ଝାରସୁଗୁଡାରେ ସମସ୍ୟା ଘେରରେ ଦିନ କାଟୁଛନ୍ତି ଏମସିଏଲ କୋଇଲା ଖଣି ପାଇଁ ବିସ୍ଥାପିତ ଜନତା । କମ୍ପାନୀ ପକ୍ଷରୁ ଦିଆଯାଉନି ଉପଯୁକ୍ତ କ୍ଷତିପୂରଣ ।
କନକ ବ୍ୟୁରୋ: ଝାରସୁଗୁଡା ଏମସିଏଲ କୋଇଲାଖଣିର ଦାଦାଗିରି । ଏମସିଏଲ ଖୋଲା ମୁହାଁ କୋଇଲା ଖଣି ଯୋଗୁଁ ବିସ୍ତାପିତ ହେଉଥିବା ଲୋକମାନଙ୍କୁ ନା ମିଳୁଛି ଘର ନା ରୋଜଗାର । ଫଳରେ ସବୁ ଦିନ ବଂଚିବାକୁ ସଂଘର୍ଷ କରୁଛନ୍ତି ବାସହରା । ଏହାସହ ଗାଁ ପାଖରେ ପଥର ବ୍ଲାଷ୍ଟିଂ ଯୋଗୁଁ ଭୟରେ ଜୀବନ କାଟୁଛନ୍ତି ସ୍ଥାନୀୟ ଲୋକେ ।
Kanak News is now on WhatsApp
Join and get latest news updates delivered to you via WhatsApp
ଝାରସୁଗୁଡା ଲଖନପୁର ବ୍ଲକ ଅନ୍ତର୍ଗତ ଦର୍ଲିପାଲିଗାଁରେ ଘର ଠାରୁ ମାତ୍ର ୨୦ ମିଟର ଦୁରରେ ଚାଲିଛି ପଥର ବ୍ଲାଷ୍ଟିଂ । ଫଳରେ ଭୟଙ୍କର ବିସ୍ଫୋରଣ ଯୋଗୁଁ ଫାଟି ଆଁ କରୁଛି ଘରର କାନ୍ଥ । ଏମସିଏଲ କମ୍ପାନୀର ମନମୁଖୀ ବ୍ଲାଷ୍ଟିଂ ଓ କୋଇଲା ଖନନ ଯୋଗୁଁ ଭୟରେ ଜୀବନ କାଟୁଛନ୍ତି ଲୋକେ । ଅନେକ ସମୟରେ ଘର ଭାଙ୍ଗି ଯାଉଛି, ହେଲେ ନିୟମ ଅନୁଯାୟୀ ଏମସିଏଲ କ୍ଷତିପୂରଣ ଦେଉନଥିବା ଅଭିଯୋଗ ହେଉଛି । ୧୯୮୨ରୁ କୋଇଲା ଖଣି ପାଇଁ ଜମି ଅଧିଗ୍ରହଣ କରିଛି ମହାନଦୀ କୋଇଲା କମ୍ପାନୀ, ଖଣି ସମ୍ପ୍ରସାରଣ ମଧ୍ୟ ହେଉଛି । ହେଲେ ଏଯାଏଁ ବିସ୍ଥାପିତଙ୍କ ସମସ୍ୟାର ସମାଧାନ ହୋଇନାହିଁ ।
ଲୋକଙ୍କ ସମସ୍ତ ଜମିକୁ ଏମସିଏଲ କମ୍ପାନୀ ଅଧିଗ୍ରହଣ କରିଥିବା ବେଳେ କିଛି ଲୋକଙ୍କୁ ଏ ପର୍ଯ୍ୟନ୍ତ ଘର କି ଚାକିରି ଖଣ୍ଡିଏ ମିଳିନାହିଁ । ଏତିକିରେ ଦୁଃଖ ସରିନି, ପଥର ବ୍ଲାଷ୍ଟଂ ଯୋଗୁଁ ପ୍ରଦୁଷଣ ମାତ୍ରା ବଢୁଥିବା ବେଳେ ପିଇବା ପାଇଁ ପାଣି ଟୋପାଏ ପାଉନଥିବା ଅଭିଯୋଗ ହୋଇଛି । ଅନ୍ୟପଟେ ବିସ୍ଥାପିତଙ୍କୁ ନିୟମ ଅନୁଯାୟୀ କ୍ଷତିପୂରଣ ଦେବା ଦିଗରେ ପଦକ୍ଷେପ ନେବାକୁ ଆରପିଡିଏସି ବୈଠକରେ ଏମସିଏଲ କମ୍ପାନୀକୁ ନିର୍ଦ୍ଦେଶ ଦିଆଯାଇଛି । ଝାରସୁଗୁଡା ଲଖନପୁର ବ୍ଲକର ଦର୍ଲିପାଲି ସମେତ ଟିଙ୍ଗିସମାଲ, ଖଇରକୁନି, ସାହାଜବାହାଲ ଆଦି ଅଂଚଳରେ ଏମସିଏଲ ପକ୍ଷରୁ କୋଇଲା ଖଣି କରାଯାଇଛି । ସେଠାରେ ମଧ୍ୟ ବିସ୍ଥାପିତଙ୍କ ସମସ୍ୟାର ସମାଧାନ ଆଜି ଯାଏଁ ହୋଇ ନାହିଁ ।