କନକ ବ୍ୟୁରୋ : ଝାଡଖଣ୍ଡକୁ ଡେଇଁଲା ମହାରାଷ୍ଟ୍ର ଝଗଡା । ମହାରାଷ୍ଟ୍ରରେ ଏନଡିଏ ସହଯୋଗୀ ଶିବସେନା ଓ ବିଜେପି ମଧ୍ୟରେ ଯେଉଁ ଫାଟ ସୃଷ୍ଟି ହୋଇଛି ତାର ପ୍ରଭାବ ଏବେ ଝାଡଖଣ୍ଡରେ ଦେଖିବାକୁ ମିଳିଛି । ତେବେ ମହାରାଷ୍ଟ୍ରରେ ଶିବସେନା ଏକା ସରକାର ଗଢିବାକୁ ଚାହୁଁଁଥିବା ବେଳେ ଝାଡଖଣ୍ଡରେ ଏଲଜେପି ମଧ୍ୟ ଏକାକୀ ନିର୍ବାଚନ ଲଢିବାକୁ ଘୋଷଣା କରିଛି । ବିଧାନସଭାରେ ମୋଟ ୮୧ଟି ଆସନରୁ ଏଲଜେପି ୫୦ଟି ଆସନରେ ଏକାକୀ ନିର୍ବାଚନ ଲଢିବାକୁ ସୂଚନା ଦେଇଛି ।
Kanak News is now on WhatsApp
Join and get latest news updates delivered to you via WhatsApp
ଆସନ୍ତା ୩୦ରେ ଝାଡଖଣ୍ଡରେ ନିର୍ବାଚନ ହେବାକୁ ଥିବା ବେଳେ ଏହା ପୂର୍ବରୁ ସତ୍ତାରେ ଥିବା ବିଜେପିକୁ ଶକ୍ତ ଝଟକା ଲାଗିଛି । ସହଯୋଗୀ ଲୋକ ଜନଶକ୍ତି ପାର୍ଟି ( ଏଲଜେପି) ମେଣ୍ଟରୁ ଓହରି ଯାଇ ଏକାକୀ ଲଢିବାକୁ ଘୋଷଣା କରିଛି । ତେବେ ଆଜି ସଂଧ୍ୟା ଶୁଦ୍ଧା ଦଳୀୟ ପ୍ରାର୍ଥୀଙ୍କ ପ୍ରଥମ ତାଲିକା ଘୋଷଣା କରାଯିବ ବୋଲି ପାର୍ଟିର ଅଧ୍ୟକ୍ଷ ଚିରାଗ ପାସୱାନ ସୂଚନା ଦେଇଛନ୍ତି ।
ଝାଡଖଣ୍ଡ ବିଧାନସଭା ନିର୍ବାଚନ ୫ଟି ସ୍ତରରେ ହେବ । ଆଉ ଭୋଟ ପୂର୍ବରୁ ବିଜେପି, ଏଲଜେପି ଓ ଆଜସୁ ମଧ୍ୟରେ ସମ୍ପର୍କ ଭାଙ୍ଗିବାର ସଙ୍କେତ ମିଳିଛି । ଝାଡଖଣ୍ଡରେ ଆଉ ପନ୍ଦର ଦିନ ପରେ ପଦ୍ମ ବଡ ପରୀକ୍ଷା ଦେବାକୁ ଯାଉଥିବା ବେଳେ ପରୀକ୍ଷା ପୂର୍ବରୁ ପଦ୍ମର ଦୁଇ ପାଖୁଡା ଝଡି ପଡିଛି, ଯାହା ବିଜେପି ପାଇଁ ବଡ କଣ୍ଟା ସାଜିବ ବୋଲି ଅନୁମାନ କରାଯାଉଛି ।