆଇପିଏଲ୍ ଖେଳାଯିବ ।
ତେବେ ଆସନ୍ତୁ ଜାଣିବା କେମିତି ଥିଲା ସୂର୍ଯ୍ୟକାନ୍ତଙ୍କ ଦୁବାଇ ଯାତ୍ରା ?
ରୋଜଗାର ଆଶାରେ ସୂର୍ଯ୍ୟକାନ୍ତ ଓଡିଶା ଛାଡି ପଶ୍ଚିମବଙ୍ଗ ଯାଇଥିଲେ । ତାଙ୍କ ବାପା ଜଣେ ରୋଷେୟା ଥିବାବେଳେ ପରିବାରର ଆର୍ଥିକ ସ୍ଥିତି ସେତେ ଭଲ ନଥିଲା । ଯେଉଁଥିପାଇଁ ଭିଟାମାଟି ଛାଡି କାମ ସନ୍ଧାନରେ ପଡୋଶୀ ରାଜ୍ୟକୁ ସେ ଯାଇଥିଲେ । ତେବେ ୨୦୧୫ ରେ କ୍ରିକେଟ୍ ଆସୋସିଏସନ୍ ଅଫ୍ ବେଙ୍ଗଲର ସ୍କୋରର ପରୀକ୍ଷାରେ ପାସ୍ କରିଥିଲେ । ନିରନ୍ତର ପ୍ରୟାସ ଏବଂ ନିଷ୍ଠା ଯୋଗୁଁ ୨୦୧୮ରେ ସୁର୍ଯ୍ୟକାନ୍ତ ଶ୍ରେଷ୍ଠ ସ୍କୋରର ପୁରସ୍କାର ଅର୍ଜନ କରିଥିଲେ । ଆଉ ୨୦୨୦ରେ ଆଇପିଏଲ୍ ସ୍କୋରର ଭାବରେ ମନୋନୀତ ହୋଇଛନ୍ତି ସୂର୍ଯ୍ୟକାନ୍ତ ।