ଚେତାଇ ଦେଲେ ଜେଏନୟୁ ଛାତ୍ରଛାତ୍ରୀ । ବାରମ୍ବାର ସଂସଦ ଘେରାଉ କରାଯିବ, ବର୍ଦ୍ଧିତ ଫି’ ପ୍ରତ୍ୟାହାର ନ ହେବା ପର୍ଯ୍ୟନ୍ତ ଜାରି ରହିବ ଆନ୍ଦୋଳନ ।
କନକ ବ୍ୟୁରୋ : ହଷ୍ଟେଲ ଫି’ ବୃଦ୍ଧି ପ୍ରତ୍ୟାହାର ନ ହେବା ପର୍ଯ୍ୟନ୍ତ ବିରୋଧ ଜାରି ରହିବ ବୋଲି ଚେତାଇ ଦେଇଛି ଜେଏନୟୁ ଛାତ୍ର ସଂସଦ । ମଙ୍ଗଳବାର ଜେଏନୟୁ ଛାତ୍ର ସଂସଦ ପ୍ରେସମିଟରେ ନିଜର ଆଭିମୁଖ୍ୟ ସ୍ପଷ୍ଟ କରିଛି । ଯେତେବେଳ ଯାଏଁ ହଷ୍ଟେଲ ଫି’ ବୃଦ୍ଧି ପ୍ରତ୍ୟାହାର ନ ହୋଇଛି ସରକାରଙ୍କ ବିରୋଧରେ ଆରମ୍ଭ ହୋଇଥିବା ଏହି ଆନ୍ଦୋଳନ ଜାରି ରହିବ । ନିଜର ହକର ଲଢେଇ ଲଢୁଥିବା ଜେଏନୟୁ ଛାତ୍ରଛାତ୍ରୀ ସରକାରଙ୍କ ଚାପ କିମ୍ବା ପୋଲିସ ଭୟରେ ମୁଣ୍ଡ ନୁଆଁଇବେ ନାହିଁ ବୋଲି ଛାତ୍ର ସଂସଦ କହିଛି । ଆବଶ୍ୟକ ପଡିଲେ ବାରମ୍ବାର ସଂସଦ ଘେରାଉ କରିବାକୁ ପଛାଇବୁ ନାହିଁ ବୋଲି ଛାତ୍ର ସଂସଦ ସଭାପତି ଆଇଶୀ ଘୋଷ କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଛାତ୍ର ସଂସଦ ପକ୍ଷରୁ କୁହାଯାଇଛି ଯେ, ଗତ ୨୩ ଦିନ ହେବ ଜେଏନୟୁ ଛାତ୍ରଛାତ୍ରୀ ନିଜର ଦାବି ଜଣାଇବାକୁ ଚାହୁଁଥିଲେ ମଧ୍ୟ କେହି ଶୁଣୁନାହାନ୍ତି । ଏନେଇ ଶାନ୍ତିପୂର୍ଣ୍ଣ ଭାବେ ପ୍ରତିବାଦ କଲେ ପୋଲିସ ଲାଠିଚାର୍ଜ କରିବାକୁ ପଛାଉ ନାହିଁ । ଏହାଛଡା ମାନବ ସମ୍ବଳ ବିକାଶ ମନ୍ତ୍ରାଳୟ ପକ୍ଷରୁ ଯେଉଁ କମିଟି ଗଠନ କରାଯାଇଛି, ସେମାନେ ଛାତ୍ରଛାତ୍ରୀଙ୍କ ସହ ଆଲୋଚନା କରିବାକୁ ମନା କରୁଛନ୍ତି । ଏପରିକି ଯେତେବେଳେ ଉପ-କୁଳପତି ଛାତ୍ରଛାତ୍ରୀଙ୍କ ଦାବି ଶୁଣିବାକୁ ସାମ୍ନାକୁ ଆସୁନାହାନ୍ତି ସେତେବେଳେ ଛାତ୍ରଛାତ୍ରୀ ଏହି ଲଢେଇରୁ କାହିଁକିି ପଛଘୁଞ୍ଚା ଦେବେ । ବରଂ ବିଶ୍ୱବିଦ୍ୟାଳୟ ଭିସି ତୁରନ୍ତ ଇସ୍ତଫା ଦେଇଦିଅନ୍ତୁ ।
ଗତକାଲି ହଷ୍ଟେଲ ଫି ବୃଦ୍ଧିକୁ ନେଇ ରାଜରାସ୍ତାକୁ ଓହ୍ଲାଇଥିଲେ ଜେଏନୟୁ ଛାତ୍ରଛାତ୍ରୀ । ସଂସଦର ଶୀତକାଳୀନ ଅଧିବେଶନ ଆରମ୍ଭ ହେଉଥିବାରୁ ସଂସଦ ସାମ୍ନାରେ ପ୍ରତିବାଦ କରିବାକୁ ଆଗେଇ ଚାଲିଥିଲେ ଛାତ୍ରଛାତ୍ରୀ । ତେବେ ମଝି ରାସ୍ତାରେ ପୋଲିସ ସେମାନଙ୍କୁ ପ୍ରତିରୋଧ କରିବାରୁ ଉଭୟ ଛାତ୍ର ଓ ପୋଲିସ ମଧ୍ୟରେ ସଂଘର୍ଷ ଆରମ୍ଭ ହୋଇଥିଲା । ଏଥିରେ କିଛି ଛାତ୍ର ଗୁରୁତର ଆହତ ହୋଇଥିବା ବେଳେ ଆଉ କିଛି ଛାତ୍ରଙ୍କୁ ପୋଲିସ ଗିରଫ କରି ନେଇଥିଲା ।