କନକ ବ୍ୟୁରୋ : ଝାରସୁଗୁଡାରୁ ଛତିଶଗଡକୁ ସଂଯୋଗ କରୁଥିବା ୪୯ ନମ୍ବର ଜାତୀୟ ରାଜପଥ ଏବେ ମରଣଯନ୍ତା ପାଲଟିଛି । ପ୍ରତ୍ୟେକ ଦିନ ଶହ ଶହ କୋଇଲା ବୋଝେଇ ଗାଡି ଯା’ଆସ କରୁଥିବା ଏହି ରାସ୍ତା ନେଉଛି ମୁଣ୍ଡ ପରେ ମୁଣ୍ଡ । ରାସ୍ତାକଡରେ କୋଇଲା ବୋଝେଇ ଗାଡି ମାସମାସ ଧରି ଅଟକ ରହିବା, ତ୍ରୁଟିପୂର୍ଣ୍ଣ ରାସ୍ତା ନିର୍ମାଣ ସାଙ୍ଗକୁ ବେପରୁଆ ଗାଡି ଚାଳନା ଯୋଗୁଁ ଦୁର୍ଘଟଣା ଘଟୁଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
୪୯ ନମ୍ବର ଜାତୀୟ ରାଜପଥ କଡରେ ଥିବା ଝାରସୁଗୁଡା ଥାନା, ସଦର ଥାନା, କୋଲାବିରା ଥାନା, ବ୍ରଜରାଜନଗର ଥାନା, ବେଲପାହାଡ ଥାନା, ଲଖନପୁର ଥାନା, ରେଙ୍ଗାଲି ଥାନା ଅଧିନରେ ପ୍ରତିଦିନ ଛୋଟବଡ ଦୁର୍ଘଟଣାରେ ଧନ ଜୀବନ ନଷ୍ଟ ହେଉଛି । ଝାରସୁଗୁଡା ପୋଲିସ ପକ୍ଷରୁ ମିଳିଥିବା ସୂଚନା ଅନୁଯାୟୀ ୨୦୨୦ରୁ ୨୪ ଜାନୁଆରୀ ମାସ ମଧ୍ୟରେ ୨୦୮ ଜଣଙ୍କ ଜୀବନ ହାନୀ ଘଟିଛି । ୧୬୮ଜଣ ଗଭୀର ଆହାତ ହୋଇଥିବା ବେଳେ ୧୪୪ ଜଣ ସାମାନ୍ୟ ଆହାତ ହୋଇଛନ୍ତି । ଦୁଇ ଥାକିଆ ରାସ୍ତାକୁ ଚାରି ଥାକିଆରେ ପରିଣତ କରାଗଲେ ଦୁର୍ଘଟଣାକୁ ରୋକା ଯାଇପାରିବ ବୋଲି ସ୍ଥାନୀୟ ଲୋକ ମତ ପ୍ରକାଶ କରିଛନ୍ତି ।
କୋଇଲା ପରିବହନ କରୁଥିବା ଟ୍ରକ୍ ଗୁଡିକର ପଛ ଲାଇଟ ଜଳୁନଥିବା, କୌଣସି ଟ୍ରକରେ ଖଲାସି ନଥିବା, କୋଇଲା ଓ ପାଉଁଶ ବୋଝେଇ ଟ୍ରକ୍ ଡାଲାକୁ ତାରପୋଲିନରେ ଢଙ୍କା ନଯିବା ମଧ୍ୟ ଦୁର୍ଘଟଣାର ଗୋଟିଏ ଗୋଟିଏ କାରଣ ବୋଲି ଜଣାପଡିଛି ।