ମଣିଷର ସ୍ୱାର୍ଥ ପାଇଁ ଅସନ୍ତୁଳିତ ପରିବେଶ । ବିଷ ବଳୟ ପାଲଟିଛି ପୂରା ଅଞ୍ଚଳ । ଆୟୁଷ କମାଉଛି ଧୂଳିଭର୍ତ୍ତି ବାୟୁ ! ସଜାଗ ନହେଲେ ସଙ୍କଟରେ ପଡିବେ ସମସ୍ତେ…
କନକ ବ୍ୟୁରୋ: ମାଳ ମାଳ ଗାଡି, ଖାଲ ଖମା ରାସ୍ତା… ଆଉ ଗାଡି ପଛେ ପଛେ ଉଡୁଛି ପ୍ରବଳ ଧୂଳି । ଧୂଳି ଧୁଆଁର ଏ ଭୟଙ୍କର ସ୍ଥିତି ପାଇଁ ପ୍ରଦୂଷିତ ପରିବେଶ । ବିଷ ବଳୟ ପାଲଟିଛି ପୂରା ଅଞ୍ଚଳ । ଏ ଦୃଶ୍ୟ ହେଉଛି କେନ୍ଦୁଝର ଜିଲ୍ଲା ଯୋଡା ଖଣି ଅଞ୍ଚଳର । ଯେଉଁଠି ପ୍ରଦୂଷଣର ମାତ୍ରା ଏତେ ଅଧିକ ହୋଇଛି ନଦୀ ନାଳର ଜଳ ବି ଧୂଳିର ଧମକରୁ ବର୍ତ୍ତି ପାରିନି । ଆଉ ଏଠିକାର ଲୋକଙ୍କ କଥା ନକହିବା ଭଲ । ଦିନରାତି ସବୁ ସମୟରେ ଅସନ୍ତୁଳିତ ପରିବେଶରେ ବଞ୍ଚିବାକୁ ପଡୁଛି । ପ୍ରଦୂଷଣରୁ ମୁକ୍ତି ପାଇଁ, ଶାନ୍ତିରେ ଜୀବନ ଜିଇଁବା ପାଇଁ ତ୍ରାହି ତ୍ରାହି ଡାକୁଛନ୍ତି ଲୋକେ ।
Kanak News is now on WhatsApp
Join and get latest news updates delivered to you via WhatsApp
ଯୋଡା ଅଞ୍ଚଳରେ ମାତ୍ରାଧିକ ଗଛକଟା, ଖଣି ଖନନ ସହ ଭାରିଯାନରେ ମାଲ ପରିବହନ ଉକ୍ତ ଅଞ୍ଚଳର ରାସ୍ତାକୁ ନଷ୍ଟ କରୁଛି । ଯେଉଁଥି ପାଇଁ ସାଧାରଣ ଲୋକେ ନାହିଁ ନଥିବା ସମସ୍ୟା ଭୋଗୁଥିବା ବେଳେ କମ୍ପାନୀରୁ ନିର୍ଗତ ଧୂଆଁ ଏବଂ କ୍ରସରର ଧୂଳି ସାରା ଅଞ୍ଚଳକୁ ବିଷାକ୍ତ କରିଛି । ଯାହାର ବଡ ଉଦାହରଣ ହେଉଛି ଏ ଗଛର ପତ୍ର ।
ସବୁଜ ଗଛ ସବୁ ଧୂସର ପାଲଟି ଯାଇଛି । କୌଣସି ରୋଗ ପୋକ ପାଇଁ ନୁହେଁ ବରଂ ମଣିଷର କାର୍ଯ୍ୟକଳାପ ଆଉ ସ୍ୱାର୍ଥନ୍ୱେଷୀ ବ୍ୟବହାର ସ୍ଥାନୀୟ ଅଞ୍ଚଳରେ ଥିବା ବୃକ୍ଷମାନଙ୍କ ପାଇଁ ଅଭିଶାପ ପାଲଟିଛି । ଖଣି ପାଇଁ ମାତ୍ରାଧିକ ବୃକ୍ଷ ଛେଦନ କରି ମଣିଷ ନିଜ ଭବିଷ୍ୟତକୁ ନିଜ ହାତରେ କୁରାଢି ମାରୁଛି । ତେବେ ଖଣିର ବର୍ଜ୍ୟବସ୍ତୁ କାରୋ ଓ ସୁନା ନଦୀକୁ ପ୍ରଦୂଷିତ କରୁଛି । ଖଣି ଅଞ୍ଚଳର ପ୍ରଦୂଷଣ ବଢିବା କାରଣରୁ ସ୍ଥାନୀୟଲୋକେ ବିଭିନ୍ନ ମାରାତ୍ମକ ରୋଗର ଶିକାର ହେଉଛନ୍ତି ।
ଯଦିଓ ବାୟୁ ପ୍ରଦୂଷଣର ସ୍ତର ମାପିବାକୁ ସରକାର ୪ଟି ସ୍ଥାନରେ ପ୍ରଦୂଷଣ ମାପକ ଯନ୍ତ୍ର ଲଗାଇଛନ୍ତି । କିନ୍ତୁ ରୋଗ ଯନ୍ତ୍ରଣାରେ ଅନେକ ଜୀବନ ଯାଉଥିଲେ ବି କେହି ଏ ସମସ୍ୟା ସୁଧାରିବାକୁ କିମ୍ବା ପରିବେଶ ପାଇଁ ଚିନ୍ତା କରିବାକୁ ସମୟ ପାଉ ନାହାନ୍ତି । ଜଳବାୟୁ ପରିବର୍ତ୍ତନ, ବିଶ୍ୱତାପନ ଆଦି ପ୍ରାକୃତିକ ବିପର୍ଯ୍ୟୟ ମଣିଷର ଅସନ୍ତୁଳିତ ବ୍ୟବହାର ପାଇଁ ବିପଦର କାରଣ ସାଜୁଛି । ତେଣୁ ସମୟ ଆସିଛି ବିଶ୍ୱକୁ ବିପଦ ମୁହଁରୁ ବଞ୍ଚାଇବାର, ନିଜ ପରିବେଶ, ପରିସ୍ଥିତି, ଜୀବନକୁ ସୁରକ୍ଷିତ କରିବାର । ଏ ଧୂଳି ହିଁ ବୟାନ କରୁଛି ଏଠି ଜୀବନ କେତେ ବିପଦଭରା । ତେଣୁ ଆସନ୍ତୁ ପରିବେଶ ପାଇଁ ସମୟ ଦେବା । ସମ୍ବାଦ ଡିଜିଟାଲର ମହତ ଅଭିଯାନରେ ନିଜକୁ ସାମିଲ କରି ପ୍ରକୃତି ପାଇଁ, ପର ପିଢି ପାଇଁ ସୁରକ୍ଷାର ସାରଥୀ ସାଜିବା ।