୧୦ କୋଟିର ଜମି ପାଇଁ କୋଟିଏର ଡିଲ୍: ମାଷ୍ଟରମାଇଣ୍ଡଙ୍କ ଘରେ ବୁଲିଲା ଜେସିବି

କନକ ବ୍ୟୁରୋ: ଭୁବନେଶ୍ୱର ନୟାପଲ୍ଲୀ ଅଂଚଳର ବିବାଦୀୟ ଜମିକୁ ପୋଜେସନ ଦେବା ନାଁରେ ରାତି ଅଧିଆ ଗଣ୍ଡଗୋଳ ଓ ଭଙ୍ଗାରୁଜା ଘଟଣାରେ ଆକ୍ସନ ମୋଡରେ କମିଶନରେଟ ପୁଲିସ । ଅପରାଧର ମାଷ୍ଟରମାଇଣ୍ଡ କୁହାଯାଉଥିବା ରାଘବ ଜେନା ଫେରାର ହୋଇଯାଇଛି । କିନ୍ତୁ ଝାରପଡାରେ ତାର ଜବରଦଖଲ ସାମ୍ରାଜ୍ୟ ଉପରେ ୟୁପି ଷ୍ଟାଇଲରେ ଜେସିବି ଲଗାଇ ପ୍ରାୟ ୩୦ ଘରକୁ ମାଟିରେ ମିଶାଇଦିଆଯାଇଛି । ଦୀର୍ଘବର୍ଷ ଧରି ରାଜଧାନୀର ଛାତି ଉପରେ ଥିବା ସରକାରୀ ଜାଗାରେ ବେଆଇନ ଘର କରି ଲୋକଙ୍କୁ ଭଡାରେ ଦେଇ ଟଙ୍କା ଆଦାୟ କରୁଥିଲା ରାଘବ । ଆଉ ଏହି ଟଙ୍କାରେ ବିଛାଇଥିଲା ଅପରାଧର ସାମ୍ରାଜ୍ୟ । ପୁଲିସ ଜେସିବି ଲଗାଇ ଘର ଭାଙ୍ଗୁଥିବାବେଳେ ସେଠାରେ କିଛି ସମୟ ପାଇଁ ଉତେଜନା ଦେଖାଦଇଥିଲା । ସ୍ଥାନୀୟ ଲୋକେ ଏହାକୁ ବିରୋଧ କରିଥିଲେ ।

ନୟାପଲ୍ଲୀ ଇସ୍କନ ମନ୍ଦିର ନିକଟରେ ଜମି ପୋଜେସନ ଦେବା ନାଁରେ ଏକ କନଷ୍ଟ୍ରସନ ଦୋକାନକୁ ରାତି ଅଧିରେ ଜେସିବି ଲଗାଇ ସଂପୂର୍ଣ୍ଣ ଗୁଣ୍ଡ କରିଦେଇଥିଲେ ରାଘବ ଜେନା ଓ ତାର ଗ୍ୟାଙ୍ଗ ସଦସ୍ୟ । ମାରଣାସ୍ତ୍ର ଦେଖାଇ ରାଘବଙ୍କ ବାଉନ୍ସର ଦୋକାନ ମାଲିକ ଓ କର୍ମଚାରୀଙ୍କୁ ବନ୍ଦୀ କରି ଲୁଟି ନେଇଥିଲେ । ଏକ ବସ ଯୋଗେ ଶହେରୁ ଅଧିକ ଲୋକ ଏହି ଘଟଣାରେ ସାମିଲ ହୋଇଥିଲେ । ଏମାନଙ୍କ ମଧ୍ୟରେ ଥିଲେ ପୁରୁଷ ଓ ମହିଳା ବାଉନ୍ସର । ଏବେ ଯେସାକୁ ତେସା ନ୍ୟାୟରେ କମିଶନରେଟ ପୁଲିସ ମାଷ୍ଟରମାଇଣ୍ଡ ରାଘବ ଜେନାର ବେଆଇନ ସମ୍ରାଜ୍ୟକୁ ଜେସିବି ଲଗାଇ ଧ୍ୱଂସ କରିଦେଇଛି ।

ମାମଲାରେ ବର୍ତମାନ ସୁଦ୍ଧା ୧୯ଜଣଙ୍କୁ ଗିରଫ କରିସାରିଲାଣି କମିଶନରେଟ ପୁଲିସ । ହେଲେ ମାଷ୍ଟରମାଇଣ୍ଡ ରାଘବ ଜେନା ଓ ପୋଜେସନ ନେବାକୁ ଚାହୁଁଥିବା ଲୋକେ ବର୍ତମାନ ସୁଦ୍ଧା ଫେରାର ଅଛନ୍ତି । ଆଉ ସେମାନଙ୍କୁ ଧରିବାକୁ କମିଶନରେଟ ପୁଲିସ ଜାଲ ବିଛାଇଛି ।