ବିହାର ସମ୍ଭାଳିବେ ନୀତିଶ । ସଂଜୟ ଝା ଙ୍କ ହାତରେ ଦେଲେ କେନ୍ଦ୍ର ନେତୃତ୍ୱ
କନକ ବ୍ୟୁରୋ : ବିହାରର କ୍ଷମତାଧାରୀ ଜେଡିୟୁ ବା ସଂଯୁକ୍ତ ଜନତା ଦଳ ମୁଖ୍ୟ ନୀତିଶ କୁମାରଙ୍କୁ ନେଇ ସର୍ବଦା ଚର୍ଚ୍ଚା । ଚର୍ଚ୍ଚା ପଛରେ ଗୋଟିଏ କାରଣ ମେଣ୍ଟ ବଦଳ । କେତେବେଳେ ଏନଡିଏ ତ କେତେବେଳେ ଇଣ୍ଡିଆ ମେଣ୍ଟରେ ସାମିଲ ହୋଇ ବଡ ବଡ ଦଳମାନଙ୍କୁ ପାଣି ପିଆଉଛନ୍ତି । ଏହି କ୍ରମରେ ଏବେ ସେ ବିଜେପି ନେତୃତ୍ୱାଧୀନ ଏନଡିଏ ମେଣ୍ଟରେ ସାମିଲ ଅଛନ୍ତି । ହେଲେ ପୁଣି ଚର୍ଚ୍ଚା ହେଉଛି କି ନୀତିଶ କୁମାର ଇଣ୍ଡିଆ ମେଣ୍ଟକୁ ଫେରିବେ । ଏସବୁ ଭିତରେ ଆଜି ଜେଡିୟୁର ରାଷ୍ଟ୍ରୀୟ କାର୍ଯ୍ୟକାରିଣୀ ବୈଠକ ଦିଲ୍ଲୀ ସ୍ଥିତ କନଷ୍ଟିଚ୍ୟୁସନାଲ କ୍ଲବରେ ଅନୁଷ୍ଠିତ ହୋଇଛି । ଏହି ବୈଠକରେ ଜେଡିୟୁର ରାଷ୍ଟ୍ରୀୟ କାର୍ଯ୍ୟାକାରିଣୀ ଅଧ୍ୟକ୍ଷ ଭାବେ ସଂଜୟ ଝାଙ୍କୁ ଚୟନ କରାଯାଇଛି । ସଂଜୟଙ୍କ ନାମ ନୀତିଶ କୁମାର ହିଁ ପ୍ରସ୍ତାବ ଦେଇଥିଲେ ।
Kanak News is now on WhatsApp
Join and get latest news updates delivered to you via WhatsApp
କେବଳ ରାଷ୍ଟ୍ରୀୟ ଅଧ୍ୟକ୍ଷ ନୁହେଁ ଏହି ବୈଠକରେ ଅନେକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ ଉପରେ ମଧ୍ୟ ଜୋରଦାର ଆଲୋଚନା ହୋଇଥିବା ସୂଚନା ରହିଛି । ବିହାରକୁ ସ୍ୱତନ୍ତ୍ର ରାଜ୍ୟପାହ୍ୟା ମାନ୍ୟତା ଦାବି କରିବା ସହ ଆଗାମୀ ଝାଡଖଣ୍ଡ ନିର୍ବାଚନକୁ ନେଇ ମଧ୍ୟ ରଣନୀତି ପ୍ରସ୍ତୁତ କରାଯାଇଛି । ସେହିଭଳି ଆଗାମୀ ବିହାର ବିଧାନସଭା ନିର୍ବାଚନକୁ ନେଇ ଏନଡିଏ ମେଣ୍ଟରେ ଦେଖାଦେଇଥିବା ଫାଟ ବାବଦରେ ମଧ୍ୟ ଆଲୋଚନା ହୋଇଛି ।
କିଛିମାସ ପୂର୍ବରୁ ବିହାର ବିଜେପିର ବରିଷ୍ଠ ନେତାମାନେ ଆଗାମୀ ବିଧାନସଭା ନିର୍ବାଚନ ନୀତିଶ କୁମାରଙ୍କ ନେତୃତ୍ୱରେ ଲଢାଯିବ ବୋଲି ସଂକେତ ଦେଇଥିଲେ ବି ଏବେ ଏହାକୁ ନେଇ ବିହାର ବିଜେପି ମଧ୍ୟରେ ଫାଟ ଦେଖାଦେଇଉଛି । ବିହାର ବିଜେପିର ବରିଷ୍ଠ ନେତା ତଥା ପୂର୍ବତନ କେନ୍ଦ୍ରମନ୍ତ୍ରୀ ଅଶନ୍ୱୀ ଚୌବେ କହିଛନ୍ତି କି, ବିହାର ବିଧାନସଭା ନିର୍ବାଚନ ଏନଡିଏ ମେଣ୍ଟ ବିଜେପି ନେତୃତ୍ୱରେ ଲଢିବ ଓ ବିଜେପି ଏକାକୀ ସରକାର କରିବାର କ୍ଷମତା ହାସଲ କରିବ । ହେଲେ ଏଥିରେ ସହମତି ହୋଇନାହାଁନ୍ତି ବିହାର ବିଜେପି ନେତା ତଥା ରାଜ୍ୟର ଉପ ମୁଖ୍ୟମନ୍ତ୍ରୀ ସମ୍ରାଟ ଚୌଧୁରୀ । ସେପଟେ ଅକଳରେ ପଡି ବିହାରରେ ବିଜେପି ନୀତିଶ କୁମାରଙ୍କୁ ମୁଖ୍ୟମନ୍ତ୍ରୀ ଆସନରେ ବସାଇଛି । କାରଣ ବିହାର ବିଧାନସଭାରେ ନୀତିଶ କୁମାରଙ୍କ ଜେଡିୟୁ ତୁଳନାରେ ବିଜେପି ପାଖରେ ଦ୍ୱିଗୁଣା ବିଧାୟକ ରହିଛନ୍ତି । ଏହାସହ ଚଳିତ ଲୋକସଭା ନିର୍ବାଚନରେ ଜେଡିୟୁ ଭଲ ପ୍ରଦର୍ଶନ କରିଥିବାରୁ ଦଳ ଏକାକୀ ରାଜ୍ୟରେ କ୍ଷମତା ହାସଲ କରିବାକୁ ଚେଷ୍ଟା କରିବ ଓ ଏହାର ମଙ୍ଗ ସିଧାସଳଖ ନୀତିଶ କୁମାର ଧରିବେ ।