ଦେଶୀ ଗାଈ ଅପେକ୍ଷା ବଢ଼ୁଛି ଜର୍ସି ଗାଈର ଆଦର: କମ୍ ପରିଶ୍ରମ ଅଧିକ ଲାଭ ଦେଉଛନ୍ତି ଜର୍ସି ଗାଈ

କନକ ବ୍ୟୁରୋ: କଟକ ବାଙ୍କୀ ଅଂଚଳରେ ଗୋଈ ଚରାଉଥିବା ଏହି ଚାଷୀ ଜଣକ, ୨୦ ବର୍ଷ ହେଲାଣି ଗୋପାଳନ କରି ଆସୁଛନ୍ତି । ଦିନ ଥିଲା ତାଙ୍କ ପାଖରେ ୮ରୁ ୧୦ଟି ଦେଶୀ ଗାଈ ଥିଲେ । ହେଲେ ଖର୍ଚ୍ଚ ତୁଳନାରେ ଆୟ ଯୋଗୁଁ କମ ହେବା ଯୋଗୁଁ ଏବେ ଦେଶୀ ଗାଈ ବଦଳରେ ଜର୍ସି ଗାଈ ରଖୁଛନ୍ତି । କାରଣ, ଗାଈଙ୍କୁ ଆବଶ୍ୟକ ହେଉଥିବା ଖାଦ୍ୟ ଓ ଚରିବା ପାଇଁ ଉପଯୁକ୍ତ ପଡ଼ିଆର ଅଭାବ ଯୋଗୁଁ, ଦେଶୀ ବଦଳରେ ଜର୍ସି ଗାଈ ରଖିବାକୁ ନିଷ୍ପତି ହେଇଛନ୍ତି ।

ବାଙ୍କୀ ଉପଖଣ୍ଡର କରଦର, ଗୋପାଳପୁର, ବୈଦେଶ୍ୱର, କଢ଼ାମଲ୍ଲ, ରଜିବ ଭଳି ଗାଁ ଚାଷୀମାନେ ବର୍ଷ ବର୍ଷ ଧରି ଦେଶୀ ଗାଈ ରଖି ଆସୁଥିଲେ । ହେଲେ ଏବେ ଦେଶୀ ଗାଈଙ୍କ ସଂଖ୍ୟା କମିବାରେ ଲାଗିଛି । ଚାଷୀଙ୍କ କହିବା ଅନୁସାରେ, ୮ଟି ଦେଶୀ ଗାଈ ଯେତିକି କ୍ଷୀର ଦେଉଛନ୍ତି, ମାତ୍ର ଗୋଟିଏ କିମ୍ବା ୨ଟି ଜର୍ସି ଗାଈ ସେହି ପରିମାଣର କ୍ଷୀର ଦେଉଛନ୍ତି । ଉପଖଣ୍ଡ ପ୍ରାଣୀ ଚିକିତ୍ସା ଅଧିକାରୀ ମଧ୍ୟ ସମାନ ଢ଼ଙ୍ଗରେ ଏହି କଥା କହିଛନ୍ତି । ତେବେ ଦେଶୀ ଗାଈ ଓ ଜର୍ସି ଗାଈଙ୍କ ମଧ୍ୟରେ ପ୍ରଜନନ ପ୍ରକିୟା ଉପରେ ଗୁରୁତ୍ୱ ଦିଆଯାଉଥିବା ସେ କହିଛନ୍ତି ।

ଏହି କାହାଣୀ କେବଳ କଟକ ଜିଲ୍ଲାରେ ସୀମିତ ନୁହେଁ ବରଂ ପୁରୀ ଜିଲ୍ଲାରୁ ବି ଆସିଛି ସମାନ କାହାଣୀ । ପୁରୀ ଜିଲ୍ଲା ପ୍ରାଣୀ ସମ୍ପଦ କାର୍ଯ୍ୟାଳୟରୁ ମିଳିଥିବା ସୂଚନା ଅନୁସାରେ- ୨୦୧୨ ଗାଈ ଗଣନା ଅନୁସାରେ ଜିଲ୍ଲାରେ ୪ ଲକ୍ଷ ୪୩ ହଜାର ୯୭୩ ଦେଶୀ ଗାଈ ଗୋରୁ ଥିଲେ । ଏହାର ଠିକ୍ ୫ ବର୍ଷ ପରେ ହୋଇଥିବା ଗଣନା ଅନୁସାରେ ଏହି ସଂଖ୍ୟା ୩ ଲକ୍ଷ ୬୭ ହଜାର ୧୮୩କୁ ଖସି ଆସିଥିଲା । ଆଗକୁ ହେବାକୁ ଥିବା ଗଣନାରେ ଏହି ସଂଖ୍ୟା ୨ ଲକ୍ଷକୁ ଖସି ଆସିପାରେ ବୋଲି ଆକଳନ କରାଯାଉଛି ।